ስርዓት ህግደፍ፡ ነቲ ብህዝቢ ኤርትራ መሰሉ ክረጋገጸሉ ዘልዕሎ ግሁድን ዘይግሁዱን ተቃውሞን መረረን፡ “ኣብ ዝበጽሖ የብሉን” ኢሉ ስለዝንዕቆን ብጭካነ ይምልሰሉ ስለዘሎን፡ ይዕበ ይንኣስ ፍጻሜ ህግደፍ ወትሩ እዉጅ ኣይኮነን። ብኣንጻሩ፡ ካብ ማሕበረ-ሰብ ዓለም ክሳብ ክንደይ ተነጺሉ ከምዘሎ ዝግንዘቦ’ኳ እንተኾነ፡ ኣብ ልዕሊ ህዝቢ ኤርትራ ዝፍጽሞ ዘሎ ምግሃስ ሰብኣዊ መሰላትን ገበንን ኣብ ኣህጉራዊ ቤት ፍርዲ ገበነኛታት ክኽሰስን ክፍረድን ምስተባህለ ግን፡ ዕብድብድ’ዩ ኣትዩዎ። ብመራኸቢ ብዙሓኑን ልኡዃቱን ኣቢሉ፡ “ካብ መድረኽ ዲፕሎማስያዊ ምክልኻል ናብ ደረጃ ዲፕሎማስያዊ ምጥቃዕ ተሰጋጊርና” ኢሉ ይጭድር ኣሎ። እዚ ምስሉይ ኣቀራርባ’ዚ፡ ኣብ እዋን ብረታዊ ቃልሲ’ውን፡ እቲ ዝጠፍእ ዝነበረ ህይወት ሰብ ከይገደሶ “ካብ መድረኽ ምክልኻል ናብ ምጥቃዕ፡ ካብ ደባይ ቅዲ-ኩናት ናብ ቀዋሚ ዕርዲ ተሰጋጊርና” ብምባል ወትሩ ይዕወት ከምዝነበረ ከምስል ይገልጽ ነይሩ። ኣብቲ ድሕሪ ናጽነት ምስ ኢትዮጵያ ዝተኻየደ ኩናት ድማ “ፈኸራ ወያነ ቀዳድ ገረወይና’ዩ፡ ባድመ ተታሒዛ ማለት ጸሓይ ብምዕራብ በሪቃ ማለት’ዩ” ብምባል ኣብ ጥራይ ጎልጎል ምፍካር፡ ዓቅምኻ ዘይምፍላጥን ንየዋሃት ምድንጋርን ገለ ካብ ባህርያት ስርዓት ህግደፍ’ዩ። ንዓይ ንኣንጭዋ ኣብ ለቆታ ከምዝብሃል ግን፡ ስርዓት ህግደፍ ብመልሓሱ ዝበለ እንተበለን ሓጥያተኛ እንከሎ ክጸድቅ እንተሃቀነን፡ ቀንዲ መምዘኒ እንታይነት ህግደፍ፡ እቲ መዓልታዊ ዝፍጽሞ እከይ ተግባራት’ዩ።

