ካልኣይ – ክፋል

ሓበሬታን ጻውዒትን ንህዝብን ሰራዊትን ኤርትራ።

ከም ዝሓበርናዮ ካልኣይ ክፋል ሒዝና ቐሪብና ኣለና። ናይ ሎሚ ኣርእስትና ፖለቲካዊ ጸወታ ኤርትራን ጉዳይ  (ዴምህት) እዩ። ኢሰያስ ንደምክራስያዊ ምንቕስቓስ ህዝቢ ትግራይ ( ደምህት) ብወትሃደራዊ ዓቕሚ ምዕባይ፣ ከም ፖለቲካውን ጸጥታውን ሓይሊ ይጥቀመሉ ኣሎ። ምኽንያቱ ኢሰያስ ብሜላን ሚስጥራዊ ትእዛዝን፣ ኣጽዋርን መካይንን ምክልኻል ሰራዊት ኤርትራ ስሒቡ፣ ብተዘዋዋሪ ኣገባብ ን ደምህት ኣረኪቡዎም ኣሎ። እቲ ዘገርም ኢሰያስ ንህዝቢ ኤርትራ ኣብ ገዛእ ሃገሩ ብደምህት ከምዝድፈር ገይሩዎ ኣሎ። ደምህት ዝተረከቦ ንብረት ምክልኻል ኤርትራ፣ ናይ ኣመጻጽኡ ምንጪ፣ ዓይነትን ብዝሕን ብረት፣ ናይ ኣፈጽጻማ ኣገባቡን ዝብሉ ናይ ሎሚ ኣርእስትና’ዩ።

ኣብ ቀዳማይ ክፋል ጽሑፍና፣ ክልተ ዓበይቲ ዘሕዘነና እዋናዊ ጉዳያት ከም መበገሲ ወሲድና ነይርና። ቀዳማይ ስርዓት ኤርትራ ንክብሪ ዝሞቱ ዜጋታቱ፣ ንወለድን ቤተ-ሰብ መወቲ ሓዘኖም ንምጽንናዕ ፣ንክፋል ህዝብና ዝውክል ስነ-ምግባር ሓዘን ኣየኽበረን ሃገራዊ ግዴትኡ ኣይፈጸመን። መራሕ ሃገር ኣብ ተለቪጅን ወጺኡ ገለ ደቓይቕ ጽንዓት ይሃብኩም ኣይበለን። ባንዴራ ፍርቂ ክትስቀል ኣይኣዘዘን። ሬሳታት ዜጋታትና ኣብ ዓዶም ተመሊሶም ከምዝቀበሩ ኣይገበሩን። ኩሉ’ዚ መሰላት ብምጥሓሱ ስርዓት ኤርትራ ኣብ ልዕሊ ህዝቡ ዘለዎ ንዕቀትን ትዕቢትን ባህርያቱ ዝያዳ ኣግሂድዎ ኢልና ነይርና።

ምኽንያቱ መንግስቲ ንህዝቡ ወኪሉ፣ ንሕጊ ተኣማእዚዙ ናይ ምምሕዳር ስልጣን ጥራይ’ዩ ዘለዎ። ስለዚ ህዝቢ ኤርትራ ናቱ ክብሪ ኣለዎ። ምኽንያቱ ስለ ናጽነቱ፣ ንምውሓስ ልኡላውነቱ ከይተሓለለ ተቓሊሱ ካብ ሂወቱ ክሳብ ንብረቱ ወፍዩ። ብስደት ማሕበራዊ ምዝንባል ዝወረዶ ጉድኣት ተወሳኺ ዋጋ ዝኸፈለ ህዝቢ’ዩ። ደቂ-ኣንስትዮ ኤርትራ ነብሰን ወፍየን፣ ማሕጸነን ዘፍረዮ ውላደን ከፊለን። ገሊኤን ድማ ወርቐን ስልማተን ኣረኪበን። ኣብ ታሪኽ ኤርትራ በጃ ህዝብን ሃገርን ካብ ዝተሰዉኡ፣ ገለ ስድራ-ቤታትት ብፍላይ ጸኒቶም ዝናብዮም ስኢኖም ዘኽቲሞም ከምዘለዉ ታሪኽን ሰብን ዝምስክሮ ሓቒ’ዩ። ዕላማ ቃልሲ ህዝብን ኩቡር ዋግኡን፣ ፍትሒ ነጊሱ ደሞክራስያዊት ኤርትራ ተመስሪታ፣ ዜጋታታ ብሰላምን ቕሳነትን ክነብሩ ዝተኻየደ ቓልሲ’ዩ ነይሩ። ኢሰያስ ግና ኣየኽበሮን። ንኹሉ ታሪኻዊ ጅግንነት ህዝቢ ኪሒዱ መሰላት ረጊጹ ይኸይድ ኣሎ። ሰብኣዊ ሕልና ዘለዎ ኤርትራዊ ዘይቅበሎ ኣነዋሪ ተግባር ይፍጽም ኣሎ። ብጣዕሚ ዘሕዝን’ዩ።

ስለዚ ንሕና’ውን ከም ኩሎም ደለቲ ለውጢ፣ ዘይሕጋዊ ስርዓት ኤርትራ ዝጥቀመሉ ፖለቲካ ጸወታን ዝኽተሎ ሜላን ንምቅላዕ፣ ምስ ህዝብና ቅኑዕ ሓበሬታ ተለዋዊጥና ብሽርክነት ክንሰርሓሉ ሃገራዊ ግዴታ ከምዘለና ንኣምን። ዓቕምና ዝፈቕዶ እጃምና ከነበርክት ሓበሬታ ንዝርግሕ ጻውዒት ንገብር ኣለና። ምኽንያቱ ጽቡቕ ህዝብና ሃገርና ንሕጎሰሉ። ሕማቕ ተግባር ዓገብ ክንብል ሰብኣውን ሃገራውን ሓላፍነት ኣለና።  ኣብዘን 10 ዓመታት ኣብ ሰሃራ ይኹን ኣብ ማእከላይ ባሕሪ ዘጋጥም ዘሎ ምጽናት ወለዶና ክንሓዝን ጥራይ ዘይኮነ፣ ስርዓት ኤርትራ ከብቅዕ ጽቡቅ ድሌት ጥራይ ዘይኮነ ጻዕሪ ኩላትና የድልዮ።

ንሕና ኣብ ጥጡሕ ቦታ ዓዲ ሕጊ ስለዘለና ሰላምን ቅሳነትን ነስተማቕሮ ኢና፣ ግን’ከ ልብና ኣይዓረፈን። ሕልናና ኣይቀሰነን ልዋም ለይቲ የብልናን። ካብ ሃገር ኣካልና እንተተፈልየ ብመንፈስ ተኻፈልቲ ጸገም ኣካል ሓዘን ህዝብና ኢና። ንድምጽኹም ጸገምኩም ሰሚዕና ኣውያትኩም ጠራዕቲ ኣቃላሕቲ ኢና። ሓባራዊ ፍታሕ ንምርካብ ታሪኻዊ ግዴታ ንስከም። ስለዚ መንፈስን ዕላማን ሓበሬታና ጻውዒትና ካብ ዉፍያት ተቓለስቲ ዝርከብ ሓበሬታት፣ ንህዝብና ከነፍልጥ ኣነጺርና ከነቃልሖ ብዓቕምና ንጽዕር ኣለና።

ፖለቲካዊ ጸወታ ኤርትራ፦ ኣጽዋር ምክልኻል ኤርትራ ምንጩ ካበይ’ዩ? ክንደይ ኣጽዋር ብኸመይ’ከ  ዴሞክራስያዊ ምንቅስቃስ ህዝቢ ትግራይ (ደምህት) ተዓዲሉ።

ምንጪ ኣጽዋር ኤርትራ፦ ንኹሉ ገዲፍና ብሚስጥራዊ ትእዛዝ ኢሰያስ ተኣኪቡ፣ ደምህት ብተዘዋዋሪ ኣገባብ ተዓዲሉ ዘሎ ኣጽዋር ሰራዊት ምክልኻል ኤርትራ፣ ምንጩን ኣመጻጽኡን ክልተ ኣገባብ ምኻኑ ብሩህ’ዩ ግና ምግላጽ ኣገዳሲ’ዩ።

ቀዳማይ፦ ዝፈሰሰ ደም ዝተኸስከሰ ኣዕጽምትን ረሃጽን ዜጋታትና’ዩ። ገለ’ውን ብሓገዝ ዝተረኽበ’ዩ። ካብዞም ንደምህት ተዓዲሎም ዘለዉ ኣጽዋር ኣብ እዋን ገድሊ ብዓቐኑ ብጣዕሚ ውሑድ’ዩ ነይሩ። ኣብ ናደው ስርሒት ፈንቅል ብመጠኑ ወሲኹ። ውጽኢት 30 ዓመታት ብረታዊ ቃልሲ ናጽነት ኤርትራ ምስተረጋገጸ፣ ናይ 2ይ ኣብዮታዊ ሰራዊት ኢትዮጵያ ሙሉእ ዕጥቂ ምስ መኽዘኑ ተረኺቡ። ኣብ ዳሕረዋይ መድረኽ ምውሓስ ሉኡላውነት ብመጠኑ ተወሲኹዎ። ስለዚ ዝዓበየ ምንጪ ኣጽዋር ብኣጣቓላሊ ድምር ናይ ስዉኣት፣ ስንኩላን ይኹን ዝተወፈዩ ዜጋታትና ተጋደልትን መንእሰይ ወለዶን’ዩ።

ስለዚ ን ደምህት ተዓዲሉ ዘሎ ኣጽዋር ምንጩ ኣመጻጽኡ፣ ደም ዜጋታትና ዝፈሰሶ ኣዕጽምቶም ዝተኸስከሶ እዩ።

ካልኣይ፦ ብገንዘብ ህዝብን ሃብቲ ሃገርን ዝተገዝኤ’ዩ። ካብ 1998 – 2000 ዝነበረ ውግእ ሕጽረት ብረታትን ተተኮስትን የዛርብ ስለዝነበረ ይግዛእ ኣሎ ክሳብ ዘርክብ ተጸበዩ ይበሃል ነይሩ። ወከልቲ ህግደፍን ሓሓሊፎም ገለ ሚኒስተራት ኣብ ወጻኢ ሃገራት እናተመላለሱ ሰሚናራት ኣካይዶም ብቕሉዕ ህዝብና ሓግዙና ይብሉ ነይሮም። ስለዚ ኣብ ውሽጥን ወጻእን ዝርከብ ህዝብና ንድራር ሰራዊትና፣ ናይ ምክልኻል ሃገር ወፈያ ወዘተ ኣናበለ፣ ናይ ደቂ ስዉኣት፣ ናይ ዝተዋጽኤ ገንዘብ ብዙሕ’ዩ፣ መዓልታዊ ድማ ብረድዮ ጋዜጣ ይቃላሕ ነይሩ።

ኣብ ወጻኢ ዝርከቡ ናይ ቦንድ ሚልዮናት ዶላራት ሓገዝ ብህዝቢ ተለጊሱ። ደቂ ኣንስትዮ ኤርትራ ነብሰን ተወፍየን። ማህጸነን ዘፍረዮ ደቀን ደቂ ደቀን ስልማተን ወፍየን። ካብ ህዝቢ ዞባ ማእከል /ኣስመራን ከባቢኣን/ ኣብ ሰምበል ማይ-ተመናይ መሬት ተመንዚዑ ካብ 250- 1000  ትርብዒት ሜትሮ ክልተ ግዜ መሬት ብገንዘብ ከምዝተሸጠ ኩሉ ዝፈልጦ ሓቂ’ዩ። መሬት ብኩባንያታት ህግደፍ ክሰርሕኦ ምስ ጀመራ ናይ ህንጻ እቑሑት ስለዝኸበረ ተወሳኺ ገንዘብ ከምዝኽፈል ገይሮም። ኣብ ፈስቲቫላት ካብ 2003 ክሳብ 2005 ድማ ኩሎም ሓለፍቲ ህግደፍ ኣብ በበይኑ ሃገራት ዝሃብኩምና ገንዘብ ኣጽዋር ገዚእና ዕጥቅና ኣምሓይሽና ድሉዋት ኣለና ይብሉ ከምዝነበሩ ብዙሕ ሰብ ዝሰምዖ ሓቂ’ዩ።

ስለዚ ናይ ቅድምን ድሒሩ ካብ ምብራቕ ኤውሮጳ ዝተገዝኤ ኣጽዋር’ዩ። ምንጩን ኣመጻጽኡን “ ደምን ኣዕጽምትን ዜጋታትና፣ ገንዘብ ህዝብን ሃብቲ ሃገርን’ዩ”። እዚ ምንጪ ዘለዎ ኣጽዋር’ዩ ብትእዛዝ ኢሰያስ ብሚስጥር ተሳሒቡ ንደምህት ተዋሂቡ። እዚ ኩሉ ዝወፈየ ህዝቢ ክከሓድ ክጥለም፣ ሰራዊት ኤርትራ ኣጽዋሩ ተመንዚዑ ንካልኦት ክዕደል ፍትሒ ዲዩ?

ሜላን ሚስጥራዊ ትእዛዝን ኢሰያስ፦

ኢሰያስ ኣብ ክልተ በበይኑ ግዜ ብፍሉይ ሜላ ተመሳሳሊ ትእዛዝ ሂቡ’ዩ ኣጽዋር ምክልኻል ስሒቡዎ።

1. ኣብ ወርሒ 06/ 2013 ካብ ክፍለ-ሰራዊታት ተሳሒቡ ኣብ ትሕቲ ሎጂስቲክ ምክልኻል ዝነበረ፣ ንደምህት ዝተዓደለ ብዝሕን ዓይነትን ኣጽዋር፦

• ብዝሒ ብረት ዶሽካ ቻይና ተስዓን ሓሙሽተን ሓባ (95) ፣ መለለዪ ብረት- 12.7 mm machine gun Model 12.7 mm machine gun PT 12.7 China.

 

መብርሂ-ንምንጽጻር ክጥዕም ብፍላይ ኣብቶም ኣገደስቲ ዓይነት ብረታት ከም ዶሽካ መንጣሊ ብረት ስናይፐር፣ ብደምሕት ተወሲዱ ዘሎ ብዝሒ ብረት፣ ናብ ብዝሒ ብረት ሓንቲ ክፍለ-ሰራዊት ኤርትራ ኣብ እዋን 2ይ 3ይ ወራራት ዝነበራ ዕጥቂ እንተመቒልካዮ ንጹር ስእሊ ይህበካ። ምኽንያቱ ናይ ክንደይ ክፍለ-ሰራዊታት ዕጥቂ ወሪዱ ንደምህት ተዋሂቡ የፍልጠካ። ኣብ 2ይ 3ይ ወራራት፣ ሓንቲ ክፍለ-ሰራዊት 4 ብሪገዳት ዓጢቓቶ ዝነበረት ዶሽካ ስረሓት ቻይናን ሶቬትን ኣርባዕተ’ዩ። (4) መዓቀኒ ዕጥቂ ክፍለ-ሰራዊታት ሓደ’ዩ።  ምናልባት ኣብ ፍሉይ እስትራተጂታት ቀዋሚ ቦታ ፍሉይ ኣድላይነት ዶሽካ ዘድልዮ ተወሳኺ ክወሃብ ስለዝኽእል ናይ ገለ ክፍለ-ሰራዊታት ዶሽካታት ዕጥቂ ዝያዳ ክነብር ይኽእል ዝጋጮ ኣይኮነን።

ስለዚ ንደምህት ተዓዲሉ ዘሎ ብዝሒ ዶሽካ 95 :- 4  ክትመቕሎ ኮለኻ፣ ኣጸጋጊዕካ 24 ይመጽእ። ማለት ደምሕት ንዕስራን ኣርባዕተን ( 24) ክፍለ- ሰራዊታት ኤርትራ ዘዕጥቕ ዶሽካታት ወሲዱ ኣሎ። (ዝተሳሕበ ይኹን መኽዘን ዝነበረ ደሚርካ)

2. ኣብ ዕለት 30/ 09/ 2013 ንደምሕት ዝተዓደለ ክልተ ዓይነት ኣጽዋር ቅጭ ሕርሙ/ ስናይፐር ብዝሑ 217 እዩ።

2.1    ዓይነት፣ መንጣሊ ብረት (ቐጭ-ሕርሙ) ብዝሒ፦ ክልተ ሚእትን ዓሰርተ ሸውዓተን (217) ስርሓት ቡልጋርያ። መለልዪ ብረት- Model Sniper MB10D Length: 1207mm Weight: 2840g Made of Metal and Wood, Bulgaria.

2.2   መነጸር ( ቅጭ ሕርሙ) ብዝሒ መነጸር ሚእትን ተስዓን ሰለስተን ( 193) Model 4x 24 P50-scope   Magnification: 4x Lens diameter: 24 Aiming reticle’s type; PSO- 1 Weight; 720g

ወትህድርና ዝፈተነ ዜጋ ይፈልጦ’ዩ፣ ንኩሉ መታን ብሩህ ክኸውን፣ ስናይፐር ኣብ ልዕሊ ብረት መነጸር/ ክሻፋ/ ዘለዎ ብሞስኮት ብጸቢብ ቀዳድ ቦታ ተኸዊሉ፣ ካብ ርሕቀት ሰብ ርእሱ ኣነጻጺሩ ንምውቃዕ ዝተሰርሔ ፍሉይ ብረት’ዩ።

ስለዚ ንደምህት ተዋሂቡ ዘሎ ቅጭ ሕርሙ ስናይፐር ብዝሒ፣ ክልተ ሚእትን ዓሰርተ ሸውዓተን እዩ። ( ክልተ ዓይነት ስናይፐር)

ሰራዊት ምክልኻል ዓጢቑዎ ዝነበረ ክልተ ዓይነት ብረታት ማለት ስረሓት ሩስያን ቡልጋርያን ኣብ ሓደ ክፍለ ሰራዊት ብዝሒ ብረት ቐጭ ሕርሙ 18 ሓባ እዩ: ዓሰርተ ሸሞንተ ሓባ እዩ።

ስለዚ 217:-  እንተመቒልካዮ፣ ደምህት ናይ  ምክልኻል ኤርትራ ዝነበረ  ን 12 ክፍለ ሰራዊት ዘዕጥቕ’ዩ ወሲዱ።

3. ክልተ ዓይነት ሞደል ሸጉጥ። ብዝሒ ሸጋጉጥ ብድምር ሓምሳን ሽዱሽተን ( 56 )

• ብዝሒ ሽጉጥ ሰላሳን ሾመንተን (38) ዓይነት ሽጉጥ ቲካሮቭ። መለለዪ ብረት፦ Tokarev TT-33 156 Model Tokarev TT-33 – 7.62 x 25mm.
• ብዝሒ ሽጉጥ ዕስራን ሽዱሽተን ( 26 )ዓይነት ሽጉጥ ወልዘር። መለለዪ ብረት፦ Walther PP Pistol- 32 ACP Walther Pistol Hungarian FEG PA- 63

4. ብዝሒ ብረት RPG- 7 ምስ መነጸሩ ሚእትን ሾመንተን (108) Weight 7kg, Length 950mm (37.4) PGO-7 (2.7) and UP-7V Telescopic sight.
5. ብዝሒ ብረት ብሬን PKM ብዝሒ ሰብዓን ሽዱሽተን ( 76) Calliber 7.62x 54R Weight 7.5 kg.( gun) + 4.5 kg Tripod
6. ብዝሒ ብረት ሞርታር 60mm  ብዝሒዓሰርተ ሾመንተ (18)  Caliber 60mm Barrel length 675mm ( 26.57) ምስ 22 መነጸርን መቀያየርን

ስለዚ ንደምህት በብዓይነቱ ኣገደስቲ ኣጽዋር ብድምር፣ኣርባዕተ ምእትን ሰብዓን ሓሙሽተን(475) ብረታት’ዩ። ብጀካ ሓምሳን ሹዱሽተን/ 56/ ሸጋጉጥ፣ ካልእ ዝተረፈ ኩሉ ዓበይቲ ብረት እዩ::

መብርሂ፦ ኣብ ዕጥቒ ደምህት ብዝሒ ንኣሽቱ ብረት ከም ክላሽን (ብሬን ካላሽን) ጅ-3 ኣብ ጽሑፍና ኣይገለጽናዮን ዘሎና ማለት ንፈኮስቲ ብረታት ኣይጠቀስናዮን ዘሎና ።

7. ን ደምሕት ካልእ ዝተዓደለ ዕጥቂ ሰራዊት ዓሰርተ ክልተ 12 መካይን’ዩ። ደምህት ሓይሉ ንምዕባይ ካብ ናይ መንግስቲ ኤርትራ ወጻኢ፣ ግንከ ኢሰያስ ብቐጥታ ዝእዝዞ ዝቆጻጸሮ፣ ናይ ገዛእ ርእሱ ደምህት ባዕሉ ዘምሓድሮ ምውፋር መካይን፣ ሎጂስቲክስ ሃንደሳ ስለያዊ ትካላት መስሪቱ ኣሎ። ስለዚ ካብ ሚኒስትሪ ምክልኻል ብጀካ ኣጽዋር ካልእ፣ ዓሰርተ ክልተ (12) ላንክሩዘር መካይን ኣብ ሓደ ግዜ ምስቲ ኣጽዋር ወሲኹ ተዋሂቡዎም ኣሎ።

ስለምንታይ’ከ ናይ ሰራዊት ምክልኻል ኣገደስቲ ኣጽዋር ተመንዚዑ የሕስበካ። ብኣንጻሩ ወትሃደራዊ ኣጽዋሩ ዝውስኽ ዘሎ፣ ከም ፖለቲካዊ ሓይልን ጸጥታዊ ኣትሃናንጻ ኢሰያስ ክሳብ ህዝብን ሰራዊትን ዘድፍር ገይሩ ክሃናጾ ከምዝጸንሔ ምልክታት ነይርዎ’ዩ። ሕጂ ውዲት ኢሰያስ ይቃላዕ ኣሎ። ብደምህት ኣብ ልዕሊ ህዝቢ ዝፍጸም ዘሎ ኣነዋሪ ተግባራትን ዘርእዮ ዝጸንሔ ድፍረትን ብመጠኑ ክቃላሕ ጸኒሑ’ዩ። ሕጂ ግና ዝያዳ ይቃላዕ ኣሎ። እንታይ’ዩ እቲ ፖለቲካውን ጸጥታውን ጸወታ ኢሰያስ ኣብ ጉዳይ ደምህት ኩልና ክንመራመረሉ ከነጽንዖ ዘለና ዓቢ ፖለቲካዊ ሕቶ’ዩ።

ሃገራዊ ባይቶ ሚኒስተራት፣ ኣዘዝቲ ሰራዊትን ሓለፍቲ ዞባዊ ምምሕዳርን፣ እዚ ስለ ናጽነቱ ምውሓስ ልኡላውነቱ ኩሉ ዝኸፈለ ህዝቢ ክብረቱ ተቐንጢጡ። ኢሰያስን ጉጅልኡን ልዕልና ሕጊ ኣፍሪሱ፣ ኩሉ ሰብኣውን ደሞክራስያውን መሰላቱ ይረግጾ ኣሎ። ወለዶና  ሰላምን ቅሳነትን ስኢኑ ይጸንት ኣሎ። ናብ ስደት ኣብ ዘምርሓሉ እዋን ዘጋጥሞ ዘሎ ናይ ሰሃራ ባህርን ሞትን ዘስካሕክሕ ግፍዕን ዝጽወር ኣይኮነን። ንብረት ህዝብን ሃገርን ተሓታትነት ዘይብሉ ይበርስ ኣሎ። ሕጂ ከኣ ኢሰያስ ንደምህት ብወትሃደራውን ፖለቲካውን ጸጥታውን ኣገባብ ሃኒጹ ህዝቢ ኣድፊሩ፣ ብደምን ኣዕጽምትን ይኹን ረሃጽን ገንዘብን ህዝቢ ፣ ሃብቲ ሃገር ዝፈሰሶ ኣጽዋር ምክልኻል ኤርትራ ብትእዛዝ ኢሰያስ ብሜላ ተመንዚዑ ንደምህት ተዓዲሉ እሎ።

ብኣንጻሩ ብመሰረቱ ልዕልና ሕጊ ተጣሒሱ። ሕጋዊ ስልጣን ሰለስተ ኣካላት ለሚሱ። ንጹሃት ዜጋታትና ብጉድለት ፍትሒ ይሳቐዩ ኣለዉ። ክሱሳት ኣብ ናጻ ፍርዳዊ ኣካል ኣብ ቅሉዕ መጋብኣያ ገበናዊ ክሶም ኣይተሰምዔን። ክሱሳት ናይ ምክልኻልን ጠበቓን መሰሎም ከቢሩ ከከራኸሩ ኣይተፈቕደን። ኢሰያስ በይኑ ወይ ምስ ፍሉይ ጉጅለ ዝውስኖ ዘይሕጋዊ’ዩ። ምኽንያቱ ባዕሎም ከሰስቲ፣ ባዕሎም ድማ ፈረድቲ ኮይኖም።

ስለዚ ዓገብ መራሕቲ ኤርትራ ነውሪ’ዩ ህዝብኹም ኣድሕኑ። ዓገብ ኣብ ህዝብኹም ጸሊም ታሪኽ ኣይትግደፉ ። ዘዝዓበየ መንእሰይ ወለዶ ክይስደድ ክይጸንት ተኸላኸሉ ። ንድሕነት ህዝብኹም ክብሪ ሃገርኩም ኣብ ጎኒ ውጹዕ ህዝብኹም ክትስለፉ ምሕጽንታና ነቕርብ ኣለና።

ኣብ ሳልሳይ ክፋል፣ ናይ ደምህት ጸጥታዊ ኣገባብ፣ ዝተፈጸሙ ኣነዋሪ ተግባራት ንኸይቃላዕ፣ ብስርዓት ኤርትራ ንበደሎም ምሽፋን ዘርኣዮ ዘይሕጋዊ ምክልኻልን ከነቕርበልኩም ኢና።

ይቅጽል

ደሓን ቀንዩ! !

14/ November/ 2013  Eritrea Help Network

eritreahelpnetwork@hotmail.com