Photo by Dan Connel

እዚ ኣብ ስእሊ እትርእዩዎ ዘለኹም፣ ካብ ሸገራብ ብራሻይዳ ተጨውዩ ናብ በደዊን ሲናይ ድሕሪ ምሻጡ ኣብ ሓደ ምስጢራዊ ማሕዩር ንሓያለ ኣዋርሕ ከም ሳምና ክሓቅቕ ዝጸንሐ፣ ምስቶም ኣብዚ ሳልስቲ ብዜና ዝነገርናሎም 12 ግዳያት ንስክላ ዝደሓነ፣ መሪሕ ፍትዊ ዝብሃል ወዲ 15 ዓመት ኤርትራዊ ግዳይ እዩ። መሪሕ ካብ ዝተጨውየሉ እዋን ኣትሒዙ ክሳብ’ዚ ቐረባ እዋን፣ ብተደጋጋሚ ግዜ ኣብቲ “ድምጺ ስቅያት ካብ ሲናይ” ዚብል መደብ ራድዮ ኣሰና ቀሪቡ እዩ። ነቶም ብቐጥታ ዘዘራረብናዮን ስቅያቱ ዝተኸታተሉዎ ግዱሳት ኤርትራውያንን እዚ ትርእዩዎ ዘለኹም ኣስከሬን ኣብ ድምጹ ይረኣየና ነይሩ። ብዙሓት ሰብ ሕልና ‘ውን ነቢዖምሉ፣ ብዛዕባ ድሕነቱ ‘ውን ተጨኒቖም።

እቲ ዝገርም ግን ነዚ ናይ መሪሕን ካልኦት ኣማኢት ተመሳሳሊ ሕማቕ ዕጫ ዝወረዶም ኤርትራውያን ግዳያትን እናኽሰምዑ ኣብ ክንዲ ብስቅያትን ሳጻን ናይዞም ነፍሲ ወከፍ ዕለት ናይ ሞትን ሕየትን ዝኾነቶም ግዳያት፣ ንጎይትኦም ውልቀመላኺ ኢሳይያስ እቲ ባዕሉ ዝፈጠሮ ሰብኣዊ ቅልውላው ዘስዕቦ ፖለቲካዊ ክሳራ ስለዝዓጠጦም “ካብቶም ግዳያት ንላዕሊ ትሳቐዩ ኣለኹም” (መጋነንቲ ኢኹም፣ ሓሶት እዩ) ክብሉና ኸለዉ፣ ማዕረ’ቲ በደዊን ነዞም ግዳያት ዘውርዶሎም ዝነበሩ ስቅያት የቐንዝወና ነይሩ። ኣንቱም ምእንቲ ፖለቲካዊ ጊላነት ኢሳይያስ፣ ሰብኣውነት ዘጥፋእኩም፣ ሕልናኹም ዝሸጥኩም ዕሱባት ሕጂ ኸ እንታይ ትብሉ!?

ዘክሩ፣ ድሕነት ናይቲ ካብ ሞት ብስድሪ ዝተረፈ መሪሕ ምስ ዕድል እዩ ዝቑጸር፣ ካልኦት ኣሽሓት ኤርትራውያን ድምጾም ከይተሰምዐ ኣብ ምድረበዳ ሲናይ ሓቒቖም እዮም። ኢሳይያስን መዳኸርቱን ከኣ በዚ ኣብ ልዕሊ ህዝቢ ኤርትራ ኣውሪዶሞ ዘለዉ ውርደትን ሞትን ክድቅሱ የብሎምን።

ድምጺ ስቅያት ናይቲ ለመና ሰብን ኣምላኽን ክደጋግም ኣእዛንኩም እናሰማዓ ዝሓቐቐ መሪሕ እንሀልኩም።

1ይ – መሪሕ ኣብ ዝተጨውየሉ እዋን ካብ ሲናይ ኣቦኡ ኣቦይ ፍትዊ ካብ ሸገራብ ኣብ መፋርቕ ታሕሳስ 2012 ዝተገብረ ዝርርብ

ኣብ ወርሒ ግንቦት 2013 ምስ መሪሕ ኣቦኡ ኣቦይ ፍትውን መኻፍልቲ ሽግሩን ዝተገብረ ዝርርብ