መርበብ ሓበሬታ ቢቢሲ፣ ንህቡብነት ናይታ ዮሃንስ ትካቦ (ወዲ ትካቦ) ንስርዓት ህግደፍ ድሕሪ ምግዳፉ “ሓድነትና” ብዝብል ኣርእስቲ ዝዘየማ ሓዳስ ደርፊ ኣመልኪቱ “ናይ ቦብ ማርሊ ህሞት ደኾን’ዩ?” ክብል ኣብ ዘቕረቦ ዓንቀጽ፣ “ንመንግስቲ ኢሳይያስ ኣፈወርቂ ዝነቅፍ ዝመስል ናይ ተቓውሞ ደርፊ ሙዚቀኛ ‘ታ ንእሽቶ ሃገር ኤርትራ ኣብ ‘ዩትዩብ” ዋዕዋዕታ ፈጢሩ” ክብል ጽሒፉ።

መርበብ ሓበሬታ ቢቢሲ፣ ነታ ብ demo.archive.assenna.com ኣብ ዩትዩብ ዝተዘርግሐት ኣብ ሒደት መዓልታት ልዕሊ 100 ሽሕ ህርመት (ክሊክ) ዝረኸበት ደርፊ ምርኩስ ብምግባር ኣብ ዘቕረቦ ጽሑፍ፣ “ሓንቲ ካብተን ዝነኣሳን ኣዝዩ ጽዑቕ ቁጽጽር ዝግበረለንን ሃገራት ኣፍሪቃ ዝኾነት ኤርትራ፣ ወትሩ ናይ ተቓውሞ ደርፍታት ክንድዚ ዋዕዋዕታ ዝረኽቡላ ቦታ ኣይኮነትን። እንተኾነ፣ እዛ “ሓድነትና” ብዝብል ኣርእስቲ ስነጥበበኛ ዮሃንስ ወዲ ትካቦ ዘቕረባ፣ ህድእ ዝበለ ዜማን ሓያል ግጥምን ዘለዋ ደርፊ ግን ድሮ ልዕሊ 100 ሽሕ ህርመት ኣመዝጊባ ‘ላ።” ኢሉ።

ንሱ ኣብ ግጥሙ “ ክልተ ወለዶ መንእሰያት ከምዝሃለቐ ‘ሞ መዓስ ምስጢር ኮይኑ” ከምዝበለ ብምጥቃስ፣ ነቲ ብ “ገድሊ” ዝፍለጥ ናይ ሓርነት ቃልሲ ‘ውን ብትዝታ ከምዝዘከሮ ጽሓፋይ ናይቲ ዓንቀጽ ፖል ብራውን ይገልጽ።

እታ ደርፊ ብሰፊሑ፣ ከም ነቐፌታ ናይቲ ን20 ዓመት ኣብ ስልጣን ዘሎ፣ ንግህሰት ሰብኣዊ መሰላት ብዝምልከት ስርዓቱ ብልሙድ ኣብ ዝተሓተ ሰንጠረጃት ዓለም ዝስራዕ ኢሳይያስ ኣፈወርቂ ከምእትትርጎም እቲ ዓንቀጽ የረድእ።