ካብ ውሽጢ ኤርትራ ብዝተረኽበ ሓበሬታ መሰረት፡ መራሒ ስርዓት ህግደፍ ውልቀመላኺ ኢሳይያስ ኣፈወርቂ፡ ኣብ ልዕለኡ ክመጽእ ካብ ዝኽእል ዝኾነ ናይ ሰራዊት ተጻብኦ ንምድሓን ንብሪጋዴር ጀነራል ተኽለ ማንጁስ ናይተን ባዕሉ ዝዓለመን ሸውዓተ ክፍለሰራዊታት ኣዛዚ ገይሩዎ ኣሎ።

ፍሊጶስ ይኹን ካልኦት ኣዘዝቲ ሰራዊት ኣድላይነቶም ሃሲሱ ደስኪሎም ከምዘለዉ ዘለዉ ‘ውን እቲ ሓበሬታ ኣፍሊጡ።

ብኻልእ ወገን ኣብርሃ ካሳ ወላ’ኳ ወግዓዊ ሚኒስተር ጸጥታ እንተኾነ፡ ኣብዚ እዋን’ዚ ሓላፊ ሓለዋ ውልቀመላኺ ኢሳይያስ፡ ኮለኔል ተስፋልደት ከም ዘሓላፊ ጸጥታ ተመዚዙ ይሰርሕ ከም ዘሎ እቲ ሓበሬታ ብተወሳኺ ይገልጽ።

ኣብ ከምዚ ኵነታት፡ ወኪል ብርጋዴር ጀነራል ተኽለ ማንጁስ ኮይኑ ዘወሃህድ ዘሎ ብሪጋዴር ጀነራል ሓሊባይ ምዃኑ ድማ ተፈሊጡ ኣሎ።

እቲ ንዅሉ ምስጢር ክገብሮ ዝደሊ ኢሳያስ ብዛዕባዚ ዝኾነ ሓበሬታ ኣይሃበን ዘሎ። ዕላማ ናይዚ ስልቲ’ዚ ግን ንሓይልታት ምክልኻል ኤርትራ ብጸቢብ ንምቍጽጻር ተባሂሉ ከም ዝኾነ እቲ ሓበሬታ የረድእ።

ብኻልእ ሸነኽ፡ ኢሳይያስ ሕማሙ ስለ ዝበርትዖ ክልተ ግዜ ብዘይሓደ መግለጺ ናብ ቀጠር ክሕከም ከይዱ ከም ዝቐነየ ተሓቢሩ ኣሎ። ኢሳይያስ ጥዕናኡ ጽቡቕ ከም ዘየሎ ህዝቢ ኤርትራ ፈሊጡ’ኳ እንተሎ፡ ዛጊት ብድምጺ ሓፋሽ ይኹን ጋዜጣ ሓዳስ ኤርትራ ዝተዋህበ ዝኾነ መግለጺ የለን።