ሓደ ኣብ ሽወደን ዑቕባ ክሓትት ዝወጠነ ኢትዮጵያዊ፣ ኣብ ናይ ጽዕነት ክፍሊ ናይ ሓንቲ ካብ ኣዲስ ኣበባ ናብ ስቶክሆልም ዝበረረት ነፋሪት ኢትዮጵያ ድሕሪ ምርካቡ ብፖሊስ ሽወደን ተታሒዙ ሕክምናዊ መርመራታት ከምዝተኻየደሉ ቢቢሲ ሓቢሩ።

ከም ልሙድ እቲ ኣቑሑ ዝዕቀበሉ ክፍሊ ናይታ ነፋሪት ኣዝዩ ቆራሪ ኳ እንተኾነ፣ እቲ ካብ ኣዲስ ኣበባ ናብ ስቶክሆልም ኣብቲ ዘይንቡር ቦታ፣ በዚ ሳሕቲ ዝፍጸም ኣገባብ ንኣሽሓት ኪሎሜተራት ዝተጓዕዘ ኢትዮጵያዊ ብጥዕንኡ ከምዝተረኽበ እቲ ዜና የረድእ።

እታ ነፋሪት ኣብ ሮማ ንግዚኡ ዓሊባ ኳ እንተነበረት እቲ ኢትዮጵያዊ ግን ጉዕዙኡ ናብ ሽወደን ክቕጽል ከምዝመረጸ ተፈሊጡ።

ንሱ ኣብ መዓርፎ ነፈርቲ ኢትዮጵያ ከምዝሰርሕ ዘረጋግጽ መንቀሳቐሲ ዝሓዘ ክኸውን ከሎ፣ ኣብቲ ጽኑዕ ቁጽጽር ዝካየደሉ መዓርፎ ነፈርቲ ከምድላዩ ክንቀሳቐስ ዕድል ከምዝነበሮ፣ በቲ ዝጸንሖ ኣፍልጦ ኣብ ውሽጢ እቲ ናይ ጽዕነት ክፍሊ እንስሳታት ኣብ ዝጓዓዙሉ ምዉቕ ክፋል ተሓቢኡ ነይሩ ከኸውን ከምዝኽእል እቲ ሓበሬታ ብተወሳኺ ይእምት።