መንግስቲ ኢትዮጵያ ብምኽንያት ጃምላዊ ቅትለት ናይቶም ብዘይካ ክርስትያናዊ ሃይማኖታዊ እምነቶም ካልእ ገበን ዘይነበሮም ብጥሩፍ እስላማዊ ጉጅለ ISIS ኣብ ሊብያ ብዘስካሕክሕ ኣረሜናዊ ኣገባብ ብኻራሩ ተጎይሖም ብብረት ብትሕዞ ዝተረሸኑ 28 መሳኪን ኢትዮጵያውያን ስደተኛታት ሰለስተ መዓልቲ ዝጸንሕ ናይ ሓዘን ቅነ ኣዊጁ።

መንግስቲ ኢትዮጵያ እቶም ግዳያት ኩሎም ኢትዮጵያውያን ምዃኖም ከምዘረጋገጸ ‘ውን ብመርበብ ሓበሬትኡ ዋልታ ኢንፎርሜሽን ሰንተር ሓቢሩ።

ከም ምልክት ሓዘን ናይቶም ግዳያት ኣብ ኢትዮጵያን ኣብ መላእ ዓለም ኣብ ዝርከቡ ኤምባሲታት ‘ታ ሃገርን ባንዴራ ኢትዮጵያ ናብ ፍርቂ ዘንጊ ለጠቕ ኢላ ከምእትቕኒ  ተፈሊጡ ኣሎ።

ማዕረማዕረ ‘ዚ፣ ኢትዮጵያውያን ኣብ ህዝባዊ መራኸቢታት ኢንተርነት ዝተሰመዖም ከቢድ ስንባደን መሪር ሓዘንን ይገልጹ ኣለው።

ፓርላማ ኢትዮጵያ ህጹጽ ኣኼባ ክገብር ምዃኑ ‘ውን ኣብ ቢቢሲ ዝረኸብናዮ ሓበሬታ ይጠቅስ።

ሕብረት ኣፍሪቃ፣ ሕብረት ኤውሮጳን ኣመሪካን ድሮ ምስ ኢትዮጵያ ዘለወን ምድንጋጽ ገሊጸን።

መርበብ ሓበሬታ ኣሰና፣ ተኻፋሊት ሓዘን ህዝቢ ኢትዮጵያ ምዃና እናገለጸት፣ ንቤተሰብ ግዳያት ጽንዓት ይሃብኩም ትብል።