መንገዲ ኣየር ኤርትራ ዝመጽእ ዘሎ ረቡዕ 20 ሕዳር 2013 በረራ ደው ከተብል ምዃና ምንጭታት ኣሰና ካብ ኣስመራ ሓቢሮም።

ቀንዲ ምኽንያት ምቍራጽ ኣገልግሎት መንገዲ ኣየር ኤርትራ ሕጽረት ገንዘብ ምዃኑ እቶም ምንጭታት ብተወሳኺ ኣረዲኦም።

ብዙሓት ሃገራዊ ስምዒት ዝደረኾም ኤርትራውያን ክኢላታት ኣቭየሽን፣ ኣብ ወጻኢ ሃገራት  ዝነበሮም ዘተኣማምን ናይ ስራሕ ዕድላት ገዲፎም ናብ ኤርትራ ብምምጻእ ምዕቡል መንገዲ ኣየር ኤርትራ ከጣይሱ ተደጋጋሚ ፈተነታት ‘ኳ እንተገበሩ፣ ብሰንኪ ብልሹው ምሕደራ ናይቲ ንኹሉ ቁጠባዊ ንጥፈታትን ወፍርን ናይ ምቍጽጻርን ምዕብላልን ኣመል ዘለዎ ስሱዕ ምልካዊ ስርዓት ኢሳይያስ፣ ቀጻልነት ዘለዎ ዘተኣማምን ኣገልግሎት ምሃብ ስኢና፣ ነዚ 22 ዓመታት ናጽነት ውልዕ ጥፍእ ክትብል እያ ኣሕሊፋቶ።

እቶም ኣብ ወጻኢ ዝነበሮም ስራሕ ገዲፎም ሃገራዊ ኣበርክቶ ክገብሩ ናብ ኤርትራ ብህርፋን ዝኣተዉ ክIላታት ድማ ምቹእ ባይታ ተሓሪሙዎም፣ ተስፋ ቆሪጾም፣ ፈቖድኡ ክበታተኑ ከምዝተገደዱ ይፍለጥ።

እዚ ከም’ዚ ኢሉ ኸሎ፣ እቲ ቅድሚ ሕጂ ኣብ ኤርትራ ብናቕፋ ትኬት ምቝራጽ ዝቕበል ዝነበረ መንገዲ ኣየር ግብጺ፣ ብዶላር ጥራይ ክኸውን ከምዝወሰነ እቶም ምንጭታት ሓቢሮም።

መንገዲ ኣየር ሉፍታንዛ ናይ ኤርትራ ገልግሎትታ ንግዚኡ ደው ኣቢላ ከምዘላ ‘ውን ይፍለጥ።