ናብ ትማሊ ቀዳም 6 ሰነ ኣብ ዘውግሐ ለይቲ፣ ኣብ ትግራይ፣ ሕንጻጽ ኣብ ዝተባህለ ኤርትራውያን ተዓቝቦሙሉ ዝርከቡ መዓስከር ስደተኛታት፣  ሓደ ኣብ ጥቓ እቲ መዓስከር ካብ እትርከብ ሕንጻጽ ዝተባህለት ዓዲ ምስ ብጾቱ ናብታ መዓስከር ለይቲ ሰዓት ክልተ ኣትዩ  ክሰርቕ ረኺብናዮ ብዝብል ምኽንያት እቶም ኤርትራውያን ስደተኛታት ብዘውረዱሉ ማህረምቲ ዝተሃስየ ዕድሚኡ ብልክዕ ዘይፈለጥናዮ መንእሰይ፣ ኣብ ሕክምና ምስ በጽሐ ድሕሪ ምማቱ፣ ኣብ መንጎ ተቐማጦ ህዝቢ ሕንጻጽን መዓስከር ስደተኛታት ሕንጻጽን ምትፍናን ከምዝወዓለ ምንጭታት ንኣሰና ሓቢሮም።

ብመሰረት እቲ ሓበሬታ፣ ብሞት ናይቲ መንእሰይ ዝተጠርጠሩ ካብ 10 ንላዕሊ ኤርትራውያን ስደተኛታት ተኣሲሮም ኣለዉ።  ኣብቲ ስርቂ ዝተሳተፉ 2 ትግራዎት ብፖሊስ ክተሓዙ ከለዉ፣ ሓደ ካልእ ምስኣቶም ኣብ ስርቂ ዝተዋፈረ ኣብቲ መዓስከር ዝቕመጥ ኤርትራዊ ‘ውን ከቢድ ማህረምቲ ከዝበጽሖ እቲ ሓበሬታ የረድእ።

እቲ መንእሰይ ድሕሪ ምማቱ፣ ህዝቢ ናይቲ ዓዲ ኣብ ልዕሊ ‘ቶም ኣብቲ መዓስከር ዘለዉ ኤርትራውያን ስደተኛታት መጥቃዕቲ ክፍጽም ‘ኳ እንተተበገሰ፣ ኣብቲ ከባቢ ዝርከቡ ፖሊስ ተኣኻኺቦም፣ “ ኢትዮጵያዊ ስለዝኾነ ዘይኮነስ፣ ክሰርቕ መጺኡ ኢሎም እዮም፣ ሃሪሞሞ ሕማቕ ኣጋጣሚ ኮይኑ ድማ ሞት ኣጋጢሙ” ኢሎም ብምዕጋት፣ ነቶም ስደተኛታት ‘ውን ጀነሬተራቶም ኣጥፊኦም ምንቅስቓድ ደው ብምባል ኣብ ቴንዳታቶም ክውዕሉ ብምሕባር ነቲ ምትፍናን ከምዝተሃዳድኡዎ እቶም ምንጭታት ኣገንዚቦም።

ሎሚ ህዝቢ ናይቲ ዓድን ካብ ምዓስከር ስደተኛታት ሕንጻጽ ዝመጹ ወከልቲ ናይቶም ኤርትራውያን ስደተኛታትን ኣብ ዝተረኽቡሉ ኣጋጣሚ ስነስርዓት ቀብሪ ናይቲ መዋቲ ከምዝተፈጸመ ‘ውን ተፈሊጡ።

ብዙሓት ኤርትራውያን ስደተኛታት ብቐጻሊ ናብ ሱዳን ገጾም ስለዝኸዱ፣ ክብ ለጠቕ ዝብል ኳ እንተኾነ፣ ኣብ መዓስከር ስደተኛታት ሕንጻጽ ብገምጋም ኣስታት 10 ሽሕ ኤርትራውያን ስደተኛታት ከምዘለዉ ይግለጽ።