ብኢሳያስ ኣስፍሃ።

ኣቱም! ሰባት ዝገርም እኮ ኢዩ። እዝከረኒ እዋኑ ኣብቲ እስትንፋስ ዘይህብ ቀጻሊ ናይ ምክልኻ ኲናት ተጸሚድናሉ ዝነበርና ምዝዛም ዓመተ 1978 ኣሃዱና ብርጌድ 31 ድሕሪ መሪር ናይ ምክልኻል ኲናት፣ ካብ ኣፍ ደገ ባረንቱ ኣዝሊቕና ኣብ መስመር ኣቑርደት ከረን ጋርሳይ እንገርነ (ቀርዑበል) ኣብ ዝተባህለ ቦታ ዓሪዳ ነቲ ብግብረ ሃይል ዝብል ውዳበ ብሓገዝ ሶብየት ሕብረት ክሳብ ኮራርምቱ ዝዓጠቐ ሰራዊት መግዛእቲ ንከተማና ከረን ከይኣቱ ንምምካትን ነቲ ብመዘና ኣልቦ መስዋእቲ ጀጋኑና ተኸፊልዎ ሓራ ዝወጸ ከተማታትና ንምክልኻልን ኣብ ሓያል ጥምጥም ዝነበርናሉ ወቕቲ ኢዩ ዝነበረ።

ኣብዚ ዝተጠቕሰ ጊዜን ቦታን ኣብ ከባቢና ተጋደልቲ ተጋድሎ ሓርነት ኤርትራን ተጋደልቲ ህዝባዊ ሓይልታት ሓርነት ኤርትራን ወይ ብእንዳ ሳበ ወይ’ውን ብሳልሳይ ሓይሊ ዝፍለጡ ተጋደልቲ ምምባሮም እዝክር። ኣብቲ ጊዜ’ቲ ብዕድመ ንኡስ በተሓሳስባ’ውን ብሱል እኳ እንተዘይነበርኩ ግን ክኣ ከም ኩሎም ፊተውራሪ ውዑይን ክፈልጥን ክምሃርን ከይደቀስኩ ዝሓድርን ኢየ ዝነበርኩ። ከምኡ ስለ ዝኾንኩ ድማ ንኣካያይዳ ተጋደልቲ ተ.ሓ.ኤ ኮነ ህ.ሓ (እንዳ ሳበ) ሓቲተ ዝሕበረኒ ዝነበረ ንምጽላሞም ምዃኑ ዳሕራይ ዝተሰወጠኒ፣ ብፍላይ ተጋደልቲ ሳልሳይ ሓይሊ እንዳ ሳበ ደሞዝ ተኸፊልዎም ዝጋደሉ ተጋደልቲ ምምባሮም ኢዩ። በታ ውስንቲ ዓቕመይ ክኣ ንሃገርካ ምግዳልሲ ብደሞዝ ኢለ እጽየፎም ነይረ። ብድሕሪኡ ኣብ ዝቐጸለ መድረኽ እቲ ኩነታት ተቐይሩ ብተ.ሓ.ኤ ተሃሪሞም ካብ ሜዳ ኤርትራ ድማ ከም ዝወጹ ተነጊሩና። ሽዑ ይዝከረኒ ብዓንተብኡ ብደሞዝ ተቖጺሩ ዝጋደል ድኣ ኣበይ ከየትክል ንብል ኔርና፣ ዘይምፍላጥ ሕሱም ድኣ ኮይኑ’ምበር ከምኡ ዘበለና ምኽኒያትስ ኣብ መንጎ ደሞዝተኛን ብዓል ዕላማን ዘሎ ፍልልይ ንጹር ስለ ዝኾነ ኢዩ።

