ሓላፊ ጠቕላሊ ስታፍ ውሽጣዊ ጸጥታ ስርዓት ህግደፍ ዝነበረ ገዲም ተጋዳላይ ኮለኔል ስዩም ሃብተማርያም (ላጂን) ብውዲት ምልካዊ ስርዓት ኢሳይያስ፣ ተሰሚሙ ከምዝተቐትለ ምንጭታት ካብ ኣስመራ ሓቢሮም።

ማእሰርትን ጭውያን ሙኩራት ተጋደልቲ ምስ በዝሐ፣ “ተጋዳላይ ይጠፍእ ኣሎ፣ ኣካይዳና ጽቡቕ የለን፣ ሃገር ትህሰ ‘ላ” ኢሉ ድሕሪ ምዝራቡ፣ እቲ ኣብ ጽባሕ ምንቅስቓስ 21 ጥሪ 2013 (ስርሒት ፎርቶ) ገባርን ሓዳግን ኮይኑ ኣብቲ ኣልማማ ማእሰርቲ ተዋፊሩ ዘሎ፣ ድሮ ክተሃላለኾ ጀሚሩ ዝነበረ ኮለኔል ወልደዝጊ ብህታ ንኢሳይያስ ከምዝሓሰወሉ እቶም ምንጭታት ብተወሳኺ ኣገንዚቦም።

ስርዓት ህግደፍ ከምቲ ንዘይደልዮ ሰብ መንቀኛ ኣእዳዉ ሓዊሱ ኣብ ዘጥፍኣሉ ግዜ ብተደጋጋሚ ዘዘውትሮ፣ “ገዲም ተጋዳላይ ስዩም ብሃንደበታዊ ሕማም ተሰዊኡ” ኢሉ ተቐላጢፉ ኣብ መቓብር ሓርበኛታት ብምድፋን ከም ሓዘንተኛ ኣብ መራኸቢ ብዙሃኑ ክዛረበሉ ‘ውን ኣይሓፈረን።

እቶም ምንጭታት፣ ኮለኔል ስዩም ሃብተማርያም ድሕሪ’ቲ ኣብ ሜዳ ንሓለዋ ሰውራ፣ ኣብ ናጽነት ንውሽጣዊ ጉዳያት ዝመርሐ ሚኒስተር ነበር ዓሊ ሰይድ ዓብደላ፣ ኣብ ለንደን ብሕማም ምስ ዓረፈ ሬስኡ ናብ ኤርትራ ከይኣቱ ብኢሳይያስ ዝተኸልከለ ልዕለዋይ ሓላፊ ጸጥታ ነበር ናይዝጊ ክፍሉ፣ ከምኡ ‘ውን እቲ ድሕሪ ሒደት መዓልታት ስርሒት ፎርቶ ዝሞተ ኮሌኔል ሓደ ካብ ላዕለዎት ሓለፍቲ ጸጥታ ዓብደራሕማን ጃሲር፣ ዝለዓለ ኣፍልጦ ምስጢራት ጸጥታን ሓለዋ ሰውራን ዝነበሮ ገዲም ተጋዳላይ ምዃኑ ብምጥቃስ፣ ብዘይካ ናይዝጊ ክፍሉ ኩሎም ‘ዞም ካብ ሜዳ ኣትሒዞም ናይ ጸጥታን ሓለዋ ሰውራን ምስጢራት ልዑል ኣፍልጦ ዝነበሮም ላዕለዎት ሓለፍቲ ብውዲት ምጥፍኦም ናይ ኣጋጣሚ ዘይኮነስ ነቲ “ንፈላጥ ምስጢር ምስ ምስጢሩ ምቕባር” ዝብል እኩይ ሜላ ኢሳይያስ ዘቃልዕ ምዃኑ ኣገንዚቦም።

ኣብ 1974 ዝተሰለፈ ገዲም ተጋዳላይ ስዩም ተስፋማርያም ኣብ መበል 67 ዕድሚኡ እዩ  ካብዛ ዓለም ብሞት ተፈልዩ።