ሓደ ካብ ወደብ ካሌስ ናይ ፈረንሳ ናብ ዓዲ እንግሊዝ ክሰግር ዝፈተነ 20 ዓመት ዝዕድሚኡ ኤርትራዊ ስደተኛ መንእሰይ ብናይ ጽዕነት ባቡር ተረጊጹ ከምዝሞተ ዘ ጋርድያን ሓቢሩ።

ንሱ ናብ ትማሊ 30 መስከረም ኣብ ዝወግሐ ለይቲ እዩ ብ ኣባላት ጸጥታ፣ ኣብ ካሌስ ኣብቲ ብChannel tunnel ዝፍለጥ መንገዲ ባቡር ሞይቱ ተረኺቡ።

ኣብዚ ዝሓለፈ 2 ሰሙን ብተመሳሳሊ ሓደጋ ናይ ኣርባዕተ ስደተኛታት ህይወት ሓሊፉ ‘ሎ። ሓደ ካብቶም ኣቐዲሞም በቲ ዘሕዘን ሓደጋ ዝሞቱ ስደተኛታት ኤርትራዊ ድዩ ሱዳናዊ መረጋገጺ ዘይተረኽበሉ ግዳይ እዩ።

ኣብ ዝሓለፈ ቀረባ እዋን መንግስቲ እንግሊዝን ፈረንሳን ቁጽሪ ናይቶም ናብ ዓዲ እንግሊዝ ዝሰግሩ ስደተኛታት ንምጕዳል ዝወሰዱዎ ናይ ምሕጻር ስጉምቲ ቁጽሪ ናይቶም ናብ ዓዲ እንግሊዝ ክሰግሩ ዝፍትኑ ኳ ኣዝዩ እንተነከዮ፣ በንጻሩ ሓደጋ ሞት ስደተኛታት ወሲኹ ይርከብ።

እዚ መንገዲ እዚ ኤርትራውያን ስደተኛታት ናብ ዓዲ እንግሊዝ ንምእታው ብብዝሒ ዝፍትኑሉ መስሎዅ ምዃኑ ይፍለጥ።