ብ ወርሒ ሰነ 2009 ኣብ ዊዓ ተኣሲሮም ዝነበሩ ልዕሊ 400 ኤርትራውያን ጠያይጢ እናተተኮሰሎም ጽኑዕ ሓለዋ ፈንጢሶም ከምዘምለጡ፡ ኣብቲ እዋን’ቲ ኣብ ኣሰና ከም ዜና ኣቕሪብናልኩም ኔርና። ኣብ ናይ ጽባሕ ሰኑይ ድምጺ ኣሰና መደብና፡ ንሓደ ካብ ወጠንትን መራሕትን ናይቲ ደማዊ ግን ከኣ ዕዉት ጅግንነታዊ ስርሒት- ሓርነት፡ መንእሰይ ሳሙኤል ብርሃነ ከነቕርበልኩም ኢና።

ንዓና ንኣሰና፡ ካብ እንብገስ ክሳብ ሕጂ ብቐጻሊ ኣጽኒዕና ዝሓዝናዮ እምነት፡ ኣብ ኤርትራ ብኤርትራውያን ክግበር ዘይከኣል ነገር ከምዘየልቦ እዩ። ንዓና ኣዝዩ ዘገርመና፡ ጽውጽዋይ ዝኾነና፡ ኣብ ኤርትራ ምንቅስቓስ ሓይልታት ምክልኻል ክግበር ከሎ፡ ሳእኒ ዘይብሎም እሱራት መንእሰያት ናይ ዕጡቓት ከበባ ፈንጢሶም ከምልጡ ከለዉ ዘይኮነስ፡ እቶም ካብቲ ናይ ጅግንነት መሬት ዝበቖሉ፡ ንርእሶም ውዑይን ዝሑልን ዝረኣዩ ኤርትራውያን መንእሰያት፡ ጅሆ በደዊን ኮይኖም ኣብ ሲናይ ተገፊዖም ብውርደት ክሞቱ ከለዉ እዩ።

ንዓና ንኤርትራውያን ኣብዚ እዋንዚ ካንሰር ኮይኑ ደኒሱ፡ ናይ ሞት እምበር ናይ ትንሳኤ ዕድል ከምዘይብልና ኣምሲሉ ኣብ ቅብጸት ከንብረና ዝጸንሐ ቀንዲ ሕማም፡ ርእሰ ተኣማንነት ምጥፋእና እዩ።

መቸም፡ እቶም ብኣንጻር’ዚ “ኣብ ኤርትራ ክግበር ዘይከኣል ነገር የለን” ዝብል እምነትና፡ “ኣብ ኤርትራ ክግበር ዚከኣል ነገር የለን” ዝብል ሬሳ ኣተሓሳስባ ዝጸንሓኩምን ዘለኩምን ገለ ኣሕዋት፡ ድሕሪ ስርሒት ፎርቶ 21 ጥሪ ሬሳኹም ቀቢርኩሞ ክትህልዉ ተስፋ ንገብር። ወዲ ዓሊ ካብ መጎተ ኣድሒኑና ‘ሎ። እቲ “መንእሰያት ኤርትራ ፈጺሞም ተኻኢሎም ኢዮም፡ ሞራል፡ መዓንጣን ጅግንነትን የብሎምን” ዝብል ኣረኣእያ ‘ውን ብተመሳሳሊ በዚ ጽባሕ እነቕርቦ ዛንታ ቖራጽነት ‘ቶም ኣብ ገዛእ መሬቶም፡ ምሩኻት ናይቲ ዘገልገሉዎ ሃገርን ዝተሰርዑሉ ሰራዊትን ኮይኖም ዝጸንሑ ‘ሞ፡ ንሓርነት ብፈታንን ጸቢብን መንገዲ- ትብዓት ዚረኸቡዋ ኣብነታውያን መንእሰያት ኤርትራ ድሕሪ ምቕራብና ክቃነ (ክተዓራረ) ተስፋ ንገብር።

ኣብቲ ልዕሊ 40 ዲግሪ ሰንት ግሬድ ዝምቖቱ ኣጻምእ ዊዓ፡ መግዛእቲ ጥልያን ንህዝቢ ፎሮ ማይ ንምስታይ ኢሉ ዝሰርሖ፡ ምልካዊ ስርዓት ኢሳይያስ ግን ንማሕዩር ኣማኢት ኤርትራውያን መንእሰያት ዝበሃጎ ባስካ ተሓይሮም ዝነበሩ 456 መንእሰያት ጥራይ እግሮም ዕጡቓት ሓለዋ ስርዓት ህግደፍ ፈንጢሶም ነብሶም ሓራ ካብ ኣውጽኡ፡ እታ ዓሰርተታት ኣሽሓት “ዕጡቓት- ገላዩ” መንእሰያት ዘለዉዋ ኤርትራ ካብ መግዛእቲ ናይዚ ፋሺሽታዊ ስርዓት ኢሳይያስ ሓራ ዘይትኾነሉ ምኽንያት እንታይ እዩ? ዋላ ሓንቲ!! ኣሕዋት ኤርትራውያን፡ ርእሰ-ምትእምማንናን፡ ሕድሕድ ምትእምማንናን እንተመሊስናዮ፡ ሕጂ ‘ውን ኣብ ኤርትራ፡ ብኤርትራውያን ዘይኸውን ነገር የልቦን።

ጽባሕ ሰኑይ ኣብ ራድዮ ኣሰና ካብ ቃሉ ክሳብ ትረኽቡዎ እምበኣር፡ ሳሙኤል ብርሃነ፡ ብ21 ለካቲት 2013 ኣብ ሳንዱቕ ርእይቶ ኣሰና ዝገደፈልና፡ ናይ ምርኻብ ኣጋጣሚ ዝፈጠረልና መልእኽቱ ከምዚ ዝስዕብ እዩ፡ ጥዓሞት ይኹንኩም።

ሰላም ኣሰናውያን ከመይ ኣለኹም። ካብ ዝገርመኩም፡ ሎሚ መዓልቲ ናይ ዝሓለፈ ሰነዳትኩም ገንጺለ ኣብ ዘንብበሉ ዝነበርኩ እዋን፡ ሓደ ዓቢ ደስ ዘብል ዜና ኣንቢበ (400 እሱራት ካብ ዊዓ ኣምሊጦም ዝብል)። ቀጺሉ ኸኣ ኣብ ውሽጢ ሃገር ስለዝተበተኑ ከይተሓዙ ስግኣትኩም ገሊጽኩም። ናይ ብሓቂ ደስ እተብል መዓልቲ ሰነ 15 2009፡ ልክዕ ፍርቂ ለይቲ ኣብኡ ተዳጕንና ዝነበርና 400 ዘይኮና፡ 456 እሱራት ታሪኽ ዚሰራሕናላ መዓልቲ እያ። ኣጆኹም ኣይትፍርሑ እንትርፎ ውሑዳት መብዛሕትና ኣብ ውሑስ ቦታ ንርከብ ኣለና። ኣነ ቅጽል ስመይ “መሓመድ ሻጥር” ይብሃል። ሓደ ካብ ወጠንትን ተግበርትን መራሕትን ናይቲ 3 ወርሒ ዝወሰደ ስርሒት እየ። ኣድላዪ እንተኾይኑ፡ ካብ ኣጀማምራኡ ክሳብ መወዳእትኡ ጽቡቕ ገይረ ከብርሃልኩም ይኽእል እየ። ምኽንያቱ ቅያ ታሪኽ ብረትን ጫማን ዘይብሉ ኣንጻር ብረት ገጢሙ ዝተዓወተሉ ጽፉፍ ስርሒት ስለዝኾነ፡ ካብዚ ናትና ስርሒት ጭኩን መንእሰይ ኤርትራ ብዙሕ ክመሃር ስለዝኽእል፡ ግዜ ከይከደ ኣስማት ኣብ ምርሳዕ ከይተበጽሐ ክዝንቶ ደስ ምበለኒ። የቐንየለይ።