መርማሪ ኮምሽን ውድብ ሕቡራት ሃገራት ኣብ ግህሰት ሰብኣዊ መሰላት ኤርትራ ጸብጻቡ ዘቕርበሉ መዓልታት እናተቓረበ ኣብ ዝመጽኣሉ ዘሎ እዋን ብኡ መጠን ክቱር ጭንቀቱ እናዓረገ ዝኸይድ ዘሎ ምልካዊ ስርዓት ኢሳይያስ፣ ነቲ ጸብጻብ ንምቍንጻብ ካብ ህዝቢ ኤርትራ ክእክቦ ዝፈተነ ፌርማታት ምእካል ስለዝኣበዮ፣ ‘ግንቦት ሰባት’ ዝተባህለ ተቓዋሚ ውድብ ኢትዮጵያ ሎሚ ቕነ ኣብ ኣመሪካ ናብ ዘካየዶ ኣኼባ ወኪሉ ብምልኣኽ ኣባልት ናይቲ ተቓዋሚ ውድብ ኢትዮጵያ ፌርማታት ክቶዅቡሉ ብጥብቂ ኣብ ምልማን ወዲቑ።

ከምዚ ቀጺልኩም እትሰምዑዎ፣ ሓደ ካብ መራሕቲ ግንቦት ሰባት ኣብቲ ኣኼባ፣ ማሕበረሰብ ዓለም ነቲ እንኮ ደጋፊና ዝኾነ ስርዓት ንምድኻም ውዲት ኣብ ምእላም ይርከብ ከምዘሎ ጠቒሱ፣ ኩሎም ኣባላት ግንቦት ሰባት ፌርማኦም ክልግሱ ብጥብቂ ለሚኑ። እቲ ተቓዋሚ ውድብ ኢትዮጵያ ብወግዒ ብዘመሓላለፎ መምርሒ መሰረት ኣብ ዝተፈላለየ ኩርናዓት ዓለም ዝርከቡ ኣባላቱ፣ ንርእሱ ወሲኽካ፣ እቲ ምልካዊ ስርዓት ኣብ ዘካይዶ ዘሎ ዘመተ ምእካብ ፌርማታት ብምስታፍ ድሮ ፌርማኦም ከምዝሃቡ ብምርግጋጽ ከኣ፣ መድረኽ ነቲ ንምልካዊ ስርዓት ወኪሉ ፊርማ ኣባላት ግንቦት ሰባት ክልምን ዝመጽአ ሃይለ ዝተባህለ ወኪል ምልካዊ ስርዓት ኢሳይያስ ኣረኪቡዎ።

እቲ ኣብ ልዕሊ ሰብኣዊ መሰላት ህዝቢ ኤርትራ ዝፈጸሞ ገበናት ካብ ማንም ንላዕሊ ዝፈልጥ እኩይ ስርዓት፣ መጻርዪ ኮምሽን ውድብ ሕቡራት ሃገራት እቲ ስርዓት ገበናት ኣንጻር ሰብኣውነት ፈጺሙ ክኸውን ይኽእል እዩ ክብል ንዝበጽሖ መደምደምታ ንምጽራይ ዓሚ ቀጻሊ ተልእኾ ካብ ዝወሃቦ ኣትሒዙ፣ በቲ ኣብ ኣህጉራዊ መጋብኣያ ሕጊ ከሕትቶ ዝኽእል ጉዳይ ቅሳነት ስለዝሰኣነ ኣብ ከምዚ ዝኣመሰለ ፌርማ ናይ ምእካብ ናይ ዓቕሊ ጽበት ዘመተ እዩ ተዋፊሩ ጸኒሑ።

ከምቲ ኣብ ዜናታት ኣሰና ብተደጋጋሚ ዝሓበርናዮ፣ ብሕልፊ ኣብቶም ቅሱን ናይ ስደት ህይወት ዘይብሎም ኣብ ከም ብዓል ስዑዲ ዓረብ፣ ሱዳን እስራኤል ዝኣመሰሉ ሃገራት ንዝነበሩ ኤርትራውያን ታርጌት ገይሩ ካብ ኣብያተ ክርስትያናትን እንዳ ሻህታትን ፌርማታት ዘዋህልሉ ሃሱሳት ልኢኹ ዝገበሮ ጻዕሩ ስለዘይተዓወተ፣ ህዝቢ ኤርትራ ፎእ ስለዝበሎ ድማ እዩ ኣብ ምጽወታ ፌርማ ኢትዮጵያውያን ተቓወምቲ ወዲቑ።

እቲ ዓቕሊ ጽበቱ ምጽዋር ዝሰኣኖም ምልካዊ ስርዓት፣ ነዚ ክዝርጋሕ መዓልቱ ተቓሪቡ ዘሎ ጸብጻብ መርማሪ ኮምሽን ንምቍንጻብን ምድኻምን ኣብ ቀጻሊ ጋዜጣዊ መግለጺታት ተጸሚዱ ከምዘሎ ‘ውን ይፍለጥ።

ነቲ ደም ንጹሃት ኤርትራውያን ዝተጸየቐ ምልካዊ ስርዓት ቀለም ፌርማታት ከንጽሆ ዘይሕሰብ ኳ እንተኾነ፣ እቲ ብጭንቀት ተተኵሱ ዘሎ ርእሲ ምልካዊ ስርዓት ኢሳይያስ ክትኮስ ግን፣ ኤርትራውያን ደለይቲ ፍትሒ ኣብቲ ኣብ ን 23 ሰነ ኣብ ጀነቫ ዝካየድ ንመርማሪ ኮምሽን ዝድግፍ ነቲ ገበነኛ ስርዓት ዝዅንን ሰላማዊ ሰልፊ ተረኺቦም ግብራዊ ምላሽ ክህቡ ድምጺ ኣሰና ትጽውዕ።