ንሓያለ ሰዓታት ብኣውቶቡሳት ተጓዒዞም ካብ ሊድስ፡ በርሚንግሃም፡ ማንቸስተር፡ ግላስጎ፡ ዝኣመሰላ ከተማታት ዓዲ እንግሊዝን ለንደንን ከባቢኣን ከምኡ ‘ውን ካብ ዓዲ ጥልያን ከተማ ሚላኖ፡ ሽወደን፡ ስቶክሆልም ብነፈርቲ ዝመጽኡ ግዱሳት ኤርትራውያን ደለይቲ ዲሞክራስያዊ ለውጢ፡ ስርዓት ህግደፍ ዝወደቦ ፈስቲቫል ኣብ ዝካየደሉ ዝነበረ ቀጽሪ ተረኺቦም ውዕዉዕ ሰላማዊ ሰልፊ ኣካይዶም።

እቶም 90 ካብ ሚእቲ ብመንእሰያት ዝተዓብለሉ ተቓወምቲ ሰልፈኛታት ኣብቲ ካብ ሰዓት ሓደ ድሕሪ ቀትሪ ጀሚሮም ክሳብ ምሸት፡ ኣብ ኣፋፌት ናይቲ ዕዱማት ህግደፍ ዝኣትዉሉ ዝነበሩ ቀጽሪ ተረኺቦም ዝገበሩዎ ሰልፊ፡ “ ድሕሪ ቐዛፊ መን ተቐዛፊ፡ ኢሳይያስ!…እምቢ ንውልቀምልኪ፡ እወ ንዲሞክራሲ! ንሕና ንህዝብና ህንብና ንዓና! ኢሳይያስ ናብ ቢንቶ፡ ህዝብና ናብ ባይቶ! ምልኪ ይፍረስ፡ ሕጊ ይንገስ፡ ….ዝብሉ ዝርከቡዎም ንውድቀት ዲክታተርያዊ ስርዓት ህግደፍ ከምኡ’ውን ምልዕዓል መንእሰያትን ህዝብን ኤርትራ ዝጽውዑ ዝተፈላለዩ እዋናውያን ጭርሖታት ኣቃሊሖም።

በዚ በሪኽ ሕልናዊ ድምጺ ተቓለስቲ ዝባህረሩ፡ ዝበዝሓ ኣንስትን ሽማግለታትን ዝርከቡዎም ዕዱማት ህግደፍ፡ ደኒኖም እናተዓንቀፉ ናብቲ ኣዳራሽ ክኣትዉ ከለዉ፡ እቶም ሓቦኛታት ኤርትራውያን ከኣ በቲ ዝወዓሉዎ ዕዉት ውዕሎ ናይ ቃልሲ መንፈሶም ክብ ኢሉ ይረአ ነይሩ። ገለ ቅኑዓት ኤርትራውያን፡ ንዓኹም ረጊጽና ድምጽኹም ዕሽሽ ኢልና ኣይንኣቱን ኢሎም ነቲ ናይ ህግደፍ ናይ ሳዕስዒትን ዳንኬራን ውራይ ጠንጢኖሞ ንገዝኦም ክምለሱ ከለዉ፡ ገሊኦም ድማ ኣብቲ ናይ ተቓውሞ ሰልፊ ተጸንቢሮም።

ኣምባሳደር ህግደፍ ተስፋሚካልኤል ገራህቱ በቲ መንእሰያት ኤርትራ ከካይዱዎ ዝቐነዩ ናይ መኸተ ምድላዋት ባህሪሩ፡ ብብዝሒ ብሕታዊ ናይ ጸጥታ ኣባላት ቆጺሩ፡ ንርእሱ ‘ውን ከም ተራ ሰኪሩቲ ኣብ ኣፍደገ ቀጽሪ ቆይሙ ነቲ ዝኣቱ ዝነበረ ሰብ ልክዕ ኣብ መዓርፎ ነፈርቲ ከምዝግበር ተፍትሽ ብስካነር ኣፈትሹ ከኣቱ ኣምስዩ። ካብ ፈለማ ኣትሒዙ ፍሉይ ብዝሒ ናይ ፖሊስ ዝተረኣእየሉ ኣጋጣሚ ኳ እንተነበረ፡ ኣብ ሓደ እዋን እቲ ብመንእሰያት ዝተዓብለለ ሰልፊ ገንፊሉ፡ ነቶም ተተቲዖም ዓጊቶሞ ዝነበሩ ፖሊስያ ጥሒሱ ናብቲ ኣፍደገ ናይቲ ናይ ህግደፍ ኣዳራሽ ሳቮያ ስለዝበለ፡ ዕግርግር ተላዒሉ። ሓደ ካብ መንእሰያት ኣብ ትሕቲ ቀይዲ ኣትዩ፡ ፖሊስ ተደራቢ ሓይሊ ረዲኤት ሓቲቶም፡ ኣስታት 30 ዝኾኑ ዕጡቓታት ሓይልታት ዝርከቡዎም ፖሊስ ተደሪቦሞም። ነቲ ብጎኒ መካይን ዝመላለሳሉ ዝነበራ ጽርግያ ኸኣ ብልዕሊ 15 ዓበይትን ናእሽቱን መካይን ዓጽዮም ድማ ነቲ ኩነታት ክቆጻጸሩዎ ክኢሎም።

እቲ ብመቓልሕ ድምጺ ተቓወምቲ ተዳሂሉ ዝኣተወ ዕዱም ህግደፍ ኣብ ውሽጢ ዘይቅሱን ከምዝነበረ ኣብቲ ኣዳራሽ ኣትዮም ዝወጹ ዜጋታት ሓቢሮም። ሓንሳብ ኣብ ውሽጢ ኣዳራሽ ናይ ሓዊ መጣንቀቕታ (Fire Alarm) ወጪጩ ኳ እንተነበረ፡ እቶም ሰብ ብኡ ኣቢሉ ንገዝኡ ከይከዶም ‘ሞ መሊሱ ኣዳራሾም ጥምዝሕዝሕ ከይብሎም ዝሰግኡ ወከልቲ ህግደፍ፡ ብኣንጻር ሕጊ ጥንቃቐ ሓደጋ ዓዲ እንግሊዝ ሰብ ንደገ ከይወጽእ ኣብ ኣፍደገ ናይቲ ኣዳራሽ ኮይኖም ከምዝዓገቱዎ ገሊጾም። ካብ ህይወት ሰብ፡ እቲ ንፕሮፖጋንዳ ዝደልዩዎ እኩብ ህዝብን ስእሉን እዩ ሰገድሶም ክብሉ ድማ ክዒቦሞም።

ኣብ መወዳእታ ደገፍቲ ህግደፍ ብሓላፊ ስነዳን ምርምርን ህግደፍ ዘምህረት ዮሃንስ ድሕሪ ዝተዋህቦም መግለጺ፡ ሓደ ተኽሊት ዝተባህለ ግዱስ ኤርትራ ዜጋ፡ መንእሰይ ኤርትራ ስለምንታይ ናብቲ ከም ጸላኢ ዝዋግኦ ዝነበረ ስርዓት ኢትዮጵያ ይስደድ ከምዘሎ፡ ብዓል ቀዛፊ ን42 ዓመታት ዝሃነጹዎ ሕጂ እንታይ ኮይኑ ከምዘሎ ትርእዩዎ ኣለኹም፡ ብዛዕባ እቲ ቀንዲ ኣብ መንእሰይ ወሪዱ ዘሎ ሽግር፡ ኣብ ባሕሪ ዝሓርሳ ሰለዋ ነብሰጾርት ስለምንታይ ዘይትዛርቡ  ኢልዱ ድሕሪ ዘቕረበሎም ከቢድ ሕቶ፡ ዝበዝሐ ሰብ ከጣቕዕ ከሎ፡ ገለ ልኡኻት ህግደፍ ግን ኣብ መንጎ ማይክሮፎን መንጢሎም ከምዝሃረሙዎ፡ ሰኪሩቲ ከምዘድሓኑዎ ኣብቲ ኣዳራሽ ዝነበሩ ዜጋታት ብቴለፎን ሓቢሮም።  ሕቶ ብድምጺ ንምስማዕ ኣብዚ ጠውቑ፡ኣብ ውሽጢ ኣዳራሽ ህግደፍ ዝቐረበ ሕቶ ብድምጺ

ነቲ ብተቓወምቲ ዝተኻየደ ሰላማዊ ሰልፊ ልዕሊ 600 ኣብ መላእ ዓለም ዝርከቡ ግዱሳት ኤርትራውያን ብኤለክትሮኒካዊ መኣዲ ዘተ ፓልቶክ ብቐጥታ ይከታተሉዎ ከምዝነበሩ ‘ውን ይፍለጥ።