ግርማ ኣስመሮም!

ክቡራትን ክቡራንን ኤርትራውያን፡ እትፈልጡዎ ሓቀኛ ሓበሬታ ንደሊ ስለ ዘለና ምትሕብባርኩም ብትሕትና ንሓትት? እትህቡዎ ሓበሬታ፡ ብዛዕባ’ዚ ኣብ ኣዲስ ኣበባ ዘሎ ወኪል፡ እቲ ኣብ ሃገርና ዘሎ ድያብሎስ’ዩ ኪኸውን። ምኽንያቱ ንሱ፡ ኣርፓፔ (ሊቀ ጳጳሳት) ወከልቲ ህግደፍ ብሙዃን፡ ብቕዓት ጊላነቱ ንምርግጋጽን ኤርትራዊ መንነቱ ንምዕቃብን ዘይሕለል ጻዕሪ የካይድ ስለ ዘሎ፡ እንታይነትን መንነትን ናይዚ ልኡኽ መላኺ ዚኾነ ድንኪ (ኣዝዩ ሓጺር ሰብ) ኣቶ ግርማ ኣስመሮም ምፍላጥ ስለ ዘድለየና፡ ብዛዕባኡ እትፈልጡዎ ክትሕብሩና ብትሕትና ንሓትት። ኣብዚ ሎሚ እዋን እቶም ቀደም ህዝቢ ኤርትራ ንኣስታት 30 ዓመት ብገዛእቲ ኢትዮጵያ ክእሰርን ክቕተልን ከሎ ኣብ ሕቚፊ’ቶም ረገጽቱ ኮይኖም፡ ኣማዕድዮም እናረኣዩ፡ ‘እዚኣቶም ከኣ ሓለምቲ’ዮም! ዘይፍተን ነገር ይፍትኑ ኣለዉ!’ ብምባል፡ ብሰውራ ኤርትራ ዘባጩው ዝነበሩ ሰባት፡ ሕጂ ልዕሊ ኤርትራውያን፡ ኤርትራውያን ብምዃን፡ ዕሱብነቶም ንመላኺ ካብ ካልኦት ብጾቶም ንላዕሊ ብዝተዓጻጸፈ ከርእዩ ይፍትኑ ስለ ዘለዉ፡ ንብዓል ሶፍያ ተስፋማርያም ወሲኽካ ኣስሎም (ዘርኦም፡ ትውልዶም) ብምንጻር መውረርያ ክግበረሎም ኣገዳሲ ኮይኑ ስለ ዝተራእየና እንታይነቶም ምንጻር እዋናዊ’ዩ ንብል።

እዚ ኣብ ኣዲስ ኣበባ ዘሎ ኣባብ (ሸቃላይ) ነቶም ኣብ እዋን ስርሒት ፎርቶ ኣብ ኣፍደገ ውድብ ሓድነት ኣፍሪቃ ኣንጻር ምልኪ ሰላማዊ ሰልፊ ዝገበሩ ኤርትራውያን፡ ‘እዚኣቶም ኤርትራውያን ኣይኮኑን!’ ብምባል መንነቶም ክሓክኽ ዝፈተነ ድንኪ’ዚ እንታይነት ናቱ ምፍላጥ የድሊ ኣሎ። ምኽንያቱ፡ ኤርትራዊ ንኤርትራዊ ‘ኤርትራዊ ኣይኮነን!’ ኪብል ዘይልሙድ ተርእዮ ስለ ዝኾነ። እቲ መላኺውን እንተኾነ ንደለይቲ ለውጢ፡ ዕሱባት’ምበር ኤርትራውያን ኣይኮኑን ስለ ዘይብሎም። እዚ ቃል’ዚ መብዛሕትኡ ግዜ ካብ ኣፍ እቶም ዘይኤርትራውያን ስለ ዝወጽእ። ስለዚ፡ ንስኻትኩም ብዛዕባ’ዚ ሰብ’ዚ ትፈልጡዎ እንተለኩም ንህዝቢ ክትሕብሩ’ዩ እቲ ሕቶና።

እዚ ኣብ ኢትዮጵያ ዘሎ መልቲ (ሕልኩስ፡ መታለሊ) ትማሊ ወጽዓ ህዝቦም ምጻር ዝሰኣኑ ጀጋኑ ተባዓት፡ ኣብ ፎርቶ ንዝወሰዱዎ ተባዕ ስጉምቲ ‘ዝተፈጸመ ነገር የለን!’ ብምባል ምስ ከሓደ፡ ብድሕሪኡ ጎይታኡ ድሕሪ ናይ ሰለስተ ሰሙን ትንፋስ ናይ ምምላስ ግዜ፡ ኣብታ ብውልቁ ዝውንና ኣልቡሙ ተቐልቂሉ ‘እወ ስርሒት ፎርቶ ተፈጺሙ’ዩ፡ ግን ፊልም ስለ ዝነበረስ እታ ኮመድያዊት ፊልም ብሞት ሓደ ተዋሳኣይ ክሳዕ እትውዳእ ኣነ ንገለ ካብ ተላኣኣኽተይ ናብኣቶም ልኢኸ መልሶም እናተጸበኹ፡ ምስቶም ምሳይ ዝተረፉ ተላኣኣኽተይ ኴንና እናተዘናጋዕና ነታ ፊልም ተዓዚብናያ! ብሞት ሓደ ሰብ ከኣ ተወዲኣ! በቃ ኣብኣ ኣብቂዓ!’ ምስ በለ፡

ሎሚ እታ ካልአይቲ መልሓስ እዚ ኣብ ኣዲስ ኣበባ ዘሎ ኣሩኤል (ወኻርያ) ውጥም ኢላ፡ ዘስደምም ዘረባ ተዛሪባ ኣላ። እቲ ናይ ሓሶት ዘረባ ከምዚ ዚስዕብ’ዩ ነይሩ፥ ‘ስርሒት ፎርቶ ብናይ ዉልቆም ጥቕሚ ዝኾረዩ ዉልቀ ሰባት’ዩ ተፈጺሙ! መንግስቲ ኤርትራውን ተቃወምቲ ዝብሃል የብሉን! 95% ካብ ህዝቢ ኤርትራ ደጋፊኡ’ዩ! እቶም 5% እውን ብውልቃዊ ጥቕሞም ዝኾረዩ ኣዝዮም ውሑዳት’ዮም!’ ክትብል ንማዕከናት ዜና ዓለም ሓቢራ ኣላ። ዕሱብ ህግደፍ ከምዚ ምባሉ ዘገርም ነገር’ኳ እንተዘይኮነ፡ ብፍላይ እዚ ድንኪ’ዚ ግን ልዕሊ ካልኦት ዕሱባት ኪኽድም ዝግደደሉ ዘሎ ምኽንያት መርመራ ዘድልዮ እዩ። ምኽንያቱ፡ ኪኖ ውልቃዊ ጥቕሙን ረብሓኡን ይኸይድ ስለ ዘሎ። ንምትሕብባርኩም ኣቐዲምና ነመስግን። የቐንየልና።

ስቓይና ንኺድምደም፡ ውድቀት ንጉጅለ ሕሰም!

28-05-2013 ካብ ሓውኹም መሲናስ