ሓደ ካብ ላዕለዎት ሓለፍቲ ምልካዊ ስርዓት ህግደፍን እሙን ኣገልጋልን ዓርክን ውልቀመላኺ ኢሳይያስ ኣፈወርቅን ዝነበረ ኣቶ ናይዝጊ ክፍሉ ቅድሚ ክልተ መዓልታት ኣብ ለንደን ብሕማም ምኽንያት ከምዝዓረፈ ምንጭታት ሓቢሮም።

ንሱ ብሕማም ሽኮርያ ይሳቐ ከምዝነበረ ይፍለጥ።

ናዝይጊ ክፍሉ ድሕሪ ናጽነት፡ ብዝለዓለ ጽፍሒ ዘገልገለሎም ክፍልታት ከም ኣማኻሪ ፕረዚደንት ኣብ ሚኒስትሪ ዞባዊ ጉዳያት ህግደፍ፡ ከም ላዕለዋይ ሓላፊ ኣብ ውሽጣዊ ጉዳያት ከምኡ ‘ውን ሚኒስትሪ ዜና ክኾኑ ከለዉ፡ ኣብቲ ኣብ ሚኒስትሪ ዜና ዝጸንሓሉ ሓደ ዓመት፡ ኣብ 2001 ዓ.ም ንኹለን ጋዜጣታት ብሕቲ ኣዕጽዩ ኣሰናዳእተንን ጋዜጣኛታተን ዘእሰረ እዩ።  

ናይዝጊ ክፍሉ፡ ኣብ ግዜ ገድሊ ንናጽነት፡ ብፍላይ ኣብቲ ተጋደልቲ ብምስጢር ተኣሲሮም ዝግፍዑሉን ዝሓቁሉን ዝነበሩ ብሓለዋ ሰውራ ዝፍለጥ ክፍሊ ብዝነበሮ ገበናዊ ተራ ብዙሓት የልዕሉዎ።  ድሕሪ ናጽነት ‘ውን ነቲ ንኢሳያስ ከም የማናይ ኢድ ገበናዊ ስርሓት ምግልጋል ከምዝቐጸሎ ይንገረሉ።

ናይዝጊ ክፍሉ ኣድላይነቱ ብኢሳያስ እናተዳኸመ ምስ መጸ፡ ኢሳይያስ ከም ኣምባሳደር ህግደፍ ኣብ ዓዲ እንግሊዝ ኳ እንተመደቦ፡ ብሰንኪ ‘ቲ ዝነበሮ ገበናዊ ድሕረባይታ፡ መንግስቲ እንግሊዝ ንመደቡ ኣየጽደቐሉን።

ብድሕረባይትኡ ኣብ ጸጥታውን ገበናውን ስርሓት፡ ብፖሊስ ዓዲ እንግሊዝ ኣብ መርመራን ክትትልን ከምዝነበረ ‘ውን ይፍለጥ።