እቲ ቁርዲድ ህዝቢ ኤርትራ ውልቀ መላኺ ስርዓት ህግደፍ፡ ብሩራዊ ኢዮበልዩ መዓልቲ ናጽነት ኤርትራ ብዓቢ ፈንጠዝያን ዳንኬራን ንምጽንባል፡ ካብ ሕጂ ጀሚሩ ይሸባሸብ ኣሎ። ግደ ሓቂ ንምዝራብ፡ ህዝቢ ኤርትራ ጽምብል መዓልቲ ናጽነቱ ብድምቀት ከኽብሮ ይግብኦን ዓስቢ ክቡር መስዋእቱን’ዩ። ብፍላይ እቲ መዘና ኣልቦ መስዋትን ድኻምን ዝኸፈለሉ ሰማእታቱ ዘዕርፉሉ ጻማ ረኺብሉ እንተዝኸውን፡ ኣብ ዓመት ሓደ እዋን ጥራይ ዘይኮነ፡ ኣብ ዓመት 365 መዓልታት ኣብ መዓልቲ ድማ 24 ሰዓታትን “ክብርን ምስጋናን ንስውኣትና” እናበለ ሓጎሱ ብዓውታ ምደርጎሖ ነይሩ። እቲ ልዑል መስዋእቲ ዝኸፈለሉ ከየስተማቀሮ ብስርዓት ህግደፍ ስለዝተጨውየ ግን ኣብ ክንዲ ልምዓት ዕንወትን ድኽነትን፡ ኣብ ክንዲ ቅሳነት ስደትን ምብትታንን ኣብ ክንዲ ክብረት ውርደትን ማእሰርትን ኣብ ክንዲ ሰላም ሞትን ማእሰርትን ጻማኻን ዕጫኻን’ዩ ተባሂሉ።

ስርዓት ህግደፍ ከምቲ ልሙድ፡ ብኣጋጣሚ መዓልቲ ናጽነት ኤርትራ፡ ኣብቲ ንሱ ዝውንኖ መራኸቢ ብዙሓን ኣመና ክወራዘ፡ ክጀሃር፡ ከደናግር፡ ከጸልም፡ እዝኒ ሰማዒ ዘሰልቹን ሰማይን መሬትን ዘጣብቅን ሓሶት፡ መደረን ቃለመሕተትን ከቅርብ’ዩ። ድሮ’ኳ ብኣጋጣሚ ሓድሽ ዓመት፡ ኣረሜናዊ ኢሳያስ ሽሕጣን ዝመልኦ ቃለ-መጠይቅ ፈሊሙ’ሎ። እቲ ብቀንዲ እሙናቱን የማናይ ኢድን ብክልተ የማነ ተዳልዩ ኢሳያስ ዝረዓሞን ንይምሰል ብጋዜጠኛታት ክሕተት ዝተዳለወ ሕቶታት ግን ብሰሪ ግዳማዊ ሸርሕታትን ተጻብኦታትን ልምዓታዊ መደባትና ተዓናቂፉ ካብ ምባል ሓሊፉ ንርኡይ ጉድለታቱን ኣበራቱን ህግደፍ ብኽፉት ኣእምሮ ክቅበልን ክዛረብን ባህርያቱ ኣየፍቅደሉን’ዩ። ውልቀ መላኺ ኢሳያስ፡ ዝዓሰወ እንጀራ ኣብ ሓድሽ ሞሶብ ከቀምጥን እቲ ኣብ ልዕሊ ህዝቢ ኤርትራ ዝወርድ ዘሎ ቁጠባዊ፡ ማሕበራውን ስነ ኣእምሮኣውን ቅልውላውን ምግሃስ ሰብኣዊ መሰስላትን ጠንቁ ህግደፍ ጥራይ ምዃኑ ብሒም ኢሉ ክንዲ ፍረ ኣድሪ’ውን ኣይክዛርብን’ዩ። እቲ ሓቅን ክውንነትን ድማ ብኣንጻር’ቲ ስርዓት ህግደፍ ዝግዕረሉን የዋሃት ንምድንጋር ዘካይዶ ዘሎ ዘመተ’ዩ። ስርዓት ህግደፍ ጎሮርኡ ክሳብ ዝነቅዕ እንተግዓረን ብዘቁጸልጽል ቃላት የዋህ ክመስል እንተፈተነን ድማ እዘን ዝስዕባ ሒደት ሓቅታትን ሽንግላጡ ዘውጽኣን ኣብነታት ክቀብረን ኣይክእልን’ዩ።

