ኣብ ሊብያ ምስራታ ኣብ ዝተባህለ ቤትማእሰርቲ ተኣሲሮም ካብ ዝርከቡ ልዕሊ 650 ኤርትራውያን ስደተኛታት፣ ተተኮስቲ ናብ መካይን ክጽዕኑ ዝተገደዱ ደቂ ተባዕትዮ ብዝተፈንጀሮም ቦምባ ከቢድ ብረት ይኹን ነታጕ ዛጊት ዘይተረጋገጸ ተተኳሲ 7 ክውግኡ ከለዉ፣ ዝሞቱ ክህልዉ ከምዝኽእሉ፣ ነቶም ቁሱላት ደቂ ተባዕትዮ ብዓይነን ዝረኣያ እሱራት ደቀንስትዮ ምስ ድምጺ ኣሰና ኣብ ዝገበራኦ ዝርርብ መስኪረን።

ብመሰረት ሓበሬታ ናይተን ደቀንስትዮ፣ እቶም ኣብ ሓደ ቤትማእሰርቲ ተፈልዮም ተታሒዞም ዘለዉ ልዕሊ 200 ኤርትራውያን፣ ተተኳሲ ክጽዕኑ በቶም ሓለውቶም ተሰንዮም ክወፍሩ ከምዝቐነዩ ብምምልካት፣ ሎሚ ብዘጋጣሞም ሓደጋ 7 ቁሱላት ሒዞም ናብቲ ቤትማእሰርቲ ክምለሱ ብዓይነን ከምዝረኣያ ኣገንዚበን። ዝሞቱ ‘ውን ከምዘለዉ ኣመት ‘ኳ እንተሃቡወን፣ ከይስንብዳ ምእንቲ ብልክዕ ከምዘይሓበሩወን ኣረዲአን።

ሓንቲ ካብተን ሓበሬታ ዝሃባ እሱራት፣ “እቶም ግዳይ ሞትን መቝሰልትን ኮይኖም ዘለዉ፣ ኣሕዋትና ሰብኡትና እዮም፣ ደም እናፈሰሱ ክኣትዉ ምስ ረኣናዮም ካኣ ሰንቢድና ብጋሂ ከነእውን ክንውጭጭን ውዒልና፣ በጃኩም ዝወርደና ዘሎ መዓት ንዓለም ሓብሩልና” ኢላ።

እዞም ካብ ሞት ክሃድሙ ክብሉ ኣብ ዘይፈልጡዎ መሬት ኣብ ማሕዩር ዝርከቡ ግዳያት፣ ተገዲዶም፣ ሊብያውያን ኣብ ዘካይዱዎ ዘለዉ ውግእ ሕድሕድ ብምስታፍ፣ ኣብ ሞትን መቝሰልትን ክበጽሑ ዓቢ ገበን እዩ። መንግስቲ ሊብያ ይኹን እቶም ነቲ ተልእኾ ዝፍጽሙ ዘለዉ ጉጅለታት ከኣ በዚ ኢሰብኣዊ ተግባር ክኹነኑን ክኽሰሱን ይግባእ።

እዞም ብሱዳን ናብ ሊብያ ድሕሪ ምእታዎም ኣብ ብሎኮታት ብመንግስቲ ሊብያ ተታሒዞም ኣብ ቤትማእሰርቲ ምስራታ ተዳጕኖም ዘለዉ፣ ሰለስተ ነፍሰ ጾራት ዝርከባአን ኣስታት 450 ደቀንስትዮን ቆልዑን፣ ልዕሊ 200 ደቂ ተባዕትዮን ክሳብ 3 ወርሒ ዝተኣሰሩ ክኾኑ ከለዉ፣ ኣንፈቶምን መጻኢኦምን ጠፊኡዎም፣ ዓቕሎም ጸቢቡዎም ከምዘሎ የንገዝቡ።

ኣብ ወጻኢ እንርከብ ኤርትራውያን፣ ነዞም ካብ ሃገሮም ብምልካዊ ስርዓት ተገዲዶም ዝተበታተኑ፣ ኣብ ወጻኢ መላገጺ ነጋዶ ሰብን ገላዩ ውዱቓት ስርዓታትን ዝኾኑ ዘለዉ፣ ሓላዪን ወካልን ዘይብሎም መሳኪን ግዳያት፣ ንዘይመንግስታውያን ማሕበራትን መንግስታት ዓለምን ብምሕባርን ብምትሕስሳብን ክንረድኦም ግቡእን ሓላፍነትን ከምዘለና ክንዝክር ይግባእ።