ኣብ ነርወይ፣ ኣብ ከተማ ስታቫንገርን ከባቢኣን ዝርከቡ መንእሰያት፡ ሃገርና ካብዚ ብስርዓት ህግደፍ ወሪድዋ ዘሎ ከቢድ መዓት ሓራ ንምግባርር ኣብ ዝግበር ዘሎ ቃልሲ፡ ካብኦም ዝጥለብ ዘበለ ኩሉ ክገብሩ ድሉዋት ምህላዎም ከምዘረጋገጹ ብክፍሊ ዜናን ሓበሬታን ንደሞክራስያዊ ለዉጢ ስታቫንገር

ናብ ኣሰና ዝለኣኾ ዜና የገንዘብ። ብመሰረት’ቲ ሓበሬታ ንሳቶም  ኣብቲ ብሰንበት 3 ሕዳር፡ ንልዕሊ ሰለስተ ሰዓታት ዝወሰደ ሓባራዊ ዘተ ኢዮም ነቲ ተበግሶ ኣረጋጊጾሞ።።

ንሳቶም መንቀሊ እዚ ኩሉ ህዝብና ወሪድዎ ዘሎ ሕሰምን መከራን ስርዓት ህግደፍ ጥራይ ምኻኑ ብምስማር፡ እቶም ብምድንጋርን ብዝተፈላለየ ምኽንያትን ምስ’ዚ ስርዓት ወጊኖም ዘለዉ፡ ከምኡ’ዉን ነቶም ኣብ በቤቶም ብልኡምነት ንቕዝፈት ኣሕዋቶምን ኣሓቶምን ዝዕዘቡ ዘለዉ፡ በብዉልቆም ጎስጓስን ሓበሬታን ብምክያድ፡ ኣካል እዚ ናይ ለዉጢ መስርሕ ንኪኾኑ ኣበርቲዖም ክሰርሑ ከምዘለዎም ተሰማሚዖም።

ብዘይካ’ዚ እቲ ዝካየድ ቃልሲ ኣድማዕነት ንኽህልዎ፡ ተሳትፎ ደቀንስትዮ ንምዕዛዝ ፍሉይ ኣቓልቦ ሂቦም ክሰርሕሉ ከምዝግባእ መተሓሳሰቢ ቀሪቡ። ብተወሳኺ ሕግን ስርዓትን ዘለዎ ንኩሉ ክፉት ዝኾነ ማሕበር ንምቋም ድማ፡ ሓንቲ ንድፊ ዉሽጣዊ ሕጊ እቲ ማሕበር እትነድፍ ዓሰርተ ዝኣባላታ ኮሚተ ኣቒሞም።

ብዘይካ’ዚ እቶም መንእሰያት፡ ኣብ ንሓድሕዶም ዘሎ ፍቕርን ሓድነትን ንምትራር ዝተፈላለዩ ንጥፈታት ብምክያድ ንምድንፋዑ ኣድላዩ ከምዝኾነ`ዉን ተረዳዲኦም። በዚ ድማ ኣብ’ቲ ክግበር ብዛዕባ ዘለዎ ንጥፈታት፡ በቢሞይኦም ብምምቕቓል ኣበርክትኦም ከዕዝዙ ምኻኖም ቃል ኣትዮም።

እቶም መንእሰያት፡ ብስለትን ተጻዋርነትን ብዝመልኦ ኣገባብ ልዝቦም ድሕሪ ምክያድ፡ ኣብ ቀረባ ግዜ እንደገና ብምርኻብ፡ እቲ ቃልሲ ብዝበረኸን ብዝሓየለን ዉዳቤ ኪካየድ ተረዳዲኦም። ኣብ መወዳእታ ድማ ዝኽሪ እቶም ኣብዚ ዝሓለፈ ወርሒ ኣብ ላምፔዱሳ ዝጠሓሉ ልዕሊ 360 ዜጋታትና ብምክያድ ኣኼብኦም ዛዚሞም።

ብዘይካ እዛ ሕጂ እትቆዉም ዘላ ንመንእሰያት ጥራሕ ዘካተተት ማሕበር፡ ምስታ ኣቐዲማ ብገዳይም ተቓለስቲ ንደሞክራስያዊ ለዉጢ  ዝቖመት ማሕበር ምሕዝነት ኤርትራዉያን ኖርወጃዉያን ብዉህደት ንቓልሶም ከምዝድርዕዎ ‘ውን ኣረጋጊጾም ኣለዉ።