ሎሚ ሓሙስ 23 ሰነ 2016 ካብ መላእ ኤውሮጳ እንተላይ ካብ ኣመሪካን ካናዳን ናብ ጀነቫ ዝወሓዙ ልዕሊ 12 ሽሕ ኤርትራውያን ደለይቲ ፍትሒ፣ ነቲ መርማሪ ኮምሽን ሰብኣዊ መሰላት ንምልካዊ ስርዓት ኢሳይያስ ገበናት ኣንጻር ሰብኣውነት ከምዝፈጸመ ዘሕለፎ ውሳኔ ብምድጋፍን ነቲ ኣብ ውሽጢ ኤርትራ ብምልኪ ተዓፊኑ ዘሎ ዉጹዕ ህዝቢ ኤርትራ ተስፋ ለውጢ ንምሃብን ኣብ ደምበ ተቓውሞ ኤርትራ ብብዝሒ ተሳተፍቱን ውዕዉዕነቱን ብርቂ ዝኾነ ዕዉት ታሪኻዊ ሰላማዊ ሰልፊ ኣካይዶም።

እቶም ገሊኦም ንልዕሊ 20 ሰዓታት ብኣውቶቡሳት ተጓዒዞም ከምኡ ‘ውን ንሓያለ ሰዓታት ካብ ኣመሪካ በሪሮም ዝመጹ፣ ብምልካዊ ስርዓት ተገዲዶም ብባሕርን ምድረበዳን ተሰዲዶም ኣብ ኤውሮጳ ዝርከቡ ግዳይ ዓመጽ ምልካዊ ስርዓት ኢሳይያስ ዝኾኑ ነቲ ሰልፊ ብ90 ሚእታዊት ዝዓበሉዎ መንእሰያት፣ ንኣስታት ፍርቂ ሰዓት ካብ መተኣኻኸቢ ናብ ፊት ቀጽሪ ኮምሽን ሰብኣዊ መሰላት ውድብ ሕቡራት ሃገራት ድሕሪ ምምራሽ “እወ ምልካዊ ስርዓት ዓማጺ፣ ገበነኛ ስርዓት እዩ፣ ኣብ ፍርዲ ክቐርብ ኣለዎ ክብሉ ብዘየማትእ ድምጺ መስኪሮም።

ነዚ ሎሚ 23 ሰነ ኣብ ጀኔቫ ዝወዓለ ድሙቕ ናይ ሓቀኛታት ኤርትራውያን ሰላማዊ ሰልፊ፣ ምስቲ ብ21 ዝተኻየደ እቲ ስርዓት ዝርያ ተቓወምቲ ኢትዮጵያ ለሚኑ ዘካየዶ ሰልፊ ዝፈልዮ ድማ፣ እቶም መንእሰያት ነቲ ኣብ ውሽጢ ኤርትራ ብምልካዊ ስርዓት ተዓፊኑ ተዓቢሱ ዘሎ ውጹዕ ህዝቢ ኤርትራ ድምጺ ኮይኖም ድርብ ምስክርነት ምቕራቦም እዩ።

ብቐንዱ እዚ ናይ ሎሚ ውዕሎ ስዕረት ምልካዊ ስርዓት ኢሳይይስ ዘበስር ሓመድ ድበ እዩ ነይሩ።

ክቡራት ሰማዕትና፣ ነዚ ሰፊሕን ዕዉትን ሰላማዊ ሰልፊ ንምንጽብራቕ ኣብ መስርሕ ናይቲ ሰልፊ ዘዳለናዮ ሓጺር ጸብጻብን ምስ ተሳተፍቲ ዘካየድናዮ ዝርርብን ከነስዕበሉም ኢና።