(በርሀ (ጄምስ) መሓረና ሙሉእ ሂወቱ ብሻዕብያ ዝተዓሸወን መስርሒ ዝኾነን ዘፍቅሮ ሓወይን ዓርከይን ስኢነ)

በርሀ ኣብቲ ሃብታም መሬት ጫዓሎ ካብ ርኹባት ቤተሰብ ዝተወልደ፣ መባእታዊ ትምህርቱ ካብ ቀዳማይ ክፍሊ ክሳዕ ራብዓይ ክፍሊ ኣብ ኳዓቲት ተማህረ፡፡ ንዝተወሰነ እዋን ኸኣ ትምህርቱ ኣብ ዓዲ ቀይሕ ምስቀጸለ ትምህርቱ ብምቁራጽ ናብ ኣስመራ ብምኻድ ኣብ ከባቢ ቃኘው ስቴሽንን ውሩያት ናይ ሳዕስዒት ክለባትን ፍሉጥ መንእሰይ ኮነ፡፡ በርሀ ቁመቱ ነዊሕ፣ ምዕሩጉን መልክዐኛን መንእሰይ ስለዝነበረ ንምርኡያት አዋልድ ምፍላጥ ገለ ጸገም ኣይነበሮን፡፡ በርሀ ብተውህቦ እተዓደለ መስሓቕን ተጸዋታይን ብምኻኑ ኣብ ኮፍ ዝበሎ ብብዙሓት ሰባት ተኸቢቡ ክትርእዮ  እተለምደ ኢዩ ኔሩ፡፡

በርሀ ናብ ሰሜን ኣሜሪካ ምስመጸ ብሰባት ዝፍቶን ኪኢላን ከምዝኾነ ዝተረድኡ ህዝባዊ ግምባር ኣብ ኩሉ ንጥፈታት ትሓባባሪ ክኸውን ኣባል  ስሩዕ ህዝባዊ ሓይልታት ገበርዎ፡፡ ቀጺሉ ድማ ኣብ ካናዳ ንሓደ ባንክ ንምዝራፍ ኣብ እተገብረ ዝፈሸለ ፈተነ ቀንዲ ተዋሳኢ ኮነ፡፡ ድሕሪ ምፍሻል እቲ ስርሒት  ድማ ናብ ጣልያን ብምውሳድን ንኣሜሪካ ንኽመጽእ ፍሉይ ደገፍን ምትሕብባርን ሻዕብያ ረኺቡ ኢዩ፡፡

