ትማሊ ሰንበት 6 ጥቅምቲ ልዕሊ 80 እሱራት ካብ ቤትማእሰርቲ ዓዲ ኣቤቶ ብምምላጥ ተሰዊሮም።

እቶም ናብ ከባቢ ጻዕዳ ክርስትያን ከምዝሃደሙ ዝተረድኡ ሓለዋ ቤትማእሰርቲ ነቶም እሱራት ከርክቡ ናብ ጻዕዳ ክርስትያን ኳ እንተኸዱ ህዝቢ ‘ቲ ዓዲ ድሮ ሓቢኡዎም ስለዝጸንሐ ክረኽቡዎም ኣይከኣሉን።

እቶም ወተሃደራት ንዘዝረኸቡዎ ሰብ ክሓቱን ከሰራጥዩን ዝረኣየ ተገሪሁ ዝጸንሐ ሓደ ኣማኑኤል ዝተባህለ ወዲ ‘ታ ዓዲ ከምኣመሎም ዝገፉ ዘለዉ መሲሉዎ ክሃድም ፈቲኑ ሓደ ካብቶም ሓለውቲ ቶኪሱ ብጥይት እግሩ ወጊኡዎ።

ህዝቢ ጻዕዳ ክርስትያን ከኣ ናብቶም ሰራዊት ከይዱ እቲ ዝቶከሰ ኣርእዩና ኢሉ ብምክርኻር ነቲ ዝሃረመ በብዝሓዞ ሃሪሙ ኣውዲቑዎ። በቲ ኩነታት ዝሰግኡ ወተሃደራት ነቲ ዝወደቐ ብጻዮም ገዲፎም ንድሕሪት ምስተመልሱ፣ ፖሊስ መጺኦም ነቲ ተሃስዩ ወዲቑ ዝነበረ ወተሃደር ሒዞሞ ከይዶም። እቲ በቶም ወተሃደራት ዝተወቕዐ ወዲ ታ ዓዲ ከኣ ኣብ ሕክምና ተዓቝቡ ኣሎ።