ዝኸበርንን ዝኸበርኩምን ደቂ ሃገርና፥ ደጋጊምና ከምዝገልጽናዮ፥ ብደረጃ ሃገር ዓባይ ብሪጣንያ እተማእክለና ዓባይ ኮሚቴ ክነቕውም መዲብና፥ ክንሠርሓሉ ድማ ጸኒሕና። ኣብ መብዛሕትኤን ዓበይቲ ከተማታት ዓባይ ብሪጣንያ ሕዝባዊ ኣኼባታት ኣካይድና፥ እማመ ሓድነት ከኣ ናብ ሕዝቢ ኣቕሪብናዮ። ኣብቲ ሕዝባዊ ኣኼባታት ዝተሳተፉ ኤርትራውያን፥ ኣብ ከከባቢኦም ኮሚቴታት መሪጾም ከምዘቖሙ፡ ኣብ እዋኑ ገሊጽናዮ ኔርና።

ነቲ ብደረጃ ሃገር ዓባይ ብሪጣንያ ክነቕውሞ ኢልና፥ ኲላትና ክንሠርሓሉ ዝጸናሕና ዕማም፡ ኣብ ፍሬኡ በጺሑ`ሎ ኢልና ስለዝገምገምና፥ ንዕለት 25 መጋቢት 2017 (25/3/2017) ኣብ ከተማ ሎንዶን ሓቢርና ክንምርቖ መዲብና ኣለና። ኣብዚ ኣኼባዚ ኩላቶም ኣባላት ኮሚቴታት ክሳተፉ ኢዮም። እዚ ብደረጃ ዓባይ ብሪጣናያ ዝቐውም ኮሚቴ ሓድነት፥ ተሓታትነቱ ናብ ሕዝቢ ኮይኑ፥ ኣሠራርሓኡ ድማ ሕጋዊ ክኸውን ኢዩ። ናይ ሕዝቢ ኤርትራ ኮይኑ ምእንቲ ኤርትራውያን እውን ክሠርሕ ኢዩ።

ኣብ ልዕሊ ኤርትራውያን ወሪዱና ዘሎ ጸገም መጠነ-ሰፊሕ ከም ምዃኑ መጠን፥ ኩላትና ኤርትራውያን ተኣኪብና፥ ተሳኒናን ተሓጋጊዝናን ክንፈትሖ ግዜና ዝጠልቦ ህጹጽ ጸዋዒት ኢዩ። ደጋጊምና ከምዝበልናዮ፥ ዘለናዮ እዋን ናይ ኣፈርክቡ ከምዝኾነ፡ መርትዖ ዘየድልዮ ግሉጽ ነገር ኢዩ። ኣብ`ዚ ናይ ኣፈርክቡ ኩነታት፥ ነፍሲ ወከፍ ዜጋ ኢዱ ክሕውስ፡ እጃሙ ኬበርክት ሃገራውን ሰብኣዊን ግዴታ ኣለዎ። በዚ መሠረት፡ ኩላትና ኤርትራውያን ሓቢርና ነዚ ኮሚቴ`ዚ ኣቚምና፥ መሪቕና ንልኣኮ፣ ንሓግዞ። ብሓባር ከይሠራሕካ ዝርከብ ቁምነገር የልቦን። ተላዚብካ፡ ሓቢርካ እንተሠሪሕካ ግን ዘይከኣል ነገር የልቦን። በዚ መሠረት፡ ሓድነት ሓይሊ ኢዩ፥ ምብትታን ግና መገዲ ጥፍኣት ኢዩ። ድልየት ሕዝብና፡ ተሳኒኻ ብሕግን ፍትሒን  ምንባር ካብ ኮነ፥ ናብዚ ዕማም`ዚ  ብሓባር ዘይንሳተፈሉ ብቑዕ ምኽንያት የልቦን።

ዝኸበርክንን ዝኸበርኩምን ደቂ ኤርትራ! ኣብ ዓባይ ብሪጣንያ እንርከብ ሓለይቲ ሕዝብና ዝኾንና ዜጋታት፡ ኩላትና ተኣኻኺብና እንተ ሠሪሕና፥ ብዙሕ እወንታዊ እጃም ክነበርክት፣ ጸገማት ሕዝብና ክነቃልል ንኽእል ኢና። ንኣብነት ኮሚቴና ኣብ ከተማታት ዓባይ ብሪጣንያ እናኸደት ኣኼባታት ክትገብ ከላ፥ ምስ ዝተፈላለየ ኣተሓሳስባን ዕላማን ዘለዎም ኤርትራውያን ተራኺባ እያ። መብዛሕታኡ ግዜ፡ ፍልልያትና ኮፍ ኢልና ስለ ዘይተዘራረብናሎምን ዘይተመኻኸርናሎምን እንበር፥ ድልየታትናስ ሓደ እዩ። ብዝለዓለ ደረጃን፥ ብዝተወሃሃደ መገድን እንተ ሠሪሕናሉ፡ መብዛሕትኡ ኤርትራዊ ዜጋ ንሃገሩ ሠናይ ደኣምበር ግናይ ዝትምነ የብልናን።

