ዜናታት ውሽጢ ሃገር

ኣስመራ፡

ኣብ ዘመን ውርውራ ነብስካ ኣይተዕብራ ዝበሃለሉ ኩነት ኣብ ኤርትራ ብኣባላት ህግደፍን መሳርሕቶምን ብቑሉዕ ይረኣ ከም ዘሎ ካብ ኣስመራ ዝበጽሓና ዜና ኣፍሊጡ። ምግፋጥ ንብረትን ገንዘብን ኣካይድካ ናብ ወጻኢ ምስዳድን፡ ከምኡ’ውን መነባቡሮኻ ኣደልዲልካን ኣውሒስካን ንምህዳምን ብብዙሓት ልሉያት ኣባላት ህ.ግ.ደ.ፍ ምቅርራብ ይኸይድ ካም ዘሎ ዝሕብሮ ሓያሎይ ምልክታት ኣብ ቃልዕ ይርአ ምህላዉ እቲ ዝበጽሓና ዜና ሓቢሩ። ብተወሳኺ ድማ፡ ብዙሓት ናይ ህግደፍ ናይ ጸጥታ ኣባላት ዝነበሩ፡ ላዕለዎት ሰበ ስልጣን ህግደፍ ኣብ ነንሕድሕዶም ተማቒሎሞም ፡ በብሓደ ወይ’ውን በብ ክልተ ገይሮም ነጋዶ ኣምሲሎም ኣብ ምምሕልላፍ ገንዘብን ወርቅን ይጥቀምሎም ከም ዘለዉን፡ ካብ ሃገር ክወጹ ከለዉ’ውን ስልጣኖም ተጠቒሞም ብዘይ ፍተሻ ከም ዝወጹ ገይሮም፡ እቲ ሒዘሞ ዝወጹ ገንዘብን ወርቅን ኣብ ዝተፈላለየ ሃገራት ተጠቒሞም ንብረት እናገዝኡ የዋፍርሙሎም  ምህላዎም ተረጋጊጹ። ብትካላት ናይ ስርዓት ህ.ግ.ደ.ፍ ዋላ’ውን ንይምሰል፡ ነዚ ርኡይ ብልሽውና ዝቍጻጸር ይኹን ዝግደስሉ ኣካል ከም ዘየሉ’ውን ተፈሊጡ።  ኣብ’ዚ ክጥቀስ ዝግበኦ፡ እቲ ዝወጽእ ዘሎ ብኪሎታት ዝግመት ወርቂ (Gold Bars) ናይ ኤርትራ ኮይኑ ካብ ሱዳን ከም ዝኣተወ ኣምሲልካ ናይ ሓሶት ናይ ቀረጽ ቅብሊታት ኣዳሊኻ ናብ ሃገራት ወሽመጥ ዓረብ ኣብ ጸሊም ዕዳጋ ይሸየጥ ምህላዉ ተረጋጊጹ። ብተወሳኺ ናይዚ’ውን ንብረትን ኣባይትን ናይ መንግስቲ ዝበሃል ብውሽጢ ውሽጢ እናተሸጠ ይኹን ወይ ብስም ኣዝማድ ናይ’ቶም ላዕለዎት ሰበ ስልጣን እናተመዝገበ ናይ ምምሕዳር ትካላት ኩሉ ቦኽቢኹን ዓኒዩን ምህላዉ ተሓቢሩ። ካብኡ ሓሊፉ፡ ታርጋታት መካይን መንግስቲ ተመንዚዑ ናብ’ዞም ናይ ኮንተሮባንዶ ሸቃጦ ይሽየጥ ከም ዘሎ’ውን እቲ ዝበጽሓና ዜና ብተወሳኺ ኣረጋጊጹ።

ምዕራብ ኤርትራ፡

ስርዓት ህግደፍ ስልጣን ካብ ዝሕዝ እትሒዙ ኣብ ልዕሊ ህዝብና ከካይዱ ዝጸንሐ ናይ ምጽናት ፖሊሲኡ ጌና ብዝበኣሰ ኣገባብ ይቕጽሎ ምህላዉ ተፈሊጡ። ስርዓት ህ.ግ.ደ.ፍ. ድሕሪ  ናይ ነዊሕ ዓመታት ናይ መንእሰያት  ናይ ኣስገዳድ ዕስክርና፡ ሕጂ’ውን ኣብ ልዕሊ  60ታት ዝዕድሚኦም ወለዲ፡ ንታዕሊም ብዝብል ምኽንያት ናብ ዲፋዓት ገጹ ይጓርቶም ምህላዉ ካብ ምዕራብ ኤርትራ ዝበጽሓና ዜና ሓቢሩ።  ስርዓት ህ.ግ.ደ.ፍ ኣቐዲሙ፡ ካባቢኹም ንምሕላው ክትበቕዑ ኣብ ትሕቲ ዝብል ምስምስ ብረት እዕጢቕዎም ከም ዝነበረ ዝዝከር ኮይኑ፡ ሕጂ ግን ንታዕሊም ብምባል  ካብ ኩለን ዞባታት ብምእካብ  ናብ ከባቢ  ሽላሎ ፣ዓዲ ሃኪን፣ ማይ ቆቓሕ ብምዝርጋሕ፡ ናይ ደቆምን ደቂ ደቆምን ከይኣክል፡ ንነብሶም ኣብ ዘይሓሰብዎ ሃለዋት ኣቲዮም ምህላዎም ተፈሊጡ። ዕድል ናይ ምምላጥ ዝረኸቡ ከኣ፡ ብረቶም  ደርብዮም  ናብ ኢትዮጵያ  ይኹን  ናብ ሱዳን ከምኡ’ውን ንድሕሪት ንዓዶም ገጾም  ይሃድሙ ምህላዎም’ውን ተረጋጊጹ።  

ህዝቢ ኤርትራ፡ ዕድሚኡን ጾቱኡን ብዘይገደስ፡ ሃገሩ ራሕሪሑ ናብ ስደት ገጹ ሃጽ ክብል ዝድርኽ ዘሎ ስርዓት፡ ኤርትራ ህዝባ ክጸንትን መሬታ ክባድምን፡ መሪሕነት ህ.ግ.ደ.ፍ. ብመደብ ተተሓሒዝዎ ዘሎ ውዴት ምዃኑን ከም ጸሓይ ቀትሪ በሪሁ ምህላዉ እናተረጋገጸ ይከይድ ኣሎ።

ዓዲ ቐይሕ፡

ኣብ ዝሐለፈ ሓጺ እዋን ዝዘርጋሕናዮ ናይ ውሽጢ ሃገር ዜና ተጠቒሱ ከም ዝነበረ፡ ስርዓት ህ.ግ.ደ.ፍ. ከም ኣመሉ ብዘይ ዝኾነ ይኹን ርህራሄን ናይ ህዝቢ ሓልዮትን፡ ብዕለት 04/03/2015 ኣብ ከተማ ዓዲ ቀይሕ ኣባይቲ ከፍርስ ጀሚሩ ምሃላዉን ብሰንኪ’ዚ ኢሰብኣዊ ተግባር’ዚ ድማ ኣብ ውሽጢ ህዝብና ከቢድ ነውጽን ቅልውላውን ተፈጢሩ ምህላዉ ካብ’ቲ ቦታ ዝበጽሓና ሓበሬታ ኣረጋጊጹ። ነዚ ተግባር’ዚ ብምቅዋም፡ ነባሮ ዓዲ ቀይሕ ብፍላይ ድማ ተመሃሮን መንእሰያትን ሎሚ ንግሆ ዕለት 05/3/2015 ኣብ ጎደናታት ብምስላፍ ምስ ሓይልታት ጸጥታን ሰራዊትን ኣብ ጥምጥም ኣቲዮም ምህላዎም እቲ ዜና ደጊሙ ኣረጋጊጹ። ከም ውጽኢት ናይ’ዚ ድማ፡  ሰለስተ መንእሰያት ብጥይት ክቕተሉ ከለዉ ሓንቲ ጓል ኣንስተይቲ ድማ ብመኪና ናይ ሓይልታት ስርዓት ህ.ግ.ደ.ፍ ተረጊጻ ህይወታ ከም ዝሓለፈ ተረጋጊጹ። ኣብ’ቲ ቦታ ዝረከቡ ሓለፍቲ ስርዓት ህ.ግ.ደ.ፍ. ናዕቢ ናይ ህዝቢ ካብ ቁጽጽሮም ወጻኢ ይኸይድ ምህላዉ ኣመልኪቶም ናብ ላዕለዎት ሓለፍቶም ጸብጻብ ኣልዒሎም’ኳ እንተኾኑ፡ ዝመጾም መልሲ ግን፡ “እቲ ህዝቢ ኣበይ ከይበጽሕ ዕማምኩም ስቕ ኢልኩም ቀጽሉ” ዝብል ከም ዝነበረ እሙናት ምንጭታትና ኣረጋጊጾም። እቲ ናዕቢ ይቕጽል ምህላዉ ድማ ተፈሊጡ።

“ድሕነት ህዝብን ሃገርን ልዕሊ ኩሉ” !!

ቤት ጽሕፈት ዜናን ባህልን ግ.ሃ.ድ.ኤ.

05/03/2015