ልኡኻት ምልካዊ ስርዓት ኢሳይያስ ኣብ እስራኤል፣ ነቶም ብምኽንያት ትንሳኤ ናብ የሩሳሌም ዝገሹ ኤርትራውያን ነጋድያን ኣቦታትን ኣዴታትን፣ ብጽዑቕ መደባት ከምዝጽመዱ ብምግባር፣ ምስቶም ብኽንደይ መስገደልን ስቓይን ዝተሰዱ ኣብ እስራኤል ዝርክቡ ደቆም ከሕልፉዎ ዝግብኦም ግዜ ብሜላ የጻብቡሎም ከምዘለዉ ምንጭታት ካብ እስራኤል ሓቢሮም።

ልኡኻት ናይቲ ስርዓት ከም መቐጸልታ ናይቲ እቶም ናይ ተቓውሞን ለውጥን መንፈስ ዘለዎም ደቆም ፖለቲካዊ ጽልዋ ከየሕድሩሎምን  ስድራቤታዊ ርክቦም ንምድራትን ዝሓንጸጹዎ መደባት ን 6 ግንቦት እቶም ነጋድያንን እቶም ርካቦም ደገፍቲ ናይቲ ምልካዊ ስርዓትን ዝሳተፉዎ ጽምብል ኣዋዲዶም ከምዘለዉ እቲ ሓበሬታ ኣገንዚቡ።

ኣምባሳደር ምልካዊ ስርዓት ኢሳይያስ ኣብ እስራኤል ተኸስተ ተስፋማርያም (ወዲ ባሻይ) ኣብ ዝሓለፈ ዓመት ካብ ቴልኣቪቭ ወጻኢ ተመሳሳሊ መደብ ኣብ ዝገበረሉ ኣጋጣሚ ዕግርግር ድሕሪ ምፍጣሩ፣ ካብ ቤትጽሕፈቱ ኪኖ 25 ኪሎሜተር ርሒቑ ተመሳሳሊ ጽምብል እንተገይሩ ተሓተቲ ከምዘይኮኑ ፖሊስ እስራኤል ከምዘጠንቀቑዎ ይፍለጥ።

በቲ ልኡኻት ናይቲ ስርዓት ነቶም ነጋድያን ብመደባት ኣጻቢቦም ንምቍጽጻርን ዝሓንጸጹዎ መደብ መሰረት ትማሊ 5 ግንቦት ኣብ ምዉት ባሕሪ ናይ ጃልባ ጉዕዞ ዝገበራ ካብ ኤርትራ ዝመጻ ነጋድያን ኣዴታት፣ ካብ ሓሳብን ትጽቢትን ናይቶም መራሕቲ ናይቲ መደብ፣ ነቲ ኤርትራውያን ስደተኛታት ብሓፈሻ፣ ብፍላይ ድማ እቶም ብስቓይን ግፍዕን ዝመልአ ከቢድ ጉዕዞ ስደት እስራኤል ዝኣተዉ ዝመብዝሑ መንእሰያት ዝርከቡዎም ኤርትራውያን ካብ ዝፈትዉዋ ሃገሮም ርሒቖም ንዘሕልፉዎ ዘለዉ ናይ ስደት ኩነታት ዘንጸባርቕ ምህለላ ኣብጺሐን።

ኣብቲ ብምኽንያት መብል 25 ዓመታት ናጽነት – ኣይረሳዕናዮን ብዝብል ኣርእስቲ ረቡዕ ረቡዕ ብራድዮ ኣሰና እንፍንዎ ዘለና ካብ ኣብ ሰነዳት ራድዮ ኣሰና ዝተመርኮሰ መዘኻኸሪ ትከታተሉዎ ከምዘለውኹም፣ መብዛሕትኦም እዞም ኣብ እስራኤል ዝርከቡ ኣሕዋትን ኣሓትን ግዳይት ነጋዶ ሰብ ራሻይዳን በደዊንን ኮይኖም ዘሕለፉዎ መከራን ስቓይን ኣብዚ ምዋእል ‘ዚ ኣብ ዓለም መዳርግቲ የብሉን። ንምህልላን ለመናን ናይተን ለዋሃት ኣዴታት ሓያልን ተንካፍን ዝገብሮ ድማ፣ ነዚ ምስ ደቀን ዝነበር ዘሎ ኣካላውን ስነኣእምሩኣውን በሰላ ዘይምርስዐን እዩ።