ዕላማ ኮሚቴ ሓድነት ኤርትራውያን ንፍትሒ ፖለቲካዊ ስልጣን ምጭባጥ ዘይኮነ ሕዝቢ መሰሉ ፈሊጡ ብሓድነት ብማዕርነትን ብሕግን ዝነብረላ ሃገር ኣብ ምፍጣር ዓቕምና ምብርካት ጥራሕ እዩ። እዛ ንኲላትና ክትውክል ኢልና እነቑማ ኮሚቴ ሓድነት፡ ከም መበገሲ ክኾና ኢልና፥ እዚ ዝስዕብ ዕማማት ተሊምናላ ኣለና። ምስ ሕዝቢ ተላዚባ ክትውስኸሉን ክትንከዮሉን ይከኣል ኢዩ።

1. ኣብ ሞንጎ ኤርትራውያን ስኒትን ፍቕርን ኮስኲሳ፥ ሕጋዊን ግሉጽን ኣሠራርሓ ብምትእትታውን ብምኽታልን፥ ኣብ ሕብረተሰብና ዕርቅን ምትእምማንን ክትፈጥር።
2. ፖለቲካዊ ንጥፈታት ሃገርና፡ ንኹላትና ኤርትራውያን ዝጠቅም ምእንቲ ኪኸውን፥ ምስ ደለይቲ ፍትሒ ዝኾኑ ኣካላት ብምርኻብ፥ ሓቢሮም ሓደ ዓለምለኻዊ ናይ ኤርትራውያን ምትእኽኻብ ክፍጠር ድፍኢት ክትገብር።
3. ኣብ ዓባይ ብሪጣንያ ንኹላትና ኤርትራውያን ወኪላ፥ ምስ መንግሥታውያንን ዘይመንግሥታውያንን ኣካላት ብምርኻብ፣ ንዲፕሎማሰኛታትን ሰበ-ሥልጣናትን ኩነታት ሃገርና ብጥርኑፍ መገዲ ክተቕርብን ክተረድእን።
4. ክእለት ዘለዎም ደቂ ሃገርና ኮነ ካልኦት ጉዳይ ሕዝብና ዘገድሶም ኣካላት ኣወሃሂዳ፥ መሰል ኤርትራውያን ብዝለዓለ ደረጃ ክኽበር፡ ክትጽዕር።
5. ኤርትራውያን ኣብ ከባቢታትና ምስዚ ሃገራዊ ኣካል ዝተሓባበር ማሕበረሰብ ኣቑምና፡ ሓድነትና ክነደልድል፡ ጸገማትና ክነቃልል፡ ምስ ዝምልከቶም ኣካላት ብዝለዓለ ደረጃ ክትዋሳእ።
6. ምሁራትን ምኩራትን ኣኪባ፡ ኩነታት ኤርትራውያን ኣዕሚቑ ዘረድእ፡ ብመጽናዕቲ ዝተሰነየ መወከሲ ዝኸውን ሰነድ ክተቕርብ። ብተወሳኺ እዚ ናይ ምሁራንን ምሁራትን ኣካል፡ ነታ ኮሚቴ ከም ኣማኸርቲ ኮይኖም ክሕግዙዋ።
7. ነቶም ኣብ ልዕሊ ኤርትራውያን ዓብዪ በደል ዘውርዱ ዘለዉ ሰባት/ኣካላት ዝረቍሕን ዝገንሕን ኣካል ኣቚማ፥ ነቶም በደለኛታት ንገሊኦም ክትገንሖም፡ ንገሊኦም ድማ ብሕጊ ዝሕተቱሉ መርትዖ ክትስንድ።

ዘለናዮ እዋን፡ ዘመን ኣፈርክቡ እዩ፣ መፍትሒኡ ድማ ሓድነት ሕዝቢ ኤርትራ ኢዩ። ስለዚ ኩላትና ንሓድነት ሕዝብና፥ ኤእጃምና ክነበርክት ይግባእ። ኣብ ዘመን ኣፈርክቡ ኩልኻትኩም ኤርትራውያን ሎሚ ተኣከቡ፡ ሕጂ ተላዘቡ ንብል። በዚ መሠረት፡ ኩልኻትኩም ኤርትራውያን ኣሕዋትናን ኣሓትናን፥ ኣብዚ ኣኼባ`ዚ ክትሕወሱና ብኽብሪ ንዕድም።

ኣኼባ ዝካየደሉ ኣዳራሽ :                

Hargrave Community Centre

Hargrave Road

London, N19 5SP

ዕለት፥ 25 መጋቢት 2017

ሰዓት፥ ልክዕ 4:00 ድ.ቀ. ይጅምር

ብኽብርኹም ሰዓት ኣኽብሩ

ኣሕዋትኩም ኮሚቴ ሓድነት ኤርትራውያን ንፍትሒ – ዓባይ ብሪጣንያ