እቲ ብሰንኪ ኣጕል ውልቀምልካዊ ምሕደራ ስርዓት ኢሳይያስ ድሮ ኣብ ዓዘቕቲ ድኽነትን ምረት መነባብሮን ጥሒሉ ክሳቐ ዝጸንሐ ውጹዕ ህዝብና፣ ብፍላይ ድሕሪ ‘ቲ ኣብ ዝሓለፈ ቕንያት በቲ ምልካዊ ስርዓት ዝተኣታተወ ምቕያር ባጤራ ናቕፋን ዘይርጡብ ኣተገባብራኡን፣ ቀረብ ሃለኽቲ ብምስኣኑ ኣብ ታሪኹ ገጢሙዎ ዘይፈልጥ ስእነትን ጥምየትን ኣጋጢሙዎ ሸቐልቀል ይብል ምህላዉ ምጭታት ኣሰና ካብ ኣስመራ ሓቢሮም።

እቲ ተቐባሊ ናይ ከምዚ ዝኣመሰለ ዘይጽፉፍ ምሕድራ ኮይኑ፣ ናቕፋ ንምቕያር ኣብ ሪጋ ባንክ፣ ባኒ ንምግዛእ ኣብ ሪጋ ፎርኖን ድዃኵንን፣ ካርድ ተለፎን ንምግዛእ ኣብ ቴለኮሚኒኬሽን ተሰሪዑ ዝውዕል ዘሎ ህዝቢ፣ “ከምዚ ዝኣመሰለ ህድግለነ ዘይብሉ ጨካንን ፍሹልን ስርዓት መዋእልና ርኢና ኣይንፈልጥን” እናበለ የማርር ከምዘሎ ምንጭታት ኣሰና ኣረዲኦም።

ብመሰረት እቲ ሓበሬታ፣ ንሓንቲ ፍረ ባኒ 5 ናቕፋ በጺሓ ኣላ። ሕጂ ንህዝቢ ዝያዳ መሓንቖ ኮይኑዎ ዘሎ ግን፣ እቲ ክብሪ ዋጋ ሃለኽቲ ጥራይ ዘይኮነ፣ ዋላ ገንዘብ እናሃለዎ ዝገዝኦ ስኢኑ ኣብ ሓደጋ ወዲቑ ምህላዉ እዩ።

ብፍላይ ስድራቤታት ንደቆም ዝብላዕ ስኢኖም ብዓሊቕ ጽበት ካብ ሓደ ድኳን ናብ ካልእ ድኳን ብላዕልን ታሕትን ዘርእዩዎ ዘለዉ ሸገርገር ክትርእዮ ዘስቅቕ ምዃኑ እቶም ምንጭታት ብምረት ይገልጹ።  

ብዘይካ ‘ዚ እቲ ስርዓት ናቕፋ ናይ ምቕያር ግዜ የሕጺሩ፣ ነናሻዕ ዝለዋወጥ መምርሒታት እናውጽአ ህዝቢ ድንግርግር ከምዝብል ምግባሩ፣ ነቲ ኣብ ኢድ ነጋዶን ህዝብን ዝጸንሐ  ገንዘብ ካብ ስራሕ ወጻኢ ንምግባር ንዘለዎ እኩይ ዕላማ ከምዘርኢ ህዝቢ የዕዘምዝም ኣሎ።  

ይኹን’ምበር ህዝቢ ናይ ሰብ ገንዘብ ኣረጊት ናቕፋ በብ20 ሽሕ እናተመቓርሐ ንውዲት ናይቲ ህዝባዊ ሓልዮት ዘይብሉ ስርዓት ኣብ ምፍሻል ይተሓባበር ከምዘሎ ተፈሊጡ።