ደልይቲ ፍትሒ ላስቬጋስ ካብ ወርሒ ሓምለ ወርሓዊ ንኣሰና ከዋጽኡ ጀሚሮም

ደለይቲ ፍትሒ ላስቬጋስ ከምቲ ኣብ ኹሉ መዳያት ንፍትሒ ዝገብርዋ ቓልስን ተወፋይነትን ንሬድዮ ኣሰና ንምስሳን ብወልንተኦም  ካብ ወርሒ ሓምለ ዝጅምር ወርሓዊ 10 (ዓሰርተ)ዶላር ንምውጻእ ወሲኖም።

እዞም ደለይቲ ጽቡቕ ህዝቢ ኤርትራ ዝኾኑ ተቐማጦ ላስቬጋስ ነታ ዘይትሕለል ሬድዮ ኣሰና ንምስሳንን መደባታ ብምዕባይ ካብዚ ዘላቶ ንላዕሊ ወጽዓን ስቓይን ህዝቢ ኤርትራ ናብ ዓለምን ኤርትራውያንን ንምቕላሕ ገንዘባውን ሞራላውን ሓገዝ ስለዘድልያ ካብዚ ብምብጋስ እዮም ነዚ ሓላፍነታዊ ስጉምቲ ወሲዶም።

እቶም ነዚ ውሳኔ ዝወሰዱ መንእሰያትን ዓበይትን ኣብ ሃገርና ናጽነት ፕረስ የለን፥ ዜጋታት ከምድላዮም ናይ ምዝራብን ምጽሓፍን መሰል የብሎምን፥ ኣብ ሃገርና ብዘይካ በቲ ስርዓት ዝውነና ሓንቲ ጋዜጣ ሓዳስ ኤርትራን ቲቪ ኤረን ካልእ የለን ህዝቢ ኤርትራ ካብ ነጻ ወገን ዝኾነ ሓቤረታ  ዝረክበሉ ፈነወ ሬድዮ የብሉን ። ካብዚ ብምብጋስ ነዛ ንህዝቢ ኤርትራ መተንፈሲ ኾይናቶ ዘላ ሬድዮ ኣሰና ኣብ ውሽጥን ደገን ብጽፈት መደባታ ንምትሕልላፍ ናይ ገንዘብ ሓገዝ ስለዘድልያ ኢና ነዚ ውሳኔ እዚ ወሲንና ክብሉ ተዛሪቦም።

እቶም ናይ ገንዘብ ሓገዝ ንምግባር ዝወሰኑ ቐጺሎም ነታ ንኹሉ መሰናኽላት ተጻዊራ ታተ ትብል ዘላ ሬድዮ ኣሰና ካብ ውሽጥን ወጻእን ሓቤረታት ንምእካብ እውን ናይ ገንዘብ ሓገዝ ስለዘድላያ ኢና ነዚ ውሳኔ ወሲንና ኢሎም ።ቐጺሎም እዚ ብልዕሊ 20 ሰባት ተጀሚሩ ዘሎ ሰናይ ተበግሶ ካላኦት እውን ክጽንበርዎን ከተባብዕዎን ይግባእ ብምባል በዚ ኣጋጣሚ እዚ ድማ ንኩሎም ኣብዚ ክተሓጋገዙ ዝደልዩ ተባዓት ኤርትራውያን ንኩሉ  ኩፉት ምኻኑ ንሕብር ኢሎም።

ቐጺሎም እቶም ደለይቲ ፍትሒ ኣብዚ ሕጂ እዋን ሃገርና ኤርትራ ኣብ ቐራና መንገዲን ኣብ ፈታኒ ህሞትን ኣብ ዘላትሉ እዋን ሓደ ናብ ህዝቢ ሓቤሬታታት ዘመሓላልፍ ፈነወ ሬድዮ የድልየካ እዚ ድማ ብሓደ ወይ ብኽልተ ሰባት ዝዕመም መደብ ኣይኾነን ፥ስለዝኾነ ድማ ኣብ ወጻኢ ንርከብ  ኤርትራውያን ከምዚ ናይ ላስቬጋስ  ሰናይ ተብግሶ ንኽወስዱን ኣብ ኩለን ከተማታት ዓለም ዘለዉ ደለይቲ ፍትሒ ወርሓዊ ዓዓቕሞም ከበርኽቱን  ከተባብዑን ንጽውዕ ኢሎም።