መንግስቲ ኢትዮጵያ ኣብ ሰሜን ምዕራብ እታ ሃገር ኣብ እትርከብ ከተማ መተማ 200 ነጋዶ ሰብ ከምዝኣሰረ ጋዜጠኛ ቢ.ቢ.ሲ ካብ’ቲ ቦታ ሓቢሩ፡፡

ንሱ ንኣመሓዳሪ እታ ምስ ሱዳን እትዳወብ ከተማ ብምጥቃስ ኣብ ዝሃቦ ሓበሬታ፡ በታ ከተማ መብዛሕትኦም ኤርትራውያን ዝርከብዎም ስደተኛታት ናብ ሱዳን ከምዝሰግሩ ገሊጹ፡፡

እቶም ስደተኛታት ኣብ ጉዕዞኦም ንሞትን መከራን ከምዝቃልዑ ብምምልካት ድማ፡ መንግስቲ ኢትዮጵያ ንነጋዶ ሰብ ንምቁጽጻር ጽኑዕ ስጉምቲ ክወስድ ከምዝጀመረ ኣፍሊጡ፡፡

ብዘይካ’ዚ ብማዕከናት ዜና ሰባት ኣብ ጉዕዘኦም ዘጋጥሞም ጸገምን ሳዕቤን ዘይሕጋዊ ምስግጋርን ብዝምልከት  ኣስተምህሮ ከምዝህብ ‘ውን ተገሊጹ፡፡  ኣብ ልዕሊ ነጋዶ ሰብ ክሳብ ሞት ዝበጽሕ መቕጻዕቲ ክውስን ኣብ ባይቶ እታ ሃገር ከምዝተዘየሉ ቢ.ቢ.ሲ ብተወሳኺ ሓቢሩ፡፡

መንግስቲ ኢትዮጵያ ብፍላይ እቲ ኣብ ልዕሊ ኣመንቲ ክርስትና ዜጋታቱ ኣብ ሊብያ ብ ISIS ኣብ ወርሒ ሚያዝያ ዝተወስደ ጃምላዊ ማሕረዲ ከምዚ ዝኣመሰለ ተሪር ስጉምቲ ክወስድ ከምዝደረኾ ቢቢሲ ይእምት።

እንተኾነ እቶም ሽዑ ብ ISIS ዝተጎይሑ ኣመንቲ ክርስትና ዝበዝሑ ኤርትራውያን ከምዝነበሩ ካብቲ ኩነታት ዘምለጡ ውጻእ መዓት ኤርትራውያን ንድምጺ ኣሰና ብቓሎም ኣብ ዝሃቡዎ ምስክርነት ኣረጋጊጾም እዮም። ኣብቲ እዋን ‘ቲ ካብ ዝተሓርዱን ዝተረሸኑን ልዕሊ 50 ንጹሃት ዜጋታት እቶም ዝበዝሑ ማለት ልዕሊ 40 ኤርትራውያን ክኾኑ ከለዉ፣ እቶም ኢትዮጵያውያን 8 እዮም ነይሮም።

ኣብቲ ግዜ እቲ ህዝቢ ኢትዮጵያ፣ ኣብ ጎደናታት ውጺኡ ብሕርቃን ነቲ ኣረሜናዊ ግፍዒ ብምዅናን መንግስቱ ስጉምቲ ክውሰድ ክጽውዕ ከሎ፣ እቲ ኣውራ ግዳይ ዝኾነ ህዝቢ ኤርትራ ብምልካዊ ስርዓት ኢሳይያስ ተመሳሳሊ ዕድል ምንፋጉ ከይኣክል፣ እቶም ኣብ ዶባት ኤርትራ ዘለው ኣዘዝቲ ሰራዊት ምስ ነጋዶ ሰብ ብምምሽጣር ካብ ነፍስወከፍ ሰብ 6 ሽሕ ዶላር እናመንዝዑ ሰባት ናብ ሱዳንን ኢትዮጵያን ከምዘስግሩ ጸብጻባት የመልክቱ፡፡

Source: BBC – How Ethiopia has cracked down on people smugglers