መራኸቢ ብዙሃን ስርዓት ህግደፍ፣ ብዛዕባ ኩነታት ኢሳይያስ ካብ ምዝራብ ኣጽቂጡ ድሕሪ ምቕናይ፣ ብ 9 ጥቅምቲ ናብ ኢማራት ከምዝገሸ ሎሚ ረቡዕ 12 ጥቅምቲ ኣብ ራብዓይ መዓልቱ ኣብ ዝዘርግሖ ዜና ውልቀመላኺ ኢሳይያስ ምስ ልኡል ኣቡዛቢ ከምዝትራኸበ ምግላጹ፣ መቐጸልታ ናይቲ ምስ ዕረፍትን ስነስርዓት ቀብርን ኣምባሳደር ግርማ ኣስመሮም ተኣሳሲሩ ኩነታት ጥዕንኡ ንምሽፋን ከካይዶ ንዝቐነየ ጻዕሪ ዝፈጠረሉ መጻወድያን ደርበሽበሽን ንምምሕዳር ዝጀመሮ ተዋስኦ ምዃኑ ምንጭታት ሓቢሮም።

እቲ ኢሳይያስ ናብ ወጻኢ ኣብ ዝገሸሉን ዝምለሰሉን መዓልቲ ብኡ ንብኡ “ወጺኡ ተመሊሱ” ናይ ምባል ኣመል ዝነበሮ፣ ካብ ናይ ወጻኢ መገሻ ሓሊፉ፣ እቲ ኣብ ውሽጢ ሃገር ናብ ዞባታት ዝገብሮ ምብጻሕ ከይተረፈ ቀዳማይ ዜንኡ ዝነበረ መራኸቢ ብዙሃን ስርዓት ህግደፍ፣ ብ ሰንበት 9 ጥቅምቲ ማለት ስነስርዓት ቀብሪ ግርማ ኣስመሮም ኣብ ዝተኻየደሉ ዕለት ከምዝገሸ ኣምሲሉ ድሕሪ ኣርባዕተ መዓልቲ ምውራዩ፣ በቲ ምስ ልኡል ኣቡዛቢ ዘካየዶ ርክብ ንሕክምና ዘይኮነ ንስራሕ ከምዝገሸ ንምምሳል፣ ምስኡ ድማ ብሰንኪ ጻዕቂ መንግስታዊ ስራሕ ኣብ ስነስርዓት ቀብሪ ግርማ ከምዘይተሳተፈ ኣምሲሉ ንህዝቢ ንምቕሻሽ፣ ብሓደ እምኒ ክልተ ረጋቢት ንምራም ዝተማህዘ ጥበብ ምዃኑ ‘ውን እቶም ምንጭታት ብተወሳኺ ኣገንዚቦም።

ኣብዚ ዝሓለፈ ሒደት ዓመታት ብተደጋጋሚ ክንዕዘቦ ከምዝጸናሕና፣ ኢሳይያስ ነቲ ንጥዕናዊ ክንክን ናብ ወጻኢ ብፍላይ ድማ ናብ ማእከላይ ምብራቕ ዝገብሮ ቀጻሊ መገሻ፣ ምስቶም ኣብ ዝደለዮ ሰዓት ክረኽቦም ዝኽእል መራሕትን ኣሚራትን ሃገራት ዓረብ ከምዚ ዝኣመሰለ ካብ ዓራት ተንሲእካ ዝካየድ ናይ Door Step (ናይ ኣፋፌት ማዕጾ) ርከባትን ምልውዋጥ ሰላምታን፣ ክሰርሕ ከምዝቐነየ ኣምሲሉ ንህዝቢ ኤርትራ ክቕሽሽ ምጽንሑ ዝፍለጥ እዩ።

በዚ ኣጋጣሚ ንእግረ መንገድና ክንጠቕሶ እንደሊ ጉዳይ፣ ብተወራዘይቲ፣ ብፍላይ ድማ ብደገፍቲ ስርዓት ህግደፍን እቶም እናቖረሩን እናወሓዱን ዝኸዱ ዘለዉ ዕዉራት ኣፈቀርቲ ኢሳይያስን፣ ብተደጋጋሚ “እንታይ ‘ሞ ኢሳይያስ ሰብ እንድዩ እንተሓመመ እንተሞተ፣ ‘ስለምንታይ ዜና የድልዮ’ ” ክብሉ ዝስምዑ ምዃኖም እዩ።

መጀመርያ፣ እቶም ንኢሳይያስ ከም ኣምላኽ ዘምልኹዎ ዝነበሩ ከም ሰብ ኩሉ እቲ ንሰብ ዝበዝሖ ከምዘይንሕፎ ኣብ ምፍላጥ ደረጃ ምብጽሖም ንገዛእ ርእሱ ከምዚ ዝኣመሰለ ዜናታት ምስማዕ ዝፈጠረሎም ለውጢ ምዃኑ ዝከሓድ ኣይኮነን። ብቐንዱ ግን፣ ኢሳይያስ ከም ማንም ሰብ ዝሓምም ዝመውት ፍጡር ኳ እንተኾነ፣ ከም መራሒ ሓንቲ ሃገር፣ መራሒ ብመራሒኡ ድማ ንኹሉ እንትና ኤርትራ ዓፊኑ ኣብ ኢዱ ዝጨበጠ ገባቲ ውልቀመላኺ ከም ምዃኑ መጠን፣ ሕማሙን ሞቱን ካብ ናይ ዝኾነት ሕጋዊ ትካላትን ባይቶን ነጻ ጋዜጣን ዘለዉዋ ሃገር መራሒ ኣዝዩ ዝኸበደ ፖለቲካዊ ሳዕቤናት ስለዘለዎ ምክትታል ዘድልዮ እዩ። ኣሰና ድማ ሓደ ካብ ዕማማታ ነቲ ምልካዊ ስርዓት ኢሳይያስ ካብ ህዝቢ ክሓብኦ ዝደሊ ምስጢራት ምቅላዕ፣ ንኹነታት ኢሳይያስ ህዝቢ ክፈልጦ ምክትታልን ምሕባርን ሞያዊ ሓላፍነቱ ስለዝኾነ፣ እቶም ዕዉራት መፍቀርቱን ናይ ሳሎን ተወራዘይትን ይፍተዉዎ ይጽልኡዎ ሕጂ ይኹን ንመጻኢ ክንቅጽሎ ምዃና ነዘኻኽር።