እቲ ሓበሬታ ከምዘመልክቶ፣ ብሰንኪ ‘ዚ ሓንቲ ብየመን ኣቢላ ኣስመራ ክትዓልብ ዝበረረት ነፋሪት ኣብ ኣስመራ ክትዓልብ ኳ እንተፈተነት ኣገልግሎት ስለዘይረኸበት ንየመን ተመሊሳ።

ኣብቲ እዋን’ቲ መዓርፎ ነፈርቲ ኣስመራ ጸልሚቱ ከምዝነበረ (መብራህቲ ከምዘይነበሮ) እቲ ሓበሬታ የመልክት።

እቲ ጸገም ኣብታ ነፋሪት ተሰቒሎም ዝነበሩ ተሳፈርቲ ብዝሃቡዎ ቃል ‘ውን ክረጋገጽ ክኢሉ።

ብቕድሚ ትማሊ፣ ብካይሮ ኣቢላ ኣስመራ ክትዓርፍ ዝነበራ ነፋሪት ‘ውን ብተመሳሳሊ ምኽንያት ጉዕዞኣ ናብ ኣስመራ ክትቅጽል ኣይከኣለተን።

እዚ ከም’ዚ ኢሉ ኸሎ፣ ኤጀንስታት ናይቲ ስርዓት፣ መንገዲ ኣየር ኤርትራ ኣብዚ ቅንያት ክትጅምር እያ ኢሎም ወረ ብምንዛሕ ንዓማዊል ትኬት ክሸጡ ከምዝቐነዩ ምንጭታት ሓቢሮም።

መዓርፎ ነፈርቲ ኣስመራ፣ ነተን ንነዊሕ እዋን ኣገልግሎት ክህባ ዝጸንሓ መንገዲ ኣየራት ምእንጋድ ኣጊሙዎ ኣብ ዘለወሉ እዋን፣ ነታ ከም ‘ልቺ’ ህግደፍ፣ ኢሳይያስ ውልዕ ጥፍእ ዘብላ መንገዲ ኣየር ክትጅምር እያ ኢሎም ምውራዮም ተገራጫዊ እዩ።

ምልካዊ ስርዓት ኢሳይያስ፣ እቲ ገለ ኤርትራውያን ስድራቤቶም ዝበጽሑሉ ወቕቲ ክራማት ኣብ ዝቃረበሉ ግዜ ምስ ቅነ ጽምብል ናጽነት ሓዊሱ ክምዝምዞ ዝጸንሐ ገንዘብ ኤርትራውያን ናይ ምምዝማዝ ወቕቲ ከየምልጦ ዝገብሮ ዘሎ ሃርጎምጎም ምዃኑ እቶም ምንጭታት ኣገንዚቦም።

ቅድሚ ሽዱስተ ወርሒ ብኽራይ ዘምጽኡዋ መንገዲ ኣየር ኤርትራ ዝብል ጽሑፍ ዝነበራ ነፋሪት፣ ነቶም ትኬት ገዚኦም ዝነበሩ ገያሾ ኳ ከየአንገደቶም ደው ከምዝበለት፣ ትኬቶም ናብ ካልኦት መንገዲ ኣየራት ከሰጋግሩ ላዕልን ታሕትን ከምዝበሉ ይፍለጥ።