ቀዳማይ፡ ግስጋሰ ኤርትራ ዝጎናደብ ዘሎ ህግደፍ ዓቅሚ ዘለዎ ኤርትራዊ ሰሪሑ ነብሱ ክኽእል ዕድል ስለዝኸልኦን እቲ ኣሎ ዝብሃል መንግስታውን ብሕታውን ቁጠባዊ ጽላታት ኣብ ትሕቲ ቁጽጽሩ ስለዘእተዎን ንኣውፈርቲ ዘየተባብዕ ቁጠባዊ ፖሊሲ ስለዝኽተልን’ዩ። ኣብዚ እዋን’ዚ ስርዓት ህግደፍ፡ እታ ሓንቲ ደርሆ ትውንን ስድራቤት’ውን ዝተወልደት እንቛቑሖ ሻይጣ ጨወ-በርበረ ካብ ዕዳጋ ከይትገዝእ ሓሪምዋ ይርከብ። ልዕሊ ኩሉ እቲ መኽሰቡን ክሳራኡን ካብ ህዝቢ ኤርትራ ተኸዊሉ፡ ኢሳያስ ከም ቃሕታኡ ዝዝውሮ ገንዘባዊ ኣሰራርሓን ብጉቦን ምጥፍፋእን ዝተበከለ ግዕዙይ ቁጠባዊ ሜላ ጠንቂ ውድተት’ዩ።

ካልኣይ፡ ኣብ ኤርትራ ብሕጊ ኣልቦ፡ ብዘይ ቅዋምን ግሉጽነትን ተሓታትነትን ዘይብሉ ህዝቢ ዘይመረጾን ንርብዒ ዘበን ስልጣን ሒዙ ዘሎ ጉጅለ ህግደፍ፡ ኤርትራውያን ኣብ ሰናጭሮን ምድረበዳን ብዘይ ፍርዲ ንዓመታት ክሕየሩ፡ ካብ ስድራቤቶም ክጭወዩ፡ ክቅተሉ፡ ብዘይ ክፍሊት ክግብሩ፡ ካብ ኣባይቶምን መሬቶምን ክባረሩ ጠንቂ ኮይኑ ዘሎ ስርዓት ህግደፍ እምበር ዓለም ወይ ዝኾነ ኣካል ኣይክሰስን’ዩ። ንኣብነት፡ ንድሕነት ህዝቦምን ሃግረምን ሃናጺ ርእይቶ ዝሃቡን ድሌት ህዝብና ዘየንጸባርቅ ኣሰራርሓ ህግደፍ ዝተቃወሙን መሰረታዊ ሰብኣዊ መሰላትም ተሓሪሞም ብዓረር ህግደፍ ዝተቀዝፉን ኣብ ጎዳጉድን ኮንተይነራትን ዝሳቀዩ ዘለዉ ኣሽሓት ኤርትራውያን፡ ንኣረሜናዊ ተግባራት ስርዓት ህግደፍ ዘቃልዕ’ዩ። ስለዚ ህግደፍ ደም ንጹሃት ኤርትራውያን እናሰተየ እንከሎ “ኣእዳወይ ሕጹብ’የ ከም ጲላጦስ” ኢሉ ክማጎት ኣይክእልን’ዩ።

ሳልሳይ፡ ስርዓት ህግደፍ ዓመት መጸ “ዶብና ኣይተሓንጸጸን” ብዝብል ገደብ ግዜ ዘይብሉ መደብ ሃገራዊ ኣገልግሎት መንእሰያት ካብ ትምህርቶም፡ ካብ ሓዳሮም፡ ምጥዋር ስድራቤቶምን መጻኢ ህይወቶምን ኣዘናቢሉ ብዘይ ብቁዕ ሎጂስትካዊ ቀረብ ንዓመታት ጅሆ ሒዝዎም ዘሎ ኣሽሓት መንእሰያት ተስፋ ቆሪጾም ሃገሮም ገዲፎም ክስደዱን ከርፋሕ ናብራ ከሕልፉን ተገዲዶም። ኣማኢት ካብኦም፡ ኣብ ኩሉ ከይበጽሑ ብነጋዶ ሰብ ተጎይሖም፡ ኣብ ባሕሪ ጥሒሎም፡ ኩሊቶም ተሸይጡ፡ ብትካላት ጸጥታ ዝተፈላለያ ሃገራት ተቀጥቂጦም፡ ደቂ ኣንስትዮ ተዓሚጸን። ስለዚ ብኣጋጣሚ መዓልቲ

