ኣብ ሊብያ፣ ከተማ ትሪቡሊ፣ ኣብዚ ሰዓት’ዚ ውግእ ሕድሕድ ኣብ ዝካየደሉ ዘሎ ቦታ ኣስታት 700 ኣብ ቤትማእሰርቲ ዝጸንሑ ኤርትራውያን ስደተኛታት፣ ብኹሉ ኩርናዓት ብውግእ ተኸቢቦም፣ ህይወቶም ንምድሓን ናብ ዘብሉዎ ጠፊኡዎም ኣብ ከቢድ ራዕዲ ይርከቡ ከምዘለዉ ኣብቲ መዋጥር ዝርከቡ መሳኪን ኤርትራውያን ግዳያት ብቴለፎን ኣብ ዝሃቡና ሓበሬታ ኣፍሊጦም።

ንሳቶም ልዕሊ 300 ካብኣቶም ነብሶም ንምድሓን ፈቖድኡ ከምዝተበታተኑ ክገልጹ ከለዉ፣ ሓያለ ደቀንስቶ ከምዝተዓመጻ፣ ልዕሊ 20 ደቂ ኣንስትዮ በቶም ነቲ ቤትማእሰቲ ዝተቖጻጸሩዎ ተቓወምቲ ምስተወስዳ ድሃየን ከምዘይፍለጥ ኣገንዚቦም።  ኣብ ዝተፈላለየ ኩርናዓት ዘለኹም ግዱሳት ኤርትራውያን ነዚ ህጹጽ ኩነታት ኣመልኪትኩም ንመንግስታውያንን ዘይመንግስታውያንን ማሕበራት ብምሕባር እዞም ግዳያት ዑቕባ ዝረኽቡሉ ኩነታት ኣብ ምፍጣር ክተሓባበሩ ንጽውዕ።

እቶም ግዳያት ናይ ደቀቕትን ከቢድ ብረትን ቶኽሲ ኣብ ከባቢኦም እናተሰምዐ ቅድሚ ሒደት ደቓይቕ ዝሃቡና ናይ ቃል ምስክርነት ጸኒሕና ብድምጺ ከነቕርብልኩም ኢና።