– ኣብ ወድብ ምጽዋዕ ኣብ ዝሓለፈ ሳምንቲ ጽዑቕ ናይ ዓይኒ የብለን ስኒ የብለይ ሓፈሻዊ ግፋ ተኻይዱ። እቲ ኣብ ምጽዋዕ ዝተኻየደ ከቢድ ግፋ ኣብ ኣስመራን ካልኦት ከተማታትን ምስ ተሰምዐ ድማ ናባና ምምጽኡ ኣይተርፎን እዩ ዝብል ሻቕሎት ፈጢሩ ቀንዩ።

– ደሃይ ደቀን ክገብራ ናብ ሳዋ ወሪደን ዝቐነያ ስድራቤታት፣ ደቀን ብጥምየት ተጠቒዖም ከምዘለዉ ኣቐድመን ካብኣቶም ብዝረኸባኦ ሓበሬታ መሰረት ካብ 5-7 ሽሕ ናእፋ ሒዘን ገይሸን። እዚ ድማ ነተን ንርእሰን ሽጉራት ዝኾና፣ ብምረት መነባብሮ ተሓኒቐን ዘለዋ ስድራቤታት መሊሱ ናብ ቅልውላው ኣእትዩወን ይርከብ። እቶም ኣብ ሳዋ ዝርከቡ ቆልዑ ንኣዴታቶም ኣኪቦም ብዛዕባ ‘ቲ ኣብ ሳዋ ዝወርዶም አሎ ግፍዕታት ብዝርዝር ገሊጾምለን። እቲ ዝኸፍአ መማህራኖም ዳርጋ ኩሎም ስለዝጠፍኡ፣ ባዕሎም ንባዕሎም እናተማሃሃሩ ግዜ የሕልፉዎ ምህላዎም ‘ውን ሓቢሮመን። ሓደ መስቀሉ ኣብ ክሳዱ ገይሩ ኣብ ታዕሊም ዝተረኸበ መንእሰይ፣ ካብ ክሳዱ ኣውጺኡ ብእምኒ ክቕጥቅጣ ንዝተዋህቦ ትእዛዝ ምስ ነጸገ፣ ኣብ ቅድሚ ዓይኖም ብበትሪ ብኸቢድ ክቕጥቀጥ ከምዝረኣዩ ምስ ሓበሩወን እተን ኣዴታት፣ ብጭንቀጥትን ቁጥዐን ከበኽያ ቀንየን።  እቲ ዘሕዝን፣ ደቀን ክርእያ ገንዘብ ሒዘን ዝወረዳ ብዙሓት ኣዴታት፣ ደቀን ጠፊኦም ስለዝጸንሑ፣ ደቅና ናበይ ኣቢሎም ኢለን ክሓታን ክሻቐላን ቀንየን።  እተን ኣዴታት መማህራን ናብ ዘይብሉ ሳዋ ኸ ስለምንታይ ኢና ደቅና እንስደድ ክብላ ከለዋ፣ ብፍላይ እተን ተጋደልቲ ዝነበራ ኣዴታት እዚ ኩሉ መስዋእቲ ገድልና እዚ ኮይኑ ተሪፉ እናበላ ከማርራ ይስምዓ።

– ነቲ ንስንኩላን ተባሂሉ ዝተሰርሐ ኣባይቲ ገለ ገለ ኣብ ስራሕ ናይቲ ስርዓት ተዋፊሮም ዘለዉ መጋበርያ ክኣትዉዎ ጀሚሮም ኣለው። እቲ ስርዓት እቶም ስንኩላን ኣብ ዝበጽሑዎ የብሎምን ኢሉ ብምዅናን፣ ነቶም ስልጣኑ ኣብ ምንዋሕ ይሕግዙኒ ዝበሎም መሳርሒ ነቲ ኣባይቲ ክሰፍሩዎ ምውሳኑ ዘቖጥዖም ከኣ፣ በዝን ወዲ ኸምዝን ኣብ ስልጣን ንምጽናሕ ዝግበር ሃቐነ ፋይዳ ከምዘይብሉ ይገልጹ ኣለዉ።

– ስርዓት ኢሳይያስ፣ እቲ ዕቑር ሰራዊት ናብ ታዕሊም ንምኻድ ዝገበሩዎ ኣብያ፣ ተደፊርና ዝብል ስምዒትን ቁጥዐን ስለዘሕደረሉ፣ ኣብ ኣስመራ ንኣብነት ኣብ ካምቦቦሎ ንዝርከቡ ኣባላት ዕቑር ሰራዊት ንዕለት ሓደ ጥሪ (ሓዱሽ ዓመት) 2015 ክትብገሱ ኣለኹም ዝብል ትእዛዝ ኣመሓላሊፉ ኣሎ። ኣብ ሓዱሽ ዓመት ዝብገሰሎም ሰብ ከምዘየልቦ ፍሉጥ ክንሱ፣ ነቲ ትእዛዝ ምትሕልላፎም ከኣ ጭንቀቶምን ሕርቃኖምን ዓሪጉ ከምዘሎ ዘመልክት እዩ።