እቲ ብስም ሰላም ምስ ኢትዮጵያ ዝሽቅጥ ዘሎ ናይ ሓሳባት ፍሉይነት ተጻውሮ ዘይብሉ ውልቀመላኺ ኢሳይያስ ኣፈወርቂ ነቲ ንምልካዊ ምሕደራ ኢሳይያስ ብምንቃፍ ሃገረይ ኤርትራ ዘርእስቱ መጽሓፍ ዝደረሰ፡ ኣብ ውሽጢ ኤርትራ ኮይኑ `ውን ኢሳይያስ ኣካይድኡ ክልውጥ ብድምጺ ንዝጸውዐ ሓርበኛ ተጋዳላይ ብርሃነ ኣብርሀ ሎሚ ንጉሆ 17 መስከረም ሃሱሳቱ ልኢኹ ሎሚ ንጉሆ 17 መስከረም ከምዝኣሰሮ ምንጭታት ሓቢሮም።

ብመሰረት `ቲ ሓበሬታ ሓርበኛ ብርሃነ ኣብርሀ ሎሚ ንጉሆ ኣብ ድሮ ዝኽሪ ናይቶም ቅድሚ 17 ዓመት ተመሳሳሊ ተቓውሞ ብምርኣዮም ዝተኣሰረሉ ዕለት 18 መስከረም፡ ኣብ ከተማ ኣስመራ እናተንቀሳቐሰ ኸሎ እዩ ፡ ብኣርባዕተ በርጌስ ክዳን ዝለበሱ ሰለይቲ ውልቀመላኺ ኢሳይያስ ተታሒዙ።

ሓርበኛ ብርሃነ ኣብርሀ በቶም ሃሱሳት ድሕሪ ምሓዙ ኣበይ ተታሒዙ ከምዘሎ ዛጊት ሓበሬታ የልቦን።

እቲ ኣብ ኲናት ኤርትራን ኢትዮጵያን ወተሃደር ኮይኑ ኣንጻር ኤርትራውያን ምስ ዝተዋግአ ናይ ሕጂ ቀዳማይ ሚኒስተር ኢትዮጵያ ናይ ሰላም ውዕል ፈጺሙ ተባሂሉ ንጉስ ስዑዲ ትማሊ ማዳልያ ዝተሸለመ ወልቀመላኺ ኢሳይያስ ከም ኣመሉ ምስቲ ንንናጽነት ኤርትራ ልዕሊ 50 ዓመት ህይወቱ ዘወፈየ ጅግና ተጋዳላይ ከምቲ ዝዓደሙ ንዘተን ክትዕን ቅሩብ ኮይኑ ኣይተረኽበን።

ሓርበኛ ተጋዳላይ ብርሃነ ኣብርሀ፡ ኣብቲ ኤርትራ ድምጺ መኸተን ዘራይን ዝደለየትሉ ወቕቲ ክንዲ ህዝብን ሃገርን ህድሪ ጀጋኑ ሰማእታት ኤርትራ ካብ ሕምብርቲ ኣስመራ ብዓውታ መቓልሕ ብድሆ ምዃኑ ግን፡ ዘልኣለም ዘይበርስ ሓወልቲ ታሪኽ ገዲፉ ኣሎ።

ኣብዚ ምልካዊ ስርዓት ኢሳይያስ ናይ ፈራሓት ስጉምቲ ወሲዱ ከም ኣመሎ ሓደ ኤርትራዊ ጅግና ዝመቚሓሉ ዘሎ ግዜ ግን፡ እቶም ኣብ ውሽጢ ኤርትራ እትርከቡ ላዕለዎት ሓለፍትን ኣዘዝቲ ሰራዊትን ኢድኩም ኣጣሚርኩም ክትርእዩ የብልኩምን፡ ኣብ ጎኒ እቲ ምእንቲ ሃገራዊ ዕላማ ዝተበጀወ ጅግና ኤርትራዊ ደው ብምባል ዋልታ ክትኩኑዎ ይግባእ። ከምቲ ናይ ትማሊ ኣጽቂትኩም እንተሓሊፍኩም ግን፡ ኢሳይያስ ጽባሕ ውን ንዓኻትኩም ከረኻኽበልኩም ኢዩ።

