ማሕበር ተጋደልቲ ህዝባዊ ግንባር ንለውጢ ዓባይ ብሪጣንያ  ትማሊ ቀዳም ሸሞንተ መጋቢት  ኣኼባኡ ኣካይዱ።

ማሕበር ተጋደልቲ ህዝባዊ ግንባር ንለውጢ ዓባይ ብሪጣንያ  ትማሊ ቐዳም ሸሞንተ መጋቢት  ኣኼባ  ብምክያድ፡  እቲ ማሕበር ካብ ዝምስረት ኪሳዕ ሕጂ ንዘካየዶ ንጥፈታት ገምጊሙ፣ ዝምራሓሉ ዓንዲ ሕግን ውሽጣዊ መምርሕን ተዛትዩ ብምጻድቕ ነቲ ማሕበር ዘገልግሉዎ ኣካየድቲ መሪጹ።

እቲ ማሕበር: ህዝብን ሃገርን ኣብ ኣዚዩ ሕማቕ ኩነታት ከምዝርከቡን፡ ኤርትራ ብናይ ጸቕጢ ትካላት እናተረግጸት ዘይከምትጽቢት ኩሉ ሃገራዊ ኣብ ኣዚዩ ዘተሓሳስብ ኩነታት ወዲቕ ምህላዋ ብምግንዛብ፣ ስቓይን ሽግርን ህዝቢ ንምሕጻር ኣብ ዝግበር ቃልሲ እታ ዝነኣሰት ዓቕሙ ንከበርክት ድልውነቱ ብምርግጋጽ ናይ ሽዱሽተ ኣዋርሕ መደባት ስርሑ ሓንጺጹ ብኣድማዕነት ኪዋስኣሉ ድልውነቱ ኣረጋጊጹ።

ብተወሳኺ እቲ ማሕበር፡ ኣብ ኩለን ናይ ዘተ-ገበላን (ፓልቶክ ሩማት) ኣብ ማዕከናት ዜናን መርበባት ሓበሬታን ደለይቲ ለውጢ ዝረአ ዘሎ ቅጥዑ ዘይሓለወ ሓድሕድ ምጥቅቃዕ ንኺውገድ ምሕጽንታኡ ብምትሕልላፍ፡ እቲ ብተዘዋዋሪ መገዲ ንስርዓት ህግደፍ ዘርብሕ ንዝምድናታት ደለይቲ ፍትሕን ሓድነት ህዝብን ዘላሕልሕ ዘሎ ካብቲ ቐንዲ መስመር ናብ ጓል መገዲ ዝኣልን መኣዝን ቃልሲ ዘስሕትን ጭቕጭቕ ንምግታእ ዓቕሙ ብዘፍቅዶ ኪሰርሕ ወሲኑ።

ኣብ ክንድኡ እቲ ማሕበር፡ ምልካዊ ስርዓት ሃገርና ነቲ ብፍላጥ ዝብሕጎግ ዘሎ ክብርታት ህዝቢ ንምዕቃብን ንምጉልባትን ምስ ኩሎም ደለይቲ ለውጢ ተቓለስቲ ተሓባቢሩ፡ ናይ ህዝቢ ኣኼባታት ብምዕዳም መድረኽ ዘተን ኣስተምህሮን ኪውድብን ናይ ምንቕቓሕን ምምኻርን ባይታ ንምፍጣር ኪሰርሕ ተሰማሚዑ።

ሃገር ብምልኪ እናዓነወት ኢድና ኣጣሚርና ኪንርኢ ኣይግባእን እዩ ዝበሉ ተጋባእቲ፡ ናይ ቃልሲ ተመኩሮኦምን ፍልጠቶምን ንተረከብቲ ሕድሪ መንእሰያት ንምውራስ ሓደ ካብቲ ቀንዲ መደባቶም ኪኸውንን፡ ብዝተፈላለየ ምኽንያት ሓቢሮም ኪሰርሑ ንዘይከኣሉ ተቓለስቲ መንእሰያት ንምርኻብን ንምቅርራብን ዓቲቦም ኪሰርሑሉ ወሲኖም።

እዚ ሓድነት ሓይሊ ሙዃኑ ዝኣምን ሓይሊ፡ንመጻኢ ዓቕሙ መዚኑ ኣወዳድባኡ ብምስፋሕ ንመንኮርኮር ቃልሲ ሓንቲ ስጉሚ እውን ትኹን ንቕድሚት ንምድፋእ ምስ ኩሎም ናይ ለውጢ ሓይልታት ሓቢሩ ኪሰርሕ ከምዝደሊ ቅሩብነቱ ደጊሙ ብምርግጋጽ፡ ኣብ ዝተፈላለየ ሃገራት ዝነብሩ ተጋደልቲ ብጾቱ ተመሳሳሊ ስጉምቲ ብምውሳድ ቃልሶም ከሐይሉ ጸዊዑ።

ኣብ መወዳእታ፡ እቲ ማሕበር ኩሉ ደለዪ ለውጢ ምስናይ ዝጥቀመለን ማዕከናት ዜናን መርበባት ሓበሬታን ኣንጻር እዚ ንመላእ ህዝቢ ኤርትራ ዘድሚ ዘሎ ስርዓት ብምቕናዕ፡ ብዝብሎን ዝጽሕፎን፡ ፍልልያቱ ተጻዊሩ ብስኒት ዝነብር ሕብረተሰብ ንምኹስኳስ ሚዛናዊ ኣቀራርባ ከዘውትርን ንሓድነት ህዝቢ ዘደልድል ምሙይን ቅዱውን ስራሕ ከቕርብን  ተማሕጺኑ።