በርሀ ምስብዙሓት ኤርትራውያን ተመሃሮ ሰሜን ኣሜሪካ  ገንዘብ ብምውጻእ ብሚሊዮናት ዝቑጸር ብምእካብ  ንሻዕብያ ብቁጠባዊ መዳያት እግሪ ክተክል ካብዝገበሩ ሒደት ኤርትራውያን ሓደ ኢዩ ኔሩ፡፡ በርሀ ኣብ እተፈላለየ እዋናት ከም ኣብቲ እዋን ዝነበረ መንእሰይ ጸገማት የጓንፎ ኔሩ፡፡ ነዚ ኩሉ ጸገማቱ በዲሁ ድማ ኣብ ሎስአንጀልስ ንኤርትራውያንን፣ ኢትዮጵያውያንን ከምኡውን ንኣሜሪካውያን ኣገልግሎት ዝህብ ዓቢ ሬስቶራንት ብምኽፋት ብንግዱ ኣዝዩ ጽቡቕ ይኸይድ፡፡ ኣብዚ ኩሉ ርክባቱ ምስ ሻዕብያ ከቋርጽ ይግብኦ ኔሩ ይብል፤ ነዚኣ ግን ክገብራ ኣይክአለን ኣይደለየን፡፡ እቲ ንግዱ ክኸስርን ውሉፍ ዘየድሊ ወልፍታትን ድራግን ኪኸውን ሽላታት ሻዕብያ ዓቢ ግደ ኔርዎም እብል፡፡ ድሕሪ ኣብ ክስራንን ወልፍታትን ምውዳቑ ንሜዳ ኪኸይድ ምስተነግሮ፣ ናብ ሜዳ ብምኻድ ናብ ጥዕናኡን ንቡር ሂወትን ምስ ተመልሰ ናብ ቀደም ስራሕ ንግዲ ምስተመልሰ ክልተ ደኳኹን ብምኽፋት ኣዝዩ ጽቡቕ ይኸይድ፤ ነታ ሓንቲ ድኳን ንጓሉ ከተማሕድራ ብምግባር ድማ ብጹቡቕ ከተካይዶ ትጅምር፡፡ በርሀ ብኣውራጃነት ኮነ ብእምነት ብዘይ ኣፈላላይ ንኹሉ ዘተባብዕን ኢዱ ዘርጊሑ ዝሕግዝን ለጋስን ጥዑምን ሰብ  ኢዩ ኔሩ፡፡ ኣነ ክሳዕ ዝፈልጦ ብዛዕባ ነፍስሄር በርሀ ካብቶም ብኣሻሓት ዝቑጸሩ ዘተባብዖም፣ዝሓገዞምን ጽቡቕ ዝወዓለሎምን  ሓደ ሰብ ብዛዕብኡ ዝጸሐፈ ኣይፈልጥን፡፡ ምናልባሽ እቲ ምስ እንዳ ሻዕብያ ዝነበሮ ስሙር ርክብ ንሕና ዘይንፈልጦ ብሰንኪ ሻዕብያ ዝተጋገዮ ነገር ይህሉ ይብል፣ ብዙሕ ዝፈልጦ የብለይን፡፡

