እቶም ሊብያውያንን ኤርትራውያንን ዘይሕጋውያን ኣሰጋገርቲ ስደተኛታት፣ ናብተን ውሕስነት ዘይብለን ሰሙናዊ ካብ ክባቢ ትሩብሊ ተላዒለን ናብ ደሴት ላምቤዱዛ ዝጉዓዛ ጀላቡ ንኽሳፈሩ ኣቐዲሞም  1,200 ዩሮ (1,200 ፓውንድ) ክኸፍሉ ከምዝሓቱዎም ኢዩ ዝንገር።

ጋዜጣ ኮሪረ ዴላ ሴራ ዝተመልከቶም ጸብጻባት ቤት ፍርዲ ከምዝሕብሩዎ፣ እቶም ሻቡ ክኸፍሉ ዘይክኣሉ ድሒሮም ክኸፍሉ ከምዝኽእሉ ኢዩ ተሓቢሩዎም። እቲ ንሓሙሽተ ካብቶም ዘይሕጋውያን ኣሰጋገርቲ ቅድሚ ናብ ፍርዲ ምቕራቦም ኣብ ማሕቡስ ክጸንሑ ዝኣዘዘ ሰነዳት ከምዘረድኦ፣ ናብ ኤውሮጳ ድሕሪ ምብጽሖም እቶም ዘይሕጋውያን ኣሰጋገርቲ ጉልበቶም ወይ ውሽጣዊ ኣካላቶም ክጥቀሙሉ ኢዮም ወሲኖም።

ዳጃ ቲዝያና ኮኮሉቶ ዘቕረቦ ጽሑፍ ኩነታት ናይቶም ዕድኦም ክኸፍሉ ዝነበሮም ስደተኛታት ምስ ናይ ገላዩ ዝመሳሰል ምንባሩ፣ ናብ ካልኦት ገበነኛታት ጉጅለታት ክሽየጡ እውን ይኽእሉ ምንባሮም ይሕብር።

ኣብ ሮማ ኮይኑ ኣብቲ ዘይሕጋዊ ስራሓት ዝነጥፍ ዝነበረ ተሓዝ ገንዘብ ናይቶም ዘይሕጋውያን ኣሰጋገርቲ ሚኪኤል ብርሃነ ምስ ሃይለ ሰይፉ፣ ርእሶም ገብረም ሚኪኤል ሄኖክን ተስፋይ ባህታን ዝተባህሉ ኣከብቲ ገንዘብ ኮይኖም ይሰርሑ ምንባሮም ዝተነግረሎም ኣርባዕተ ካልኦት ኣብ መጀመርያ ናይዚ ዓመት ኣብ ትሕቲ ቀይዲ ከምዝኣተዉ ይፍለጥ።

ንሳቶም ኣባላት ናይ ሓደ ብዘይሕጋዊ ኣገባብ ስደተኛታት ንምእታው  ዝዓለመ ገበነኛ ማሕበር ተባሂሎም ኢዮም ዝኽሰሱ ዘለዉ።

ፖሊስ እዞም ሰባት ምስቶም ብጉዳይ እታ ዝሓለፈ ጥቅምቲ ኣብ ላምፔዱዛ ጥሒላ ህይወት 336 ሰባት ዘጥፍአት ጃልባ ተሓተቲ ዝኾኑ ዘይሕጋውያን ኣሰጋገርቲ ደቂ ሰብ ምትእስሳር ክህልዎም ከምዝኽእል ይጥርጥሩ።

ብመሰረት ሓበሬታ ኣህጉራዊ ውድብ ማይግረሽን ኣብዚ ዓመት 100,000 ስደተኛታት ናብ ሃገረ ጣልያን ክኣትዉ እንከለዉ 3,000 ዝኾኑ ኣብ መንገዲ ጥሒሎም ህይወቶም ስኢኖም።