ናጽነት ኤርትራ፡ እቲ ኣብ ህዝብና ጎሊሑ ዝርአ ዓበይቲ ብድሆታትን ግን ከኣ ህግደፍ ብፍላጥ ክዛረበሉ ዘይደሊ ጉዳያት ጎሲኻ፡ “ደሞዝ ኣባላት ሃገራዊ ኣግልግሎት ክውስኽ’ዩ፡ መንእሰያትና ሰራሕቲ ቅያ’ዩም፡ ቁጠባና ንምስሳን ባጤራ ናቅፋ ተቀይሩ፡ ሃገራዊ ቅዋም ይንደፍ ኣሎ፡ ክስታት ኣህጉራዊ ሰብኣዊ መሰላት ኣብ ልዕሊ ኤርትራ ሓቅነት የብሉን” ኢልካ

ከተደናግር ምፍታንን እቲ ከልቢ ይንባሕ እቲ ገመል ግን ጉዕዞኡ ክቅጽል’ዩ ዝዓይነቱ ምስሉይን ጠምዛዚ ሓቅን መደረ ምቅራብ መዐደጊ ግዜን ዓለም ንምድንጋርን’ዩ።

ራብዓይ፡ ብኣጋጣሚ መዓልቲ ነጽነት ኤርትራ፡ ኣብ ዝባን ሰማእታትን እሱራትን ኤርትራ ጓይላን ዳንኬርን ክግበር’ዩ። ብስም ሰማእታት ናይ ሓሶት መግለጺታትን መብጽዓታትን ክስማዕ’ዩ። ሳላ ጽንዓት ህዝቢ ኤርትራ’ዩ እዚ ዓወት ተረኺቡ ክበሃል’ዩ። ንቃልሲን መኸተን ህዝቢ ኤርትራ ዘንጸባርቅ ስእላዊ ምርኢታት፡ ደርፍታት፡ ተዋስኦታትን ክቀርቡ’ዩም። እቶም ኣብ ዝሓለፈ እዋን ኣብ ዝተፈላለየ ኣጋጣሚታት ኣብ መራኸቢ ብዙሓንን ካልእ ኣጋጣሚታትን ዝቀርቡ ዝነበሩ ብዙሓት ጀጋኑ ግን ኣብዚ እዋን’ዚ ፍትሒ ይንገስ ስለዝበሉ ከም ከድዓትን ገበነኛታትን ተቆጺሮም ድምጾምን ስእልታቶምን ተቆሪጹ ካብ ህዝቢ ክሕባእ’ዩ።

ህግደፍ ሓቅን ሓሶትን ከተተዓርቅ ህርድግ ምባልን ገበናቱ ካብ ህዝቢ ኤርትራን ዓለምን ምሕባእ ሓደ ካብ ነውራም ጠባያቱ ስለዝኾነ፡ ሓቂ ቦሎኽ ኢላ ትወጸሉ ሓሶት ትቅበረሉ ግዜ ነዊሕ ኣይኮነን። ህግደፍ ከምቲ ኩሎም ደገፍ ህዝቢ ስኢኖም ካብ ውድቀቶም ንምድሓን ዝጥቀምሉ ኣዕናዊ ሜላ ማለት ሓቅታት ንምሽፋን ኣተሓሳስባ ሰባት ንምጥምዛዝ፡ ምንቅስቃስ ተቃወምቲ ንምድቋስን ንምቁጽጻርን ቀዳምነታት ሃገርን ጸገማት ህዝብን ከይዓጠጠካ ቢልዮናት ጥረ ንገንዘብን ዓቅሚ ሰብን ኣብ ስለያውን ፕሮፖጋንዳውን ዘመተ ምትኳር’ዩ። ኩሉ ስርዓት ህግደፍ ዘካይዶ ዘሎ ዕንደራን ምዕልባጥን ድማ ነቲ ኣጋጢምዎ ዘሎ ውሽጣውን ኣህጉራውን ተነጽሎታትን ክስታትን ትንፋስ ንምርካብ እምበር ኣብ ኤርትራ ቅዋማዊ መንግስቲ ከይተተኽለ፡ መሰል ፖለቲካ እሱራት ከይተረጋገጸ፡ ህዝቢ ዝመረጾ መንግስቲ ከይተተኽለ፡ ህዝቢ ኤርትራ ፖለቲካውን ቁጠባውን ጉዳያቱ ክውስን ዕድል ከይተዋህቦ ዝግበር ፈተነታት ማይ ምሕቋን’ዩ። ፈወስቲ መንሽሮ ህዝብና ግን ንሕና ኤርትራውያን ጥራይ ምዃና ክንኣምን ኣሎና።

ጽላል ካብ ሕቡራት መንግስታት ኣመሪካ (2/3/2016)