ስርዓት ህግደፍ፡ ልዕሊ ኹሉን ኣውራን ህላወ ስልጣኑ ስለዘገድሶ፡ ብዋጋ ልኡላውነት፡ ንብረትን መንነትን ህዝብና ክጣላዕ፡ መጻኢ ወለዶና ኣብ ጸልማትን ቅልውላውን ክድርብዮን ኣብ ዘይረብሓሉ ጉዳያት ክጠብሶን ድሕር ከምዘይብል ብተግባር ኣረጋጊጹ’ሎ። ህግደፍ ኣብ ዘይምልከቶ ህውከት የመን ምስተን ጽልዋታተንን ጸጥታዊ ስግኣታተንን ከይጎድለን ኣብ ልዕሊ የመን ብወተሃደራዊ ወፈራ ንሰላማዊ ህዝቢ ሞትን ስደት ዕንወት ንብረትን ዘካይዳ ዘለዋ ብንግስነት ስዑድ ዓረብ ዝምራሕ ኪዳንን ብምዕራባውያን ሃገራት ዝተባረኸን በቲ ሓደ፡ ጦብሎቁታ ኢራን ድማ በቲ ካልእ፡ ህሉዉ ኣብነት ጽላለን ዘይሓላፍነታውን ህግደፍ’ዩ። መርዛማት ኣእዳው ስርዓት ህግደፍ ተመጣጢረን ዘየርክብኦ ቦታ የለን። ህግደፍ ንኸምስል፡ “ባዕዳውያን ገዛእቲ ሓይልታት፡ ሓድነት ህዝቢ ኤርትራ ብኣውራጃ፡ ቀቢላን ሃይማኖትን ንምዝራግ ዘይፈንቀልዎ እምኒ የለን” ብምባል ንኻልኦት ክውንጅልን ንነብሱ ጻድቅ ክመስልን ይፍትን’ዩ። ብተግባር ግን፡ ስርዓት ህግደፍ ንህዝቢ ኤርትራ ብስዉርን ሓደገኛን ሜላ ሓድሕድ ምትእምማን ከምዘይህልዎ፡ ህዝብና ነቲ ብስርዓት ህግደፍ ኣብ ልዕሊኡ ዝወርዶ ኣደራዕ ብፍርሒ ተዋሒጡ ፈለኽ ከምዘይብል፡ ኣፍ ኣውጺኡ ኣበራት ህግደፍ ከቃልዕ እንተጀሚሩ ድማ፡ “ዕሱብ ወያነ፡ ልኡኽ ስለያ ኣመሪካ፡ ጀብሃ፡ ጅሃድ፡ ከዳዕ” ዝብሉ ናይ ጸለመ ኣስማት ብምጥማቅ፡ ካብ ህዝቢ ኤርትራ ምንጻልን ሞራሎም ምውዳቅን ብዝለዓለ ይሰርሓሉ።

ዓመጽን ብልሽውናን ቀንዲ ሕላገት ስርዓት ህግደፍ ስለዝኾነ፡ ዘገልግልዎ እሙናት ሰባት ብሚልዮናት ገንዘብን ንዋትን ገዚኡ ኣብ እከይ ተግባራት የዋፍሮም። ብዘይሕጋዊ ኣገባብ፡ ኣጽዋር፡ ንብረትን ገንዘብን እንተላይ ህይወት ሰብ፡ ኣብ ምሻጥን ምዕዳግን ምስግጋርን ዝኣከቦ ቢልዮናት ገንዘብ ድማ ኣብ ምስጡር የቀምጦ። ስርዓት ህግደፍ፡ ህዝቢ ኤርትራ ዘይረብሓሎምን ናይ ኤርትራውያን ናይ ለውጢ ምንቅስቃስ ንምዕፋንን፡ ንጹር ዕላማታት ዘይብሎምን ንግዝያዊ ረብሓታት ከገልግልዎን፡ ኣብ ውሽጣዊ ጉዳያት ካልኦት ሃገራት ጣልቃ ምእታውን ንተቃወምቲ ካልኦት ሃገራት ከም ኢትዮጵያ፡ ሱዳን፡ ጅቡቲ፡ ሶማልያ፡ የመን ዝኣመሰላ ሃገራት፡ መሐከሊ ቦታ፡ ስልጠና፡ ንዋታውን ገንዘባውን ደገፋት ምሃብን ካብኡ ሓሊፉ ድማ ብምስጢር ስለያዊ ስርሓት ምክያድን ናዕብታት ምፍጣርን ቀዳማይ ውራይ ህግደፍ’ዩ። ኤርትራውያን ንሓደገኛ ተግባራት ህግደፍ ህጹጽ መዕገቲ እንተዘይገርናሉ ድማ፡ ተስፋ መጻኢት ኤርትራ ዝኾኑ መንእሰያትና በብዝኸድዎ ኣብ ስደት ክጠፍኡ፡ ታሪኽናን ክብርናን ክማራሳሕ፡ ጽልእን ስስዕን ክሰፍን፡ ሃገራውነትና ክብሕጎግ፡ ምስ ከባቢና ክንቀራሓንን ድኽነት ክወርሰናን’ዩ። ስለዚ ኤርትራውያን፡ ማዕረ ህሉው ገበናት ህግደፍ ድማ፡ መጻኢ ሓድጊ ስርዓት ህግደፍ ከሻቅለና ኣለዎ።

        ጽላል ካብ ሕቡራት መንግስታት ኣመሪካ (2 ሕዳር 2016)