ህሉው ኩነታት ሰብኣዊ መሰላት ብግብሪ ንምዕዛብ ናብ ኤርትራ ዝበጽሐ ወግዓዊ ልኡኽ ጸብጻቡ ድሕሪ ምቕራቡ፣ ሰበስልጣን ናይታ ዝበዝሑ ኤርትራውያን ስደተኛታት እትቕበል ስዊዘርላንድ ኣብ ኤርትራ ዝኾነ ምምሕያሽ ሰብኣዊ መሰላት ከምዘየልቦ ወግዓዊ መግለጺ ከምዝሃቡ ስዊዝ ኢንፎ ዝተባህለ መርበብ ሓበሬታ ገሊጹ።

 ሓላፊ ኤሚግሬሽን ስዊዘርላንድ ማርዮ ጋቲከር ንሓንቲ ፍልጥቲ ጋዜጣ ስዊዘርላንድ ኣብ ዝሃቦ መግለጺ፣ “ኤርትራ ነቲ ደረት ዘይብሉ ሃገራዊ ኣገልግሎት ናብ 18 ኣዋርሕ ከምዘውረደቶ ጽንጽንታ ክስማዕ ጀሚሩ ኳ እንተነበረ፣ ሓቅነት የብሉን” ኢሉ። በንጻሩ እቲ ስርዓት ብታሕቲ ታሕቲ ንዝኣተዎ መብጽዓ ኣብ ተግባር ከምዝጠለመ ብምጥቃስ ከኣ፣ ኣብ ኤርትራ ዝኾነ ሰብኣዊ መሰላት ናይ ምምሕያሽ ኣንፈታት ከምዘይተራእየ ኣረጋጊጹ።

ንሱ ምስዚ ኣተሓሒዙ፣ እቶም ኣብ ዝሓለፈ ወርሒ መጋቢት ናብ ኤርትራ ወግዓዊ ምብጻሕ ዝፈጸሙ ክልተ ስዊዘርላንዳውያንን ሓደ ጀርመናውያንን ሰበስልጣን ኤሚግሬሽን ኣብያተ ማእሰርቲ ኮነ ወተሃደራዊ ትካላት ክርእዩ ፍቓድ ከምዘይተዋህቦም ኣገንዚቡ። ኣብቲ ካብ ሓተቲ ዑቕባ ዝሰምዑዎ ዛንታታት ሓቂ ምዃኑን ዘይምዃኑን ንምርግጋጽ ኣብ ከተማታት ኤርትራ ንኽልተ ሰሙን ዘካየዱዎ ምብጻሕ ብሰበስልጣን ኤርትራ ምክትታል እናተገብረሎም ይንቀሳቐሱ ከምዝነበሩ ‘ውን ሓቢሩ።

ምልካዊ ስርዓት ኢሳይያስ ነቲ ካብ ሕብረት ኤውሮጳ ዝጽበዮ ዝነበረ 200 ሚልዮን ይሮ ሓገዝ ምእንቲ ክረክብ፣ ብታሕቲ ታሕቲ ሃገራዊ ኣገልግሎት ናብ 18 ኣዋርሕ ክሓጽር ምዃኑ ተደጋጋሚ መግለጺታት ብምሃብ ንብዙሓት ወጻእተኛታት ከደናግር ኳ እንተፈተነ፣ ኣብቲ ውዕል ሓገዝ ምፍርራም ምስ ተገብረ ግን ንጽብሓይቱ፣ ስግኣት ስለዘለና ዕድመ ሃገራዊ ኣገልግሎት ከነሕጽሮ ኩንታት ኣየፍቅደልናን እዩ ክብል መልሓሱ ከምዝቐየረ ይፍለጥ። ብቐደሙ ‘ውን ስርዓት ኢሳይያስ መብጽዓ ዘየኽብር መታለሊ ስርዓት ምዃኑ ብተደጋጋሚ እናተሓበረ እዮም፣ እቶም ጸቕጢ ስደተኛታት ዝበዝሖም ሰበስልጣን ሕብረት ኤውሮጳ ነቲ ክኾነሎም ዝደለዩዎ መብጽዓ ንግዚኡ ኣሚኖሞ።

ኣብታ ልዕሊ 8 ሚልዮን ዝግመት ብዝሒ ህዝቢ ዘለዋ ስዊዘርላንድ ኣስታት 28,500 ኤርትራውያን ስደተኛታት ከምዘለዉ ይፍለጥ። መብዛሕትኦም ኣብ 2014 ዝኣተዉ ክኾኑ ከለዉ፣ 10 ሽሕ ካብኣቶም ኣብ 2015 ዑቕባ ዝሓተቱ እዮም።