ሚኒስተር ትምህርቲ ውልቀ መላኺ ስርዓት ህግደፍ ኣቶ ሰመረ ርእሶም፡ እቲ ኣብ መንጎ ኤርትራን ኢትዮጵያን ዝጸንሐ ኩነተ ኣይሰላም ኣይኩናት፡ ጽላት ትምህርቲ ንኽዳኸም ሓደ ካብ ቀንዲ ጠንቂ ከምዝኾነ  ንፈለማ እዋን ወግዓዊ መግለጺ ብምሃብ ተኣሚኑ።

ብተንኮል፡ ጥልመትን ፍትወተ ነብስን ሓደ ካብ የማናይ ኢድ ውልቀመላኺ ኢሳያስ ምዃኑ ዝእመነሉ ሚኒስተር ሰመረ፡ ብኣጋጣሚ’ቲ ብ29 ነሓሰ ዝተኸፍተ ዓመታዊ ገምጋም ንጥፈታት’ቲ ሚኒስትሪ ኣብ ዝሃቦ መግለጺ፡ ውጽኢት ትምህርቲ ካልኣይ ደረጃ ኣብያተ ትምህርቲ ዋላ’ኳ ምስ ዝሓለፈ ዓመት ብምንጽጻር፡ ኣብዚ ዓመት’ዚ እወታዊ ምዕባለ እንተርኣየ፡ ብሰንኪ ኩነተ ኣይሰላም ኣይኩናት ዓበይቲ ድኻማት ከምዘለዎ ሓቢሩ።

መግለጺ ሚኒስተር ሰመረ ዋላ’ኳ ነቲ ስርዓት ህግደፍ ብዶብ ኣሳቢቡ ዝወልዖ ኩናትን ንሱ ዘስዓቦ ማሕበረ ቁጠባዊ ሰለሎን ብወግዒ ምእማኑ ዘይልሙድን ነቲ ውልቀ መላኺ ኢሳያስ ኣብ ኣስመራን ኢትዮጵያን፡ “ኣብ ዝሓለፈ 20 ዓመታት ዝኸሰርናዮ የለን“ ኢሉ ዝሃቦ ምድርን ሰማይን ዘጣብቅ ሓሶት ዝጻረር እንተኾነን፡ ጠንቂ ምድኻም ጽላት ትምህርቲ ኤርትራ ብኣውራኡ ስርዓት ህግደፍ ክኽተሎ ዝጸንሐን ገና ዝቅጽሎ ዘሎን ኣዕናዊ ምሕደራ ምዃኑ ግን ኣይተናዘዘን። እቲ ካብ ኩሉ ዘስደምም ድማ፡ ሚኒስተር ሰመረ ከይሓፈረ፡ ሓድሽ መስርሕ ሰላም ኤርትራን ኢትዮጵያን ብቁዓት ዜጋታት ኣብ ምኹስኳስን ራኢ ሃገር ኣብ ምዕዋትን ዓቢ ኣስተዋጽኦ ከምዝህልዎ ብምጥቃስ፡ ነቲ ውልቀ መላኺ ኢሳያስ ምስ ሰበስልጣን ኢትዮጵያ ኣብ ዝተረኸበሉ ዝሃቦ ናይ ተመላኽነት፡ ክሕደት፡ ምሻጥ ሃገርን ተመሻኻኒ መግለጺታት ኣኮማሲዕዎ።

ኣብ ኤርትራ፡ ካብ 1994 ጀሚሩ መንእሰያት ኣብ ክንዲ ኣብ ትሕቲ ወለዶም ኮይኖም፡ እኹል መሳለጥያ ኣብ ዝርከበሉን ምሉእ ኣድህቦ ኣብ ዝገብሩሉን ምቹእ ባይታ ትምህርቲ ዝፍጠር፡ ብስም ሃገራዊ ኣገልግሎት ኣብ ሳዋ ብምዕስካር ብረት ተሓንጊጦምን ብእሙናት ወተሃደራት ህግደፍ  እናተሓለዉን ምስ ከቢድ ስራሕን ስለዝመሃሩ፡ ብደሞዝ ዘይብሎምን ትሑት መንፈስ ናይ ምምህርና ብዘለዎም መምሃራን ስለዝእለዩን ናይ ትምህርቲ ባህጎም ባይታ ከምዝዘበጠን ኣብ ዕለታዊ መነባብሮኦም ማእለያ ዘይብሉ ዕንቅፋታት ከምዘጋጥሞም ኩሉ ዝፈልጦ ሓቂ። ብተወሳኺ ተማሃሮ፡ መሕለፊ ነጥቢ ኣይረኸብኩምን ተባሂሎም ኣብ ዕስክርና ስለዝጽመዱን ትምህርቶም ወዲኦም ዕድላት ስራሕ ስለዘይረኽቡን፡ ስደት ክመርጹ እምበር ኣብ ሃገሮም ቅሱን ህይወት ክመርሑ ተስፋ የብሎምን።