ሎሚ ንጉሆ 26 ሰነ 2017፣ ካብ ገማግም ሊብያ ኣስታት 20 ኪሎምሜተር ኣብ ኣህጉራዊ ማያት ማእከላይ ባሕሪ ልዕሊ 80 ካብ ሚእቲ ኤርትራውያን ዝርከቡዎም 1066 ስደተኛታት በቲ Search and Rescue (SAR) ተባሂሉ ዝፍለጥ ናይ ድሕነት ወፍሪ ከምዝደሓኑ ምንጭታት ኣሰና፣ ካብታ ኣብዚ ሰዓት ‘ዚ ኣብ ማእከላይ ባሕሪ እትርከብ፣ Save the Children UK ከምኡ ‘ውን Save the Children Italy ኣብዚ ናይ ህይወት ኣድሕን ሓባራዊ ዕማም ኣዋፊሮማ ዘለዉ VOS HESTIA ተባሂላ እትፍለጥ መርከብ ሓቢሮም።

ካብቶም ዝበዝሓ ኤርትራውያን ደቀንስትዮ ዝርከባኦም ስደተኛታት፣ 242 ትሕቲ ዕድመ ክኾኑ ከለዉ፣ 52 ካብኣቶም ትሕቲ 12 ዓመት ዝዕድሚኦም ቆልዑ እዮም። ሓደ ወዲ ኣርባዕተ መዓልቲ ህጻን ድማ ኣብ መንጎኦም ይርከብ።

እቶም ነፍሲ ወከፈን ልዕሊ 300 ስደተኛታት ብዝጸዓና 3 ጀላቡ ክጓዓዙ ከለዉ ዝደሓኑ ስደተኛታት ብሰለስተ ዕጽፊ ዝያዳ ዓቕሚ ናይታ ኣብ ድሕነት ዝተዋፈረት መርከብ VOS HESTIA ‘ኳ እንተኾኑ፣ ምርጫ ተሳኢኑ ናይ ሞትን ሕየትን ጉዳይ ስለዝኾነ፣ እታ 350 ሰባት ጥራይ ክትጽዕን ዝፍቀደላ መርከብ ንግዚኡ የዕቍባቶም ከምዘላ ምንጭታትና ብተወሳኺ ኣረዲኦም።

እቶም ካብ ባሕሪ ድሒኖም ኣብታ መርከብ ተዓቝቦም ዘለዉ ዝበዝሑ ኤርትራውያን ብሕማም ሰሓ ዝተጠቕዑ ምዃኖም ‘ውን እቲ ዝረኸብናዮ ሓበሬታ ኣገንዚቡ።

እዞም ስደተኛታት ዋላ ‘ኳ ካብ ሞት ባሕሪ ምድሓኖም ዓቢ ብስራት እንተኾነ፣ ጸገሞም ግን ተወዲኡ ማለት ኣይኮነን። ከምቲ ምንጭታት ዝሓበሩዎ፣ እቶም ቅድሚኦም ድሒኖም ኣብ ሲሲልያ ዝኣተዉ ኤርትራውያን ስደተኛታት ኣደዳ ምዝመዛን ስቅያትን ማፍያታት ሲሲልያ ኮይኖም ክሳብ ኣብ ናይ ነብሰ ቅትለት ስጉምቲ ይበጽሑ ስለዘለዉ፣ እዚኣቶም ‘ውን ተመሳሳሊ ሕማቕ ዕድል ከየጋጥሞም ዓቢ ሻቕሎት ኣሎ።

ብመሰረት እቲ ዝረኸብናዮ ሓበሬታ፣ እዞም ልዕሊ 80 ካብ ሚእቲ ኤርትራውያን ዝበዝሑዎም 1066 ካብ ሊብያ ሰብራታ ካብ ተባህለ ከተማ ሊብያ ተበጊሶም ካብቲ ዞና 2 ተባሂሉ ዝፍለጥ ማያት፣ ብወገን ምዕራብ፣ በዛ ዝተጠቕሰት ሓንቲ መርከብ ጥራይ ዝደሓኑ ክኾኑ ከለዉ፣ ብወገን ምብራቕን ካልእ ከባቢታትን ዝርከባ መራኽብ ‘ውን ሎሚ ልዕሊ 2400 ስደተኛታት ከምዘድሓና እቶም ምንጭታት ኣፍሊጦም። ብድምር ክርአ ኸሎ ድማ፣ ሎሚ 26 ሰነ ኣስታት 3500 ስደተኛታት ድሒኖም ኣለዉ ማለት ‘ዩ። እዚ ናይ ሓንቲ መዓልቲ ቁጽሪ ‘ዚ፣ ኣብዚ ዓመት ‘ዚ በዚ ናይ ድሕነት ሓይሊ ዕማም ካብ ዝደሓነ ጠቕላላ ህይወት ስደተኛታት እቲ ዝዓበየ ኮይኑ ነቶም ኣብቲ ግንባር ድሕነት ተዋፊሮም ዘለዉ ሰብ ሞያ ኣደንጽዩዎም ኣሎ።

ኣብ መንጎ ‘ቶም ብኻልኦት መራክብ ዝደሓኑ ልዕሊ 2 ሽሕ ስደተኛታት ኤርትራውያን ምህላዎምን ዘይምህላዎምን ብልክዕ ኣይተፈልጠን። ብዛዕባ ደሃይ ናይተን ካልኦት መራክብ ተወሳኺ ሓበሬታ ኣብ ዝረኸብናሉ ከነስዕበልኩም ኢና።