ሎሚ ድኣ ድሕሪ 36 ዓመት እንታይ ኣምጽኦ ክብሃል ይክኣል ይኸውን እወ! ዘምጽኦ ኣምጺእዎ’ሎ። ንሱ ክኣ ዘለናዮ መድረኽ ጉዳይ ሃገርና ኤርትራ ኣብ ኣዚዩ ሓደገኛን ተሃዋስን ቀራና መንገዲ በጺሑ ዘለወሉን፣ ከም ሃገር ንሃሉ ዶ ኣይንሃሉ ኣብ ዘሰክፍ ኩነት ወዲቕና ዘለናሉ ህሞት ምዃኑ ሕልና ንዘለዎ ብሩህ እመስለኒ። ብመንጽሩ ክኣ ብጉልባብ “ምድሓን ሃገር” ዝቀላቐሉ “ኳሓሎ ዝመስሉ ኣንቛሮ” ይርኣዩ ምህላዎም ኢዩ። እዞም ዝጠቐስናዮም ሸነኻት ኩሎም ኣብቲ ብ ህ.ግ.ሓ.ኤ ዝተኻየደ ቃልሲ ንሃገራዊ ናጽነት መስረትን ሓብሓብትን ሓለፍትን ናይታ ብጸላም እንዳተኣከበት ንኽንደይ ንጹሃን ሙሁራን ሃገራውያን ተጋደልቲ ሂወት ብቃጻ ዝበልዐት ሕብእቲ ሰልፊ ዝነበሩ ኢዮም። ካብኦም ክኣ ብዘይካ ሓደ ክልተ ኣብዚ ዝሓለፈ ዓመታት ቃልሲ ኣንጻር ምልኪ ኢዶም ኣጣሚሮም ጥራይ ዘይኮነ አረ ገሊኦምስ ወረ ኣንጻር እዚ ፍትሓዊ ቃልስና ዝነበሩ ኢዮም። ሕጂ ግን ምልካዊ ስርዓት ኤርትራ ብሳላ ቃልሲ ሓፋሽ ብኹሉ መለኪዒታቱ እናተረመሰ ኣብ ዝመጽኣሉ እዋን ኣብ ሓደ ረፍዲ ያእዪ ናብ ናፈቕትን ደለይቲን ፍትሒ ተቐይሮም ንብዓት ሓርገጽ እንተነብዑ መን እሞ’ዩ ክዝንግዓሎም? ምስ እዚ ተኣሳሲሩ ሓደ ከብርሆ ዝደልዮ ንገር እንተሎ ድማ ኣብ ብዙሕ ኣጋጣሚ ካብ ክቱር ምረትን ግፍዕን ስርዓት ኢሳያስ ዝተበገሰ “ ተጋዲልኩም እንታይ ኣምጺእኩም? ዘይ ነዚ ጨካን ኢሳያስ ሓንጊርኩም ዝኣተኹም” ዝብል ኣዘራርባ ይስማዕ’ዩ። ኣብዚ ኣበሃህላ እዚ ሓደ ዘይስገር ሓቂ ኣሎ። ንሱ ኽኣ እቲ ኹሉ ንጹህ ተጋዳላይ ምእንቲ ሃገራዊ ናጽነት ክቃለስን ክስዋእን ከሎ እዞም ትርእይዎም እምበኣር ኢዮም ነዚ ኣረሜን ስርዓት ኣብ ምህናጽን ምሕንጋርን ተዋፊሮም ኣብዚ ደረጃ ዘብጽሕዎ። ኣብ መወዳእታ “ለያቡ ኣብ ምምቕቓል ይብኣሱ” ኮይኑ ነገሩ’ምበር ካብ ኢሳያስ ዝፍለዩ ኣይኮኑን። ሕጂ ኽኣ “ ወዲ ድሙ ነይገድፍ ግብረ እሙ” ከም ዝብሃል ወዮም ብስም “ መድረኽ ንሃገራዊ ዘተ” ዝብል መጸውዒ ዝንቀሳቐሱ ዘለዉ ደቂ ዕቁብ እቲ ነጻልን ኣግላልን ኣመስራርትኦም ከይኣክል እቲ ቅድሚ 36 ዓመት ብደሞዝ ምግዳል ንኽንጽየፎ ዝመሃሩና ረሲዖም ሕጂ ባዕላቶም ሃየ! “ካብ ውሽጢ ህጹጽ ናይ ለውጢ ጠለብ ይድለ ስለዘሎን ንዕኡ ዘተግብሩ ሰባት’ውን ስለ ዘለዉናን ከምኡ’ውን ገንዘብ ካብ ፈተውቲ ረኺብና ስለዘለና” እናበሉ ንግሩሃት እናተሃራረፉን ልዕሊ ኹሉ ክኣ ጸላም ከደኖ ኣኼባታት እናኣካየዱን ኣብ ፈቐድኡ ሰብ ክኸትቡ ይፍትኑ’ለዉ፣ ናይዚ ኣብነት ኣብ ዕለት 19 ጥሪ 2014 ዓ.ም ብኣቶ ዓንደብርሃን ወልደጊዮርጊስ ኣባል እታ ሕብእቲ ሰልፊ ዝነበረን ሕጂ ክኣ መስራትን መራሕን “ትንሳኤ ሕብእቲ ሰልፊ” ዶ ክንብላ “መድረኽ” ኣብ ሰሜን ሎንዶን ብሕቡእ ጸላም ከደኖ ኣኼባ ከምዝገበረ ይፍለጥ። ኣንቱም ሰባት ዝገርም እኮ’ዩ! እዚ ሰብ እዚ’ኮ ትማሊ ትማሊ ንህግደፍ ወኪሉ ኣብ በልጅዩም ኣብ ዝነበርሉ እዋን ኣንጻር ጉጀለ 15 ከድዓትን ተንበርከኽትን እንዳበለ ሰሚናራት የካይድ ከም ዘይነበረ ንዕኡ ይቕሬታ ከይሓተተ ሕብሩ ቀይሩ መጺኡ ሕጂ ተደናጋጺ ሃገርን ደሞክራሲ ክመስል እንተፈተነ “ክሰርቀኒ ዝረኣኽዎስ ክመልሰለይ ነይኣምኖ” ኢዩ ነገሩ።

