ኩልና ከም ንፈልጦ እዞም ኣብ ሃገርና  ዝገዝኡ ዘለዉ  ጃንዳ ካብቲ ሓሳድ ባህርያቶም፣ ዜጋታት ነብሶም  ኪኢሎም ካብ ተጸባይነት ወጺኦም ናብርኦም ክመርሑ ምስ ዝፍትኑ ከመይ ገይሮም ብተላኣኣኽቶም ኣቢሎም ሸርሕታት እናመሃዙ ዓዲ ከም ዘውዕልዎምን ከም ሳዕቤኑ ክኣ ተስፋ ቆሪጾም ሃገሮም ገዲፎም ሃጽ ከም ዘብሎዎምን ኣብዚ ዓሰርተታት ዓመታት ዘመነ ምምሕድዳሮም ዝተዓዘብናዮ ነገር’ዩ። ምኽኒያት ናይ’ዚ ርኹስን ጽዩፍን ተግባር ክኣ “ወይ ዝበሉኻ ግበረሎም ወይ ክኣ ዓዶም ዘይኮነ ዓድኻ ግደፈሎም” ብዝዓይነቱ ምእዙዝ ኮይንካ ንኽትግዛኣሎም ዘገድድ ተግባር ኢዩ። እዚ ስለ ዝኾነ’ምበኣር’ዩ እቲ ሕሉፍ ንዕቀቶም ሰማይ ስለ ዝዓረገ ድማ ከምዚ ኩልና እንዕዘቦ ዘለና ኣብ ዝተፈላለያ ከተማታትን ዓድታትን ዜጋታት ካብ ዘይብሎም ጨቖቕ ኢሎም ዝሃነጽዎ ኣባይቲ፣ ንኸስርሕዎ ፍቓድ ከም ዘይሃብዎም ተገምጢሎም ካብ ፕላን ወጻኢ ዝተሰርሕ’ዩ እናተባህለ ኣብ ጨው ቀትሪ ብዶዞራት ሃደሽደሽ ዘብልሎም ዘለዉ። እዚ ሓደ ድሕሪ ሓደ ወሰን ኢሉ ዝቕጽል ዘሎ ምፍራስ ኣባይቲ እምብኣር ኣብዚ ዝሓለፈ ኣዋርሕ’ውን  እብረ ከተማ መንደፈራ በጺሑስ  ዝተፈላለዩ ህንጻታት ኣብ ምፍራስ ድሕሪ ምውፋሮም ናይቲ  ኣብ ስፖርት ዓለም ብፍላይ ክኣ ኣብ ቅድድም ጉያ እግሪ ናይ ዓሰርተ ሽሕ ሜተር ተሸላሚ ወርቂ መዳሊያ ብምዃን ስሙን ስም ሃገሩን ክብ ኣቢሉ ዘጸወዐ ቦኽሪ ሓበና ኣትሌት ዘርእሰናይ ታደሰ ብምምሕዳር ዞባ ደቡብ ያእዪ ከም መተባብዒ ተባሂሉ ዝተዋህቦ’ሞ ዘይተኣደነ ገንዘብ ኣውጺኡ ዝሃነጾ ዘመናዊ ህንጻ እንሆ ከም ሰቡ ብዶዞራት ህ.ግ.ደ.ፍ ሓዶሽዶሽ ኢሉ ምስ ዓነወ ዘርኢ ስእሊ፣ ስለዚ እዚ ስርዓት እዚ ሕጂ’ውን እቲ ሓሳድ ናይ ምዕናው ተግባራቱ ገና ይቕጽሎ’ዩ ዘሎ። ኣማስያኡ ክኣ በዚ ዝኸዶ ዘሎ ኩሉ ኣተናኡ ሓንቲ ዝዓነወትን ዝተደነሰትን  ሃገር ገዲፉ እንተጠፈአ ፋዓራ የብሉን’ሞ ካብዚ ንምድሓን ኩሉ ደላይ ፍትሒ ኢየ ዝብል ፍልልያቱ ኣጽቢቡ ካብ ኩሉ እዋን ንላዕሊ ሎሚ ሃገር ንምድሓን ክሰምር በዚ ኣጋጣሚ እጽውዕ።

ምልኪ ከልግስ ኩልና ንገስግስ!

ኢሳያስ ኣስፍሃ።