ክቡራት ሰማዕትና፡ ካብዚ ቀጺልና ታሪኽ ህይወት ሓርበኛ ብርሃነ ኣብርሀ ነቕርበልኩም።

ሓጺር ታሪኽ ህይወት ሓርበኛ ተጋዳላይ ብርሃነ ኣብርሀ

ኣብ ግንቦት 1945 ኣብ ኳንደባ (ኤርትራ) ተወሊደ። ናይ መባእታን ማእከላይን ደረጃታት ትምህርቲ ኣብ ኤርትራ፡ ናይ ላዕለዋይን ዩኒቨርሲቲን ደረጃታት ትምህርቲ ኣብ ኢትዮጵያ፡ ናይ ካልኣይ ዲግሪ ትምህርቲ ኣብ ሕቡራት መንግስታት ኣመሪካ ወዲአ። ኣብ 1963 ኣብ ጂማ (ኢትዮጵያ) ኣባል ተጋድሎ ሓርነት ኤርትራ (ተሓኤ) ኮይነ። ኣብ 1970 ኣብ ሕቡራት መንግስታት ኣመሪካ (ሕመኣ) መስራቲ ኣባል ኤርትራውያን ናጽነት ኣብ ሰሜን ኣመሪካ (ኤናሰኣ) ብምዃን ኣባል ህዝባዊ ግንባር ሓርነት ኤርትራ (ህግሓኤ) ኮይነ። ኣብ 1973-74 ኣብ ኣዲስ ኣበባ ኣባል ማእከልነት ‘ጥሒሻ’ ኮይነ።

ኣብ ኢትዮጵያ ኣብ Awash Valley Authority (AV A) ኣዋሽ ቫሊ ኦቶሪቲን ኣብ ሚኒስትሪ ደቨሎፕመንት ፕላኒንግን ሰሪሐ። ካብ 1975 ክሳብ 1991 ኣብ ሜዳ ኤርትራ ብረት ዓጢቐ ንሃገራዊ ናጽነት ተጋዲለ። ድሕሪኡ ኣብ ናጻ ሃገረይ ኤርትራ ናይ መንግስቲ ሰራሕተኛ ብምዃን ኣብ ሚኒስትሪ ቁጠባዊ ልምዓት፡ ኣብ ቤት ጽሕፈት ፕረዚደንት፡ ዳይረክተር ማክሮ ፖሊሲን ኣህጉራዊ ምትሕብባርን፡ ኣብ ሚኒስትሪ ፋይናንስ (ሚኒስተር) ኮይነ ተመዲበ ሰሪሐ።

ካብ መፈለምታ 2013 ንድሓር ንወዮ ስራሕ (employment) ናይቲ በቲ ዝልዓለ ሕጊ (ቅዋም) ኤርትራ ተመሪሑን ተማእዚኑን ክኸይድ ዘይደሊ ገበነኛ ግፍዐኛ ኢሳያስን ዲክታተራዊ ስርዓተ መንግስቱን ብምቅዋም ብፍቓደይ ገዲፈዮ። መጽሓፍ ኣብ ምድራስ ኣድሂበ። ኣብ ኤርትራ ቅዋማዊን ባይቶኣዊን ዴሞክራሲያዊን ስርዓተ መንግስቲ ክህሉ ዕላማ ናብ ዘለዎ ናይ ቃልሲ መኣዲ ተጸንቢረ። ብዓል ሓዳርን ኣቦ ናይቶም፡ ንረብሓ ህዝቢን ሃገርን ኤርትራ ዘየወላውል ቀዳምነት ስለዝሃብኩ፡ ነቲ ውልቃዊ ምድራዊ-ሃብቲ ንኽድልብ ዘኽእል ዘሎኒ ሓላል ዕቑር ዓቕመይ (potential) ተጠቒመ ከም መጠን ወላዲ ብዘይምሕጋዘይ ዝበደልኩዎም ግን ክኣ ወትሩ ዘፍቅሮም ኣርባዕተ ደቀይን እየ።