ትኽ ትንፋስ ኢሳያስን ጀነራላቱን ዝነበረ በርሀ ካብ አሜሪካ ክሳዕ ዝጥረዝ ማእሰርቲ ምስ ኣጓነፎ እንታይ ጸገም ረኺቡካ ኣይበልዎን፡፡ ካብ ኣሜሪካ ንኽጥረዝ ምኽንያት ዝኾኖ፡ ሓደ ኤርትራዊ ብብደዔ ንኻሊእ ኤርትራዊ ክጸርፎ ምስ ሰምዐ ኣዝዩ ብምቑጣዕ ነቲ ተጻራፋይ ብቴስታ የንህሎ። ንበርሀ ኣነን ሓደ ሓውን ነገርካ ከየቃናዕካ ናብ ዓዲ ኣይትኺድ ንሕና ብሽምግልና ክንኣልዮ ኢና እንዳበልናዮ ኣመና ኣብ ሻዕብያ ይኣምን ስለ ዝነበረ ከይሰምዓና ንዓዲ አምርሐ፡፡ እቲ ተሃርመ ዕርቂ እናደለየ እቲ ዓቢ ሓዉ ዕጭ ሓንፈፍኩ ስርሑ ከርእዮ ኢየ እናበለ ክፍክር ይነብር፡፡ ግደፍ እንዳተባህለን እንዳተለመነን በርሀ ምስተመልሰ  ናብ FBI ሕሉፍ ታሪኹን ሰብ ሃሪሙ ተሰዊሩ ከምዝነበረን ብምንጋር ክእሰር ጌርዎ፡፡ ዳርጋ ኣብ ሎስኣንጀልስ ንበርሀ ዘይፈልጥ ኣይነበረን፤ ኣብ ጊዜ ማእሰርቱን ቤት ፍርዲ ምምልላሱን እንትርፊ ገለ ሾውዓተ ንኸውን የዕርኽቱ ዝመላለስ ሰብ ኣይነበረን፡፡ እዚ ንበርሀ ኣዝዩ የሕዝኖ ኔሩ፡፡ ብዙሕ እዋን መጽሓፍ ቅዱሱ የንብብን ብኡ ድማ ምጽንናዕ ይረክብ ከምዝነበረውን ነጊሩኒ ኔሩ፤ ካብ ማእሰርቲ ወጺኡ  ድሕሪ ንዓዲ ብክልተ ወተሃደራት ኣመሪካ ተዓጂቡ ምጥራዙ፡ ንጀነራላትን ሰብ ስልጣን ሻዕብያን  ኣብ ደቡብ ሱዳን፣ጁባ የካይደሎም ዝነበረ ብብዙሕ ዝቑጸር ትካላት ንግዲ ካብ እተጸበይዎ ንላዕሊ ዕዉት እኳ እንተነበረ ኣብ ደቡብ ሱዳን ዘጋጠመ ቅልውላው እቲ ልሙድ እቶት ምስጎደሎም ጻዕጻዕ ከብሎምን ካብ በርሀ ክደሊዎ ከም እተሃንደዱን ነፍሱ ትጭነቕ ከምዘላን ኣብ ኬንያ ንሓጺር እዋን ኣብ እተራኸብናሉ እዋን ኣተንቢሁለይ ኔሩ፡፡ ድሓር ኣብ ዓዲ ኣብ ወርሒ 11 2015 ምእሳሩ ሰሚዕና፡፡ እቲ ዘገርም ናብቲ እተጠረዘሉ ምድሪ ዳግም  ከምእተመልሰ ኣምሲልካ ምቕራብ እዩ፡፡  በዚ ይኹን በቲ ኣብታ ብዙሕ እተቐመጠላን ብዙሕ ዝረኣየላን ሃገረ ኣሜሪካ ክኣ ሐመድ ለቢሱ ተባሂሉ፡፡ እዚ ሕንቂልሒንቂሊተይ ሓቁ ክሳብ ዝወጽእ ንጊዜ ንግደፎ፡፡ እቲ በላዕ ሕድርን፣ ነውራምን መንግስቲ ህግደፍ ይትረፍዶ ንሬሳ ንብሂወት ዘለዉ’ውን ክብርን ኣፍልጦን ዘይህብ፤ ነቶም ብዘይ ነግፈረግ ተወፍዮም ገዛእ ርእሶም ኣሕሊፎም ዝቖምሉ ከዳዕን ጠላምን ምኳኑ ኣብ እዋን  ብረታዊ ቃልስን ድሕሪ ነጻነትን ደጋጊሙ የግህዶ ከምዘሎ ኢና ነስተብህል፡፡ ናይ ቀረባ እዋን ሕሉፍ ታሪኽ ናይዝጊ ጭቡጥ ኣብነት ኢዩ፡፡ ሕጅስ  ኣይኣክልንዶ፧

በርሀ ንዱሩዕ፣ንሸሪፎ፣ንበራኽን ንወዲ ሰለሙንን ካልኦትን ብዙሕ እዋን ሕንቕንቕ እንዳበለ ይዝክሮም ኔሩ፡፡ ንገዛእ ርእሱ ግን ኣብ መራሕቲ ኤርትራ ትምክሕትን እምነትን ስለዝነበሮ ሓደ መዓልቲ ህግደፍ ብሞቊሕ ተኣሲሩ ድሕሪ ሓሙሽተ ወርሒ ሂወቱ ከምእትሓልፍ ፈጺሙ ኣይገመተን፡፡

ንናይ ልዕሊ  ሳላሳ ዓመታት ዓርከይን ሓወይን በርሀ ኹሎም ቤተሰብን፣ዝፈትዋ ጓሉን ብዓልቲ ቤቱን  ናፍቆት ኣብኦም ዘይጸገቡ ውሉዱን ዓቢ ሓዉን  ፈተውትን ኣዕሩኹን  እቲ ንኢዮብ ዝደበሰ ኣምላኽ ይደብስኩምን የጸናናዓኩምን፡፡

ዶ/ር ምስግና ገ/ መድህን