ድምጻዊ ኪሮስ ኣስፋሃ ናብ ስደት ካብ ዝወጽእ ኣትሒዙ ናይ ቃልሲ ማለት ንሓርነትን ምድሓን ህዝብን ሃገርን ዝጽዉዑ ደርፍታት ክሰርሕ ድሕሪ ምጽንሑ፡ ትማሊ ሰንበት 1 ግንቦት ኣብ ሃገረ እስራኤል ከተማ ተልኣቪቭ ድማ ዓቢ ለይታዊ ትልሂት ብምድላው ዕዉት ናይ ሙዚቃ ምርኢት ኣካይዱ። ኣብ’ቲ ኣስታት 6000 ኤርትራውያን ደለይቲ ፍትሒ ዝተረኽብሉ ኣጋጣሚ፡ ድምጻዊ ኪሮስ ኣስፋሃ ኪንዮ ሳዕስዒትን ዳንኬራን ህዝብን ሃገርን ንምድሓን ክንገብሮም ዝግባኣና ተበግሶታት ኣብ መኦንጎ ሞንጎ ንለውጥን ሓርነትን ዝጽዉዑን ዝጠልቡን ኣድማዕቲ ሓረጋት ከማሓላልፍ ኣምስዩ።

እቲ ብሙዚቀኛታት ጩራ ባንድን ምስኡ ዝኸደ ሓያል ክኢላ ናይ ኪፖርድ ሙዚቀኛ ኣቤል ግደን ተዓጅቡ ብስነ-ጥበባዊ ስራሓቱ ደሚቑ ዘምሰየ ኪሮስ ኣስፋሃ፡ ካብ ህዝቢ ዓቢ ተቐባልነት ረኺቡ ንፍትሕን ሓርነት ምስ ዝቃለሱን ኣንጻር’ቲ ስርዓት ዝምክቱ ዘለዉ መንእሰያትን ብምምሳዩ ዓሚቑ ዕግበት ከምዝተሰመዖን እዚ ናይ ምትእኽኻብ ምሸት ድማ ኪንዮ ምዝንጋዕ እሂን ምሂን ንባሃሃለሉን ንደለይቲ ፍትሒ ተስፋ ንስርዓት ህግደፍን ኮራኩሩን ድማ ዓቢ ጽፍዒት ሙዃኑ ዘርኢ ሃገራዊ ቆጸራ ኢዩ ክብሉ ኣብ’ዚ እዋን’ዚ ኣብ ጎድኑ ካብ ዘለዉ ምንጭታት ጠቒሶም።

ክቡራት ተኸታተልቲ ህቡብ ድምጻዊ ኪሮስ ብዛዕባ ‘ቲ ሰፊሕን ውዕዉዕን ምርኢት ዘለዎ ጦብላሕታ ንድምጺ ኣሰና ብቓሉ ዝሃቦ ሓጺር ሓበሬታ ኣብ ናይ ሎሚ ሰኑይ መደብ ራድዮ ኣሰና ተኸታተሉ።