ኣብ ከተማ ሚላኖ ዝርከቡ ቆንስል ምልካዊ ስርዓት ኢሳይያስን መሓዮታቱን፣ ኣብታ ከተማ ዝርከባ ኣዴታት እቲ ስርዓት ኣብ ቦለኛ ከካይዶ መዲቡዎ ካብ ዘሎ ፈንጠዝያን ዳንኬራን ከይተርፋ ምእንቲ፣ ን 7-8 ግዜ ብቴለፎን እናደወሉ፣ “ኣብቲ ውራይ ንነፍሲ ወከፍክን መደብ ስራሕ ተዋሂቡክን ስለዘሎ ፣ ብሰንኪ ምትራፍክን እቲ ተመዲቡልክን ዘሎ ስራሕ እንተቦዂሩ፣ ብሓላፍነት ተሓተቲ ኢኽን፣ ከይትተርፋ” እናበሉ ብቐጻሊ ጸቕጢ ይገብሩለን ከምዘለዉ ምንጭታት ካብቲ ቦታ ሓቢሮም።

እቶም ኣብ ከምዚ ዝኣመሰለ ናይ ምፍርራሕ ዕማም ተዋፊሮም ዘለዉ ልኡኻት ምልካዊ ስርዓት ህግደፍ፣

1 –  ርእሶም ገብረገርስ – ቆንስል ህግደፍ

2 – ዮርዳኖስ  – ጸሓፊት ቆንስል

3 – ተስፋይ – ካብ ቤትጽሕፈት ቆንስል

4- ጎይቶኦም ዮሃንስ ዝተባህለ ልኡኽ ህግደፍ እዮም።

ኣብ ዝተፈላለያ ሃገራት ዝርከቡ ልኡኻት ምልካዊ ስርዓት ኢሳይያስ፣ እቲ ብስም መበል 40 ዓመት ኣብ ቦለኛ ከካይዱዎ ዝሸባሸቡሉ ዘለዉ ፈንጠዝያ መታን ከይጽሙዎም፣ ኣዴታት ናብ ኤርትራ ክገብራኦ ዝሓሰባ መገሻ ኣቋሪጸን ክሳተፋ ብምሕባል፣ ገና ኣብ መስርሕ ሕቶ ዑቕባ ንዘለዉ ኤርትራውያን ስደተኛታት ‘ውን ኣብ መጽንሒ ቦታኦም ልኡኻት ኣዋፊሮም ብምድንጋር ኣብቲ ፈንጠዝያ ከምዝሳተፉ ክገብሩዎም ኩሉ ዓይነት ውዲታት ይጥቀሙ ኣለዉ።

ብዘይካ ‘ዚ፣ ኣብ ዓዲ ጥልያን ንዝርከቡ ደገፍቲ ናይቲ ምልካዊ ስርዓት ተቓወምቲ ክመጹ ስለዝኾኑ መታን ከየጥቅዑኹም ኣብ ክንዲ በብውልቂ በብጉጅለ ክንቀሳቐሱ ኣለኩም ዝብል ናይ  ምፍርራሕ ሜላ ብምምሃዝ፣ መኻይድቲ ሒዞም ክመጹ ይጉስጉሱዎም ኣለዉ።