ንኹሉ ኣብ ደምበ ተቓዉሞ ዝርከብ
ውድባት ሰልፍታት ሲቪክ ማሕበራትን

ክቡራት ተቓወምቲ፡

ኣብ ስደት ዝርከብ ኤርትራዊ፡ ድምጺ ፎርቶን ጠለባቱን ምስ ሰምዐ፡ ሽዑ ንሽዑ፡ ተቐቢሉ ብጻያዊ መልሲ-ተግባር ሂቡ እዩ። ደገፉ ክገልጽ ብሓባር ሰሚሩ ኣብ ጽርጊያታት ፈሲሱ። ኮይኑ ኸኣ፡ ኣብ ወጻኢ ሃገራት ዝርከብ ተቓላሳይ ዜጋ፡ “ፎርቶ ኣስሚራትና ኣላ፡ ብኣኣ ንቐጽል” ክብል ይስማዕ። ተቓዉሞና ብሓደ መዓልትን ኣብ ሓደ ስፍራን ብሓባርን ክድምዕ ይውዕል ኣሎ ብማለት ከኣ፡ ፍናኑን ሞራሉን ላዕሊ ሰጊዱ ይርከብ።
ሰላማዊ ተቓዉሞ ኣብ ዘሎናዮ ስፍራ ስደት ክሳብ መጨረሽትኡ ክንጽንቅቖ ይድለ። እቲ ኣብ ሃገር ስደት ኮንካ ክግበር ዝከኣል ቃልሲ ዝንዓቕ ዘይኮነስ፡ ኣድማዒ እዩ። ነዚ እንተድኣ ብትብዓት ሰሪሕናሉን ተወፊናሉን፡ እዚ ስርዓት እዚ ዓንዲ-ሕቖኡ ከም ዝስበር ንፈልጥ ኢና።
እዚ ሰላማዊ ሰልፍታት እዚ መቓልሕን ውጽኢትን ናይ ስርሒት ፎርቶን ንነዊሕ ዓመታት ዝጸንሐ ተቓዉሞን እዩ። ስሙር ጉዕዞ፡ ስሙር ምንቅስቓስን ስራሕን ዘምሓላልፎ መልእኽቲ ሓያልን ኣድማዕን ምዃኑ ኸኣ ብግብሪ ኣብ ኩለን ዓበይቲ ምዕራባውያን ከተማታት ተራእዩ።
ልዕሊ ኹሉ ኸኣ፡ ነታ ኣብ ገድሊ ካብ ዝጽንበር ኣትሒዙ ካብ ፈንጂ ንላዕሊ ዝፈርሓ፡ ስምረት ኤርትራውያንን፡ እተስዕቦ ኣድማዒ ናይ ሓባር ስጡም ቃልስን፡ መንእሰያት ምስ ኣያታቶምን ኣቦታቶምን ኣዴታቶምን ኣትኪሎም ስለዝሓዝዋ፡ ናይ ሞት ጻውዒት ኮይና፡ ነቲ ሽፍታዊ ስርዓት ካብ ስፍራኡ ከምዘይወጽእ ገይራቶ ኣላ።
ደለይቲ ሰላምን ፍትሕን ለውጥን ዝኾንና ኤርትራውያን ዜጋታት ነዚ ሽፍታዊ ስርዓት ንምጉሓፍን፡ ተጠርኒፍናን ሰሚርናን መልእኽትና ከነቃልሕ ብምብቃዕና፡ ንቃልሲ ተቓዉሞ ኣብ ሃገራት ስደት ኣንሂርዎን ሓይሊ ሂብዎን ኣሎ። ነዚ ስራሕ እዚ ዝያዳ ከነማዕብሎ ናይ ኩላታና ተራ ይጥለብ ኣሎ።
እዚ ኣብ ዋሽንግተን ዲሲ ንግንቦት 24 ተመዲቡ ዘሎ ሰላማዊ ሰልፊ፡ ንኽዕወት ኩሉ ኣብ ደምበ ተቓዉሞ ዝርከብ ውድባት ሰልፍታት ሲቪክ ማሕበራት ጽዑቕ ጎስጓስ ንኽገብር፡ በዛ ሓጻር መልእክቲ እዚኣ ንላወበኩም።

ቅድሚ ኹሉ ንድሕነት ህዝቢ!!

ደላይ ፍትሕን ሰላምን ራህዋን ዝኾነ
ጎስጓስ ሽምግለ ንሰላማዊ ሰልፊ ዋሺንግተን ዲሲ