ኣነ ኣብቲ ሃገራዊ ናጽነት ንምድላይ ን15 ዓመት ኣብ ዉዑይን ዝሑልን መድረኻት ክዋሳእ ከለኹ “ግቡእካ ጥራይ ግበር ድሓር ትሓትት” እናተባሃልኩ ንኽፉን ጽቡቕን ከምዘይረኣኹ ዝሓለፍኩ ሰብ ኢየ። እቲ ምንታይ ከም ኩሎም ስዉኣትን ህልዋትን ተጋደልቲ ድሓን ናጽነት ጥራይ ትምጻእ ካብ ዝብል ንጹህ ሃገራዊ ሕልና ተበጊሰ፣ ይኹን እምበር እዚ ኣተሓሳስባ እዚ ኣብ ምንታይ ደረጃ ኣውዲቑና ክኣ ንርእዮ ዘለና ኢዩ። ሕጂ ክኣ ዝሓለፈ ከይኣክል ኣብ ጉንዲ እዝነይ ብስም’ታ ንእስነተይ ዘብለኹላ ሃገረይ ናይ ጸላም ኣኼባታት እናተኻየደ ከምቲ ን15 ዓመትት ዝተጓነኽዎ ዳግማይ ክጓነ እሞ ሞይትካ ኢኻ ድኣ ዘይብሉኒ? እወ! ኣብዚ ኣበሃህላ’ዚ ካብ ውልቃዊ ስሚዒትን ኣተሓሳሳባን ካብ ብውልቂ ዘይምዕዳመይን ተበጊሰ ዝቃወሞም ዘለኹ ዝመስሎም ሸነኻት ክህልዉ ይኽእሉ ኢዮም። እንተኾነ ብሓጺሩ መልሰይ፣- መሰል ሓደ ከይተኸብረ መሰል ብዙሓት ክኽበር ኣይክእልን ኢዩ። ኢለ ጥራሕ ክሓልፎ እመርጽ።

