ብ31 ጥቅምቲ 2017 ኣብ ኣስመራ ምልካዊ ስርዓት ህግደፍ ንምቅዋም ዝተኻየደ ህዝባዊ ናዕቢ፡ ዘይንቡር’ኳ እንተኾነ፡ ህዝቢ ኤርትራ ክሳብ ክንደይ ሓሲምዎ ከምዘሎን ህግደፍ ፉንፉንን ጽሉእን ስርዓት ምዃኑ ዳግማይ ዘነጽር ፍጻመዩ። ምልካዊ ስርዓት ህግደፍ ከም ኣመሉ፡ ነቲ መሰሉን ክብሩን ንምርግጋጽ ብዓውታን ድፍረትን ድምጹ ዘስምዐ ሰላማዊ ህዝቢ፡ ብዓረር፡ ብማእሰርቲ፡ ብዱላን ሰደፍ ጠበንጃን ክምልሰሉ ምርኣይ ዘገርም ኣይኮነን። ብርግጽ እዚ ኣረሜናዊ ተግባር ንህዝቢ ኤርትራ ዘይግብኦ’ኳ እንተኾነ፡ ስርዓት ህግደፍ ዓምጻጺ፡ ርእይቶ ካልኦት ዘይቅበልን ወኪል ህዝቢ ኤርትራ ስለዘይኮነን፡ ወትሩ ካብ ቋንቋ ሰላም ቋንቋ ሓይሊ’ዩ ዝጥቀም። ስርዓት ህግደፍ፡ ብልሹውን ጨካንን ምምሕዳሩ ኣሚኑ ጠለባትን ሕሰምን ህዝቢ ኤርትራ ክግምግምን ፍታሕ ከናድን ኣብ ክንዲ ዝሰርሕ ምስ ኣተሓሳስብኡ ዘይቃዶን መሰለይ ዝበለን ኤርትራዊ፡ ”ከዳዕን ዘይሃገራውን” ዝብል ስም ብምጥማቅ’ዩ ዝጭፍልቆን ኣቃልቦ ህዝቢ ከምዘይረክብ ክገብሮ ዝፍትንን። ሎሚ’ውን ስርዓት ህግደፍ ከም ወትሩ ሓቂ ንምጥምዛዝ፡ መሰል ህዝቢ ንምጭፍላቅ ድሕር ከምዘይብልን ጸላኢ ህዝቢ ኤርትራ ከምዝኾነን ዳግም ኣረጋጊጹ’ሎ

እቲ ብ31 ጥቅምቲ 2017 ኣብ ኣስመራ ዝተኻየደ ተባዕ ህዝባዊ ተቃውሞ፡ ሕቶ መላእ ህዝቢ ኤርትራ’ምበር ሕቶ ውልቀ ሰብ ወይ ናይ ሓደ ሃይማኖት ጸገም ኣይኮነን። መቀጸልታ ናይቲ በብእዋኑ ንግዕዙይ ኣሰራርሓ ስርዓት ህግደፍ ንምቅዋም ብግህዱን ብሕቡእን ፈኸም ክብል ዝጸንሐ እምቢታን ቃንዛን መላእ ህዝቢ ኤርትራ’ዩ። መሰልን ክብረትን ህዝቢ ኤርትራ ክሳብ ዘይተረጋገጸን ዓማጺ ክሳብ ዘሎን ድማ፡ ተቃውሞ ህዝቢ፡ ሎሚ፡ ጽባሕን ድሕሪኡን ክቅጽል’ዩ። ኣብ ከምዚ ናይ ሞትን ሕየትን ቃልሲ፡ እቲ ብረት ዓጢቁ ድሕነት ሃገርን ህዝብን ከውሕስ ዝግብኦ ሰራዊትን ትካላት ጸጥታትን፡ ተኣማንነቱን ዕላምኡን ንህዝቢ ኤርትራ’ምበር፡ ነቲ ንህዝብና ዘንብዕን ዝቅንጽልን ዘሎ ጉጅለ ህግደፍ ስልጣን ዘናውሕን ዝሕብሕብን ክኽወን ኣይግባእን። ሰራዊት ኤርትራን ካልእ ዕጡቅን፡ ካብ ከርሲ ውጹዕ ህዝቢ ተወሊዱ፡ ስልጣን ስርዓት ህግደፍ ንምዕቃብ ብረቱ ናብ ወለዱን ኣሕዋቱን ዘቅንዕን ኣብ ጎደናታት ሰባት ዝሃድንን እንተኾይኑ፡ ጽባሕ ብታሪኽ ከምዝሕተት ክዝንግዖ የብሉን። እዚ ሎሚ ኣብ ስልጣን ዘሎ መላኺ ስርዓት ህግደፍ ድማ ብማዕበል ህዝቢ ምስተገለፈን ነበር ምስኮነን ቁሊሕ ከምዘይብሎ ክርዳእ ኣለዎ። ኣብ መራኸቢ ብዙሓን፡ ስርዓት ህግደፍ ዘዋፈሮምን ስሱዓትን ብገርሂ ዝተገርዙን ውሑዳት ኤርትራውያን፡ ነዚ ውጹዕ ህዝብና ዘስምዖ ዘሎ ኣውያት ለውጥን ፍትሕን ዘይመልክዑ ንምትሓዝን ህዝቢ ኤርትራ ንሓድሕዱ ንምንቋትን ዝዓለመ ስለዝኾነ፡ ኣእዳዎም ክእክቡን ስርዓት ህግደፍ ናቶም ከምዘይኮነ ክፈልጡን ኣለዎም። ኣብ ትሕቲ ስርዓት ህግደፍ፡ ህዝብና ብሓባር ይስደድ፡ ይጠሚ፡ መሰል ምዝራን እምነትን ይኽልከል፡ ይእሰር፡ ዝወለዶም ደቁ ኣብ ዕስክርና ይኽድሙ፡ መሰሉ ይርገጽ ስለዘሎ ጸላኢ መላእ ህዝቢ ኤርትራ’ዩ። ስለዝኾነ ድማ ህዝቢ ኤርትራ ብሓባር ክምክቶን ንሰንካም ኣናቋቲ ሜላታቱ ክነቅሓሉን ኣለዎ። ስርዓት ህግደፍ ኣብ እዋን ዕርበቱ ዝጥቀመሉ እከይ ተግባር፡ ህዝቢ ብሃይማኖት፡ ብኣውራጃ ከምዝፈላለን ንሓድሕዱ ከምዝጻላእን ምግባር’ዩ። ስርዓት ህግደፍ፡ ጸላኢ ኣብያተ ክርስትያንን መሳጊድን፡ ኣዕናዊ ናይ ብሕቲ ትካላትን ስድራቤታትን ስለዝኾነ፡ ኣብ ሕብረተሰብ ኤርትራ ክህሉ የብሉን። መፍትሒ ናይዚ ብስርዓት ህግደፍ ዝወርድ ዘሎ መዘና ዘይብሉ ኣደራዕን ሕስረትን፡ ስቅታን ስደትን ዘይኮነ፡ ኣሰር ተባዕ ስጉምቲ ቢተወደድ ኣብርሃን ኣቦይ ሓጂ ሙሳን ምስዓብን ንኽብረትካን መሰልካን ምስያፍን’ዩ። ንሱ’ዩ ነባሪ ታሪኽን ኩርዓትን።

ጽላል፡ ካብ ሕቡራት መንግስታት ኣመሪካ፡ 2 ሕዳር 2017

Subscribe ASSENNA YouTube to get Radio Assenna shows on time: