ስማዊ መዓርግ ሚኒስተር ፍትሒ ዘለዋ ፎዝያ ሃሽም: ኣብዛ ብምግሃስ ሰብኣዊ መሰልን ምልካዊ ምሕደራን ናይ ኣፍሪቃ ሰሜን ኮርያ ቅጽል ስም ተዋሂብዋ ዘሎን ቅዋማዊ መንግስቲ ኣብ ዘይብላን መሰል ሰብ ዝግሃሰላን ኤርትራ: ፍትሒ ክነግስን ህዝቢ ኣብ ኮማዊ አብያተ ፍርዲ ጉዳያቱ ከሳልጥን ከምዘለዎ: ንተቀማጦ ኣስመራን ንኣባላት መበል 32 ሃገራዊ ኣገልገሎትን መግለጺ ሂባ።

ሚኒስተር ፎዝያ: ዕላማ ኮማዊ ቤት ፍርዲ ተሳታፍነት ህዝቢ ንምርግጋጽን ብቑዓት ፈታሕቲ ግርጭታትን ኣለይቲ ጉዳያትን ሸምገልቲ ንምምራጽ ምዃኑ ሓቢራ። ንሳ ብተወሳኺ: ነቶም ካብ ወለዶምን ማሙቅ ገዝኦምን ተነጺሎምን ካብ ስደት ተሪፎም ኣብ ገደብ ግዜ ዘይብሉ ግዱድ ውትህድርና ተቆሪኖም ዘለዉን ተዓለምቲ: መንእሰያት ኣብ ምዕቃብ ክብርታት ሕብረተሰብ ኤርትራ ልዑል ተራ ክጻወቱን ብሞያ ክምዕብሉን ኣተሓሳሲባ።

ዘኽፋኣላን ዘጸብቀላን ዘይትፈልጥን ሕልና ዘይብላን ሚኒስተር ፎዝያ: ነቶም ፍትሒ ይንገስ: ቅዋማዊ መንግስቲ ይተኸል: ሃገራዊ ምርጫ ይካየድ: ህዝቢ ኤርትራ ወናንን ወሳንን ጉዳያቱ ከኸውን ስልጣን ይወሃቦ: ሃገራዊ ኣገልግሎት ገደብ ግዜ ይገበረሉ: ኢሎም ድምጾም ዘስምዑ ዜጋታት ብዘይ ፍርዲ ንዓመታት ብስርዓት ኢሳይያስ ተኣሲሮም ዝሳቐዩ ዘለዉ ዜጋታት: ፍትሒ ክረኽቡ ብሒም ኢላ ዘይተዛረበት: ብዛዕባ ምምስራት ኮማዊ ጉዳያት ምምዳራ ዘነውር’ዩ።

ሕብረተሰብ ኤርትራ: ባዕሉ ዘርቀቆን ኣብ ማሕበራዊ ህይወቱን ዕለታዊ ንጥፈታቱን ዝመሓደረሉን ዝዳነየሉን ሕግታት’ኳ እንተነበሮ:  ስርዓት ህግደፍ  ዝዝውሮን ንስለያዊ  መዓላ ዝጥቀመሉን ኣሰራርሓ ብምተካእ: ነቲ ህዝብና ንዘመናት ዝግልገለሉ ዝነበረ ሕግታት ኣዕንይዎ ኢዩ። እዚ ሚኒስተር ፎዝያ ከም ጽቡቕ ባህልን ፈታሒ ጸገማትን ኣምሲላ ተቀናጅዎ ዘላ ኮማዊ ኣብያተ ፍርዲ: ደያኑ ናይቲ ኣብያተ ፍርዲ ብኣማሓደርቲ ስለዝምረጹ: ስለዝእዘዙን ብቅዓት ስለዘይብሎምን: ኣብ ዝወሃብ ብይን ብዙሕ ጸገማት ከምዝፍጠርን ኣብ ህዝቢ ሕንፍሽፍሽ ከምዝርአን: ኣብቲ ጉዳይ ፍልጠት ዘለዎም ሓቢሮም።

ነቲ ኣብ 1997 ዝተነድፈን ኣብ ተግባር ክውዕል ዝነበሮን ቅዋም ኤርትራ: ንውልቀ መላኺ ኢሳያስ ከም ድሌቱ ከይዕንድር ስለዝቆጻጸሮ: ኢሳያስ ቅዋም ዝብሃል የለን ሞይቱ ኢዩ ኢሉ ከምዘጎሓፎ ዝዝከር ኢየ።

እቲ መሰረታዊ ጉዳይ ብቅዋም ምምእዛዝን ስልጣንካ ንህዝቢ ምርካብን ንጉደኒ ገዲፍካ: ን27 ዓመታት ብዛዕባ ኣገዳስነት ኮማዊ ቤት ፍርዲ ምምዳር ድማ: ህዝቢ ንምድንጋርን ስልጣንካ ንምቅጻል ኣብ ጓል መንገዲ ግዜኻ ምሕላፍን ኢዩ።

ሚኒስተር ፎዝያ: ብዛዕባ ኣሰራርሓ ፍትሒ እንዶ ስለዘይብላን ፖለቲካዊ ጉዳያት ህግደፍ ካብ ዝህባ መደብ ወጻኢ: ብናጽነት ክትሰርሕ ዕድል ስለዘይውሃባን: ተግባሪት ሰንካም ፖሊሲታት መላኺ ኢሳያስ እምበር ተጣባቂት ፍትሒ ኣይኮነትን።

ሚኒስተር ፎዝያ: ከም ዓስቢ ጥልመታን እሺ ኢላ ንኢሳያስ ምምእዛዛን ድማ: መዘናታታን መሳርሕታን: ክእሰሩ: ካብ መዝነቶም ክባረሩ:  ክድስክሉ: ክስደዱን ካብ ሓደ ስራሕ ናብ ካልእ ሰራሕ ክከላበቱን እንከለው: ንሳ ግን ን25  ዓመታት ካብቲ ስማዊ ስልጣና ኣይተተንከፈትን።

ሚኒስተር ፍትሒ ምልካዊ ስርዓት ኢሳይያስ ፎዝያ ሃሺም ንኮማዊ ቤትፍርዲ ብዝምልከት ኣብ ኤርትራ እተካይዶ ዘላ ኣኼባታት፡ ምስ ምሕዳስ ርክብ ኤርትራን ኢትዮጵያን፡ ኣብ ውሽጢ ኤርትራ ፖለቲካዊ ለውጢ ክመጽእ ዘሕደሮ ትጽቢት ብዘይምምልኡ ክቑጣዕ ጀሚሩ ንዘሎ ህዝቢ ኣጉል ናይ ለውጢ ስምዒት ብምሕዳር ንምዝሕሓሉ ዝግበር ዘሎ ፕሮፖጋንዳዊ ዕላማ ዘለዎ ምንቅስቓስ ምዃኑ “ውን ክፍለጥ ይግባእ።

ኣብ ርእሲ `ዚ፡ ነቲ ውልቀመላኺ ኢሳይያስ ቅዋም ኤርትራ ከይትግበር ኣጊዱ፡ ነጻ ላዕለዋይ ቤትፍርዲ ከይህሉ ዓንቂጹ፡ ዜጋታት ብዘይፍርዲ ዝእሰሩሉ ኣማኢት ኣብያተ ማእሰርቲ ኣባዚሑ ኣብ ሃገርና ዘንገሶ ፋሉላዊ ምሕደራ ተኸቲሎም እቶም ከም መሳፍንቲ ኲናት (ዎር ሎርድስ) ኮይኖም ዝንቀሳቀሱ ኣዘዝቲ ሰራዊትን ትካላት ጸጥታን በብወግኖም ኣብ ዝኸፈቱዎ ኣባያተ ማእሰርቲ ህዝቢ እናሳቐዩ፡ ብዛዕባ ኮማዊ ፍርድን ሕግን ምዝራብ እንጣጢዕ ንዘርእ ኣለና ምዃኑ ህዝቢ ኤርትራ ድሮ ተገንዚቡዎ ኣሎ።

ኣብ ኤርትራ ፍትሒ ክነገስ እንተደኣ ኮይኑ ቅድሚ ኹሉ ምልካዊ ስርዓት ኢሳይያስ ፈሪሱ ኣብ ልዕልና ሕጊ ዝኣምን ሕጋዊ ቅዋማዊ ስርዓት ክትከል ኣለዎ።