ክቃለስ ኢየ ዝበለ ብኸምዚ ዝገብርዎ ዘለው ጸላም ከደኖ ነጻልን ኣግላልን ዘይኮነ ብእዉጅን ግሉጽን ኣገባብ ብዝመስሎም ክውደቡ መሰሎም እኳ እንተኾነ ግን ክኣ ብኣንጻሩ ኣቶም ሰብ ሓለፋን የማናይ ኢድ እቲ ስርዓት ዝነበሩን መስረትን መራሕትን እታ ጸሊም ታሪኽ ዘለዋ ሕብእቲ ሰልፊ ታሪኽ ንምድጋም ሕጂ’ውን ኣለና ዝብሉኒ እንተኾይኖም ዋእ! ደጊሞም እሞ ሞይትካ ኢኻ ድኣ ዘይብሉኒ? እምበር ክልተ ሳብ ክጽፋዕ ስለ ዘይኮንኩ ማዕረ እቲ ብቐዳማይ ደረጃ ዝቃለሶ ዘለኹ ስርዓት ህግደፍ ክዋግኦም ምዃነይ በዚ ኣጋጣሚ ከፍልጦም እደሊ እቲ ምንታይ ንግርህነተይን ግርህና ብጾተይን ተበሊጾም ንእስነትና ኣብሊዮም ከይኣኽሎም ሕጂ ክኣ ብሂወተይ ከለኹ ዕድመ ንኡሳን ኣሕዋተይ ክበልዑን ብስም ህዝበይን ሃገረይን ለሚኖም ዲዩ ወይስ ብምትላል መብጽዓ ኣትዮም ብዝረኸብዎ ገንዘብ ሰባት ክሓብሉ ሱቕ ኢለ ክርኢ ዕደ ነስኡ! ብድሆ! ክኣ እብሎም። ካብ ዘመነ ገድልን ድሕሪ ናጽነትን ኣትሒዞም ብስም ማሕበር ረዲኤት ኤርትራ ኣቶ ጳውሎስ ተስፋጊዮርጊሽ (ወዲብዓታይ) ብስም መጽናዕትን ምርምርን ኣቶ ዓንደብርሃን ወልደጊዮርጊስ ካብ ግብረ ሰናይ ማሕበራትን ዝተፈላለያ ናይ U.N ጨናፍርን ሓገዝ ናይ ምሕታት ተመክሮ ዘጥረዩ፣ ሕጂ ድማ ንህልው ጸገም ህዝብና ከም ማና ተጠቒሞም ከም ቀደሞም ሃብቲ ንኸኻዕብቱ ዝገብርዎ ዘለዉ ሃነፍነፍ ኩሉ ክነቕሓሉን ከለልዮምን በዚ ኣጋጣሚ የገንዝብ። እቲ ብስም ስድራ ቤት ኣቶ ዓንደብርሃን ኣብ ቤልጂዩም ተጠሪዩ ዘሎ ገዛ ንብረት ህዝቢ ኤርትራ ምዃኑ ዝረጋገጸሉ ወቕቲ’ውን ርሑቕ ኣይክኸውንን ኢዩ። ንኣቶ ጳውሎስ ወዲ ብዓታይ ወጽዓ ህዝብና ህጡር ቀውዖም ኮይኑ ካብን ናብን ብ first class ticket ሽነን ዝብልሉን ኣብ ብዓል ሓሙሽተ ኮኾብ ሆቴል ዘራጥጠሉ ጸጋ ኮይኑ ክቕጽል’ውን ብፍጹም ኣይንቕበሎን።

ሃረርታናን ባህግናን ንካልኣይ ጊዜ ክጭወ ኣይንፈቅድን።

ክንዕወት ኢና!

ኢሳያስ ኣስፍሃ።