ሚኒስተር ዜና ኤርትራ ነበር ዓሊ ዓብዱ፣ ኣብ 2012 ዓመተ ምህረት ንምልካዊ ስርዓት ኢሳይያስ ድሕሪ ምርሕርሑ፣ ዑቕባ ንምሕታት ናብ መንግስቲ ኣውስትራልያ ኣብ ዘቕረቦ ሰነድ፣ ሜጀር ጀነራል ፍሊጶስ ወልደዮሃንስ፣ ሜጀር ጀነራል ተኽላይ ሃብተስላሰ፣ ብሪገደር ጀነራል ተኽለ ልብሱ (ወዲ ልብሱ) ዝኣመሰሉ ላዕለዎት ኣዘዝቲ ሰራዊት ኤርትራ፣ ኣብ ኤርትራ ለውጢ ንምምጻእ ንኢሳይያስ ብወተሃደራዊ መንገዲ ካብ ስልጣን ንምውራድ እማመ ኣቕሪቦም ከምዝነበሩን ምስኡ ከምዝተመያየጡሉን ገሊጹ።

ዓሊ ዓብዱ ኣብቲ ኣብ ኢንተርነት ተዘርጊሑ ዘሎ ሰነድ ሕቶ ዑቕባ፣ ኢሳይያስ ንሲቪል ህዝቢ ክሳብ ደቂ 75 ዓመት በልማማ ንምዕጣቕ ዝወሰዶ ውሳኔ ንብዙሓት እንተላይ ኣዘዝቲ ሰራዊት ኣቖጢዑ ከምዝነበረ የመልክት።

ንሱ ኣብቲ 11 ገጻት ዝሓዘ ሰነድ፣ ምልካዊ ስርዓት ኢሳይያስ ብብልሽውና ዝተቛማጥዐ ምዃኑ፣ ከም ብዓል ብሪጋደር ተኽለ ማንጁስ ዝኣመሰሉ ነዚ ናይ ህዝቢ ጃምላዊ ምዕጣቕ ዝለዓለ ሓላፍነት ተዋሂቡዎም ዝነበሩ ኣዘዝቲ ዝርከቡዎም ሰበስልጣን ኣብ ምስግጋር ኤርትራውያን (Human Trafficking) ተዋፊሮም ከምዘለዉ ‘ውን ይጠቅስ።

ኣብ 2012 ኣብ ኣውስትራልያ ዑቕባ ዝሓተተ ሚኒስተር ዜና ነበር ዓሊ ዓብዱ፣ ብዛዕባ እዚ ዝተጠቕሰ ፍጻሜታት ዛጊት ወግዓዊ መግለጺ ኣይሃበን። እዚ ንሕቶ ዑቕባ ኢሉ ናብ መንግስቲ ኣውስትራልያ ኣቕሪቡዎ ተባሂሉ ዝእመነሉ ሰነድ ኣብ ኢንተርነት ተዘርጊሑ ‘ሎ። ኣብ ቀጻሊ ሰፊሕ ትርጉሙ ከነቕርበልኩም ክንፍትን ኢና።