ኣብ መንገዲ ኣየር ኤርትራ ክሰርሑ ዝጸንሑ ልዑል ብቕዓት ዘለዎም ኣርባዕተ ምኩራት ናይ ኣየር ተክኒሻናት ኣብዚ ቕንያት’ዚ ኣብ እስራኤል ዑቕባ ሓቲቶም።

እዞም ካብ 9 ክሳብ 20 ዓመታት ኣብ መንገዲ ኣየር ከገልግሉ ዝጸንሑ ስርዓት ህግደፍ ንዝለዓለ ትምህርቲ ናብ እስራኤል ዝለኣኾም ካብ ዕለት 31 ግንቦት ክሳብ 4 ሓምለ ብ I.A.A. BOING 667 ዝተባህለ ትካል ዝተዋህቦም ስለጠና ድሕሪ ምውዳእ ፖለቲካዊ ዑቕባ ዝሓተቱ ኤርትራውያን ክኢላታት፣

1.ኢንጂነር ሕድሩ ባርኖባስ

2.ዑመር ዓሊ

3.ተስፉ

4.ምኪኤለ ዝብሃሉ ኢዮም።

እቲ መሳርሒ ዓመጽ ክጥቀመሎም ዝጸንሐ ምልካዊ ስርዓት ህግደፍ ክምለሱዎ ብሃንቀውታ ክጽበዮም እኳ እንተጸንሐ፣ እቶም ጨፍላቒ ምሕደራኡ መሪሩዎም ዝጸንሐ ዜጋታት፣ ነቲ ብዙሕ ግዜ ዝተጸበዩዎ ዕድል ብዘይነግፈረግ ተጠቒሞም ነቲ ስርዓት ከምዝራሕርሑዎ ይገልጹ። ክእለቶምን ብቕዓቶምን መሳርሒ ጭፍለቓ ናይቲ ዘይሓላፍነታዊ ስርዓት ህግደፍ ክኸውን ሕልኖኦም ስለ ዘይፈቐደሎም ዑቕባ ክሓቱ ከም ዝተገደዱ ‘ውን ኣብሪሆም።

ኣብ እስራኤል ዝርከቡ ኤርትራውያን ደለይቲ ፍትሒ ምሉእ ምትሕብባር ይገብሩሎም ከምዘለዉ ተፈሊጡ ‘ሎ።

ኣብቲ ስልጠና ዝተሳተፉ ኤርትራውያን ቴክኒሻናት ብድምር ሽውዓተ (7) ክኾኑ ከለዉ፣ ብዘይካ ‘ዞም ዑቕባ ዝሓተቱ ኣርባዕተ፣ እቶም ሰለስተ ንኤርትራ ተመሊሶም ኣለዉ።