ውልቀምልካዊ መራሒ ስርዓት ህግደፍ ኢሳይያስ ኣፈወርቂ ወደብ ዓሰብ ንቐጠር ብኽራይ ሂቡዎም ከምዘሎ፡ ኢትዮጵያ ድማ ብመንገዲ ቐጠር ኣገልግሎት ወደብ ክትጥቀም ምስጢራዊ ስምምዕ ተበጺሑ ምህላዉ ኣብ ኣስመራ ክናፈስ ዝጸንሐ ወረ ሕቅነት ከምዘለዎ፡ ካብ ገለ ሰበስልጣን ህግደፍ ዝመልቝ ዘሎ ሓበሬታ የዳምቖ’ሎ።

በቲ ስምምዕ መሰረት፡ ሰራዊት ክልቲኡ ወገናት ካብቲ ከባቢ ንድሕሪት ክርሕቕ እዩ።

ኣብዚ ቐረባ እዋናት ኢሳይያስ ክልተ ግዜ ብዘይመሰነይታ ንበይኑ ናብ ቐጠር ዝገበሮ መገሻ ምስዚ ጉዳይ’ዚ ዝተኣሳሰረ ከምዝኾነ ‘ውን ሓበሬታ ‘ሎ።

ኣብዚ ዝሓለፈ ሳምንቲ ኣሚር ቀጠር ናብ ኢትዮጵያ ብምኻድ ምስ ቀዳማይ ሚኒስተር ኢትዮጵያ ሃይለማርያም ደሳለኝ ብዛዕባ ዝገበሮ ርክብ ተሓቲቱ ዝርዝራዊ ሓበሬታ ካብ ምሃብ ከምዝተቖጠበ ‘ውን ይፍለጥ።

እዚ ጉዳይ’ዚ ገና ምክትታል ዘድልዮ ኳ እንተኾነ፡ ሓቂ እንተኾይኑ ‘ውን ዘገርም ኣይኮነን። ኢሳይያስን ስርዓቱን ኩሉ ነገር ካብ ቁጽጽሮም ወጻኢ ኮይኑ፡ መልሓጥሓጥ ኢሉዎም ተስፋ ቆሪጾም፡ ብዝመጸ ይምጻእ መሐለዊ ትንፋስ ስልጣኖም ዝኸውን ኢንፍዩዥን ኣብ ዘቋምትሉ ዘለዉ እዋን፡ ነቲ ብዕንደራን ህልኽን ዝበሉዎን ዝገበሩዎን ክዝክር ዝኽእል ሕልና ‘ውን የብሎምን።

ኢትዮጵያ፡ ንዓሰብ ብመንገዲ ቐጠር ከምዝትጥቀመሉ ንምግባር ተማሂዙ ዘሎ ጥበብ ከኣ፡ ነቲ ኢሳይያስ ንብዙሕ ዓመታት ብህልኽ ዝውርውሮ ዝነበረ ብድዓዊ መልሓስ ዓጺፉዎ ከይብሃል ካብ ህዝቢ ኤርትራ ንምሽፋኑ: መድሓኒ ገጽ ንምጣዉ ዝተኣልመ ጥበብ ድዉያት እዩ።