ምዕጻው ቤት ጽሕፈት ኤምባሲ ኖርወይ ኣብ ኤርትራ፡መኸተምታ ሓደ ምዕራፍ ዲፕሎማስያዊ ዝምድና ኤርትራ ኖርወይን ከምዝኾነ ምንጭታት ገሊጾም።ወግዓዊ ዲፕሎማስያዊ ዝምድና ኖርወይን ኤርትራን ቅድሚ 20 ዓመት ተመስሪቱ።እንተኾነ ኣብ 70ታትን 80ታትን ህዝባዊ ግንባር ካብ መንግስቲ ኖርወይ ዝተፈላለየ ሓገዛት ይምጠወሉ ከምዝነበረ ሰነዳት የመልክቱ።

ድሕሪ ናጽነት ድማ ኣብ ጥዕና፡ትምህርቲ፡ ምዕቃብ ኣካባብ ሕርሻን ካልእን መንግስቲ ኖርወይ ብሚልዮናት ዶላራት ዝትመን ሓገዝ ከምዝገበረ ይፍለጥ።

መንግስቲ ኖርወይ ኣብ ኤርትራ ዝነበረ ቤት ጽሕፈት ኤምባሲ ዝዓጸዎ  ኣገልግሎት ወጻኢ ብሓዲሽ ቅርጺ ከምዝሰርሕ  ንምግባርን ንረብሓ ኖርወይ ብኣድማዒ ንምፍጻም ከምዝኾነ ገሊጹ። ስርዓት ህግደፍ ኣብ 2011 መንግስቲ ኖርወይ ኩሉ ልምዓታዊ ንጥፈታት ከቃርጽ ዘቕረቦ ሕቶ እውን ነዚ ናይ ሕጂ ውሳነ ከምዝጸለዎ ይፍለጥ።

ብኻልእ ወገን ኣብ ኖርወይ ኣብ ዝሓለፈ ሹዱሽተ ኣዋርሕ 792 ኤርትራውያን ዑቕባ ከምዝሓተቱ ጸብጻብ ወጻኢ ጉዳያት እታ ሃገር ሓቢሩ።እዚ ኣሃዝ ኣብታ ሃገር ካብ ዝተፈላለያ ሃገራት ዑቕባ ካብ ዝሓተቱ  ንሶማልያ ተኸቲሎም ኤርትራውያን ዝበዝሑ   ከምዝኾኑ ተመዝጊቡ።