ድሕሪ ‘ቲ ኣብ ሕምብርቲ ከተማ ኣስመራ፡ ኣብቲ ቀንዲ መደበር ተለቪዥን ኤርትራ ተደኵኑሉ ዘሎ ፎርቶ፡ ብ21 ጥሪ ዝተኻየደ ተባዕ ምንቅስቓስ ሓይልታት ምክልኻል ኤርትራ ንዲሞክራስያዊ ለውጢ፡ ውልቀመላኺ ስርዓት ህግደፍ ኢሳይያስ ኣፈወርቂ፡ ኣብቲ ዓመታዊ ኣብ ከተማ ምጽዋዕ ዝካየድ፡ ባዕሉ ዝኸፍቶን መደረታት ዘስምዓሉን ዝነበረ፡ ኣብኵሩሉ ዘይፈልጥ ዓመታዊ ጽምብል ስርሒት ፈንቅል ከምዘይተሳተፈ ምንጭታት ካብ ባጽዕ ሓቢሮም።
እቲ ስርዓት ብ ቴለቪዥን ኤርትራ ኣቢሉ፡ ጽምብል ስርሒት ፈንቅል ህይወት ዝነበሮ ከምስል ናይ ዝሓለፈ ዓመታት ጽምብላት ስርሒት ፈንቅል ሰነዳት ካብ ኣርካይቭ ፈናቒሉ ብምዝርጋሕ ኢሳይያስ ከምዝተሳተፈ ኣምሲሉ ከደናግር ኣብ ናይ ሓሶት ፕሮፓጋንዳ ተጸሚዱ ‘ኳ እንተቐነየ፡ ኢሳይያስን እቶም ብየማነ ጸጋም ከቢቦሞ ዝረኣዩ ዝነበሩ ጀነራላትን ሚኒስተራትን ኣሰሮም ከምዘይነበረ እቶም ምንጭታት ኣገንዞቦም።
ኣብቲ ጸቢብ ዘቤታዊ ጽምብል መደረ ዝሃበ ዝለዓለ ኣካል፡ ኣወሃሃዲ በዓላት ናይቲ ዞባ ኣቶ ስራጅ ሓጅ-የሕያ ጥራይ ምዃኑ ‘ውን ኣመልኪቶም።
ባጽዕ ብባንዴራ ተሸሊማ፡ ንኡስ ዘቤታዊ ውራይ ካብ ምዕዛብ ሓሊፉ፡ እቲ ብሃገር ደረጃ ዝካየድ ዝነበረ ዝለመዶ ውራይ ጎዲሉ፡ ዝሕልሕል ኢሉ ምርኣዩ ንዝተፈለጦ ህዝቢ ባጽዕ ንምድንጋር፡ ስርዓት ህግደፍ፡ በቲ መናፈሲ ሓሶት ባዶ ሰለስተ (03) ገይሩ “ቀንዲ ብዓል ስርሒት ፈንቅል ሎሚ ዘበን ኣብ ኣፍዓበት እዩ ዝግበር ዘሎ፡ እዚ ናይ ባጽዕ መወሰኽታ ጥራይ እዩ” ዝብል ወረ ከምዝዘግሐ ‘ውን ጠቒሶም።
ብድሕሪ’ቲ ዘይድፈር ንዝመስል ዝነበረ ምልካዊ ስርዓት ኢሳይያስ ክሳብ ክንደይ ብሰራዊትን ህዝብን ተፈንፊኑ፡ ቦኽቢኹን ጠስጢሱን ከምዘሎ ዘቃልዐ፡ ንህዝቢ ኤርትራ ተስፋ ዳግማይ ሓርነት ዘበሰረ ስርሒት ፎርቶ፡ ኣብ ወግዓዊ ኣጋጣሚታት ዘይተራእየ ኢሳይያስ፡ ብ8 ለካቲት፡ ብመንገዲ ናይቲ ስርዓት ኣገልግሎት ዜና “ኤሪና” ሂቡዎ ዝተባህለ ጎናይ ሓበሬታ፡ ነቲ ደጊም ኢሳይያስ ምህላዉ እምበር ምጥፍኡ ዘየሻቕሎ ህዝቢ ኤርትራ፡ “ብዛዕባ ናይ 21 ጥሪ ፍጻሜ ዝኾነ ዘሰከፍ ጉዳይ ስለዘይነበረን ስለዘየለን ኣይትሻቐሉ” ዝብል ስግንጢራዊ መልእኽቲ ከምዘመሓላለፈሉ ኳ እንተውረየ፡ ኣብ ባጽዕ ወግዓዊ ሃገራዊ ጽምብል ዘይምክያዱን መላኺ ኢሳይያስ ኣብኡ ዘይምርካቡን፡ ንርእሱ ብስርሒት ፎርቶ ተዳሂሉ ሸቐልቀል ኢሉ መእተዊኡ ጨኒቑዎ ከምዘሎ ‘ዩ ዘረጋግጽ ክብሉ እቶም ምንጭታት